***************************************************
呢篇blog係五年後寫番o既回顧,
詳情請參閱「四日三夜 廣島四國 旅行團 Preface」,
當然, 看官無視呢點就咁睇落去都唔係問題。
***************************************************
雖然唔捨得,
但都要迎來広島四国遊行o既最後一日。
一早起身,
落超大雨......又行雷又括大風,
初時都擔心會唔會影響行程,
好在, 食完早餐, 雨已經收細左好多,
到小弟們到達目的地, 更加係停左雨。
四年後去左日本working holiday一年, 小弟自覺幾好彩,
一年間有六分一時間係旅行, 但落雨天只係三日。
(兩次嵐山, 一次仙台)
原來呢種好運, 由五年前第一次遊日本已經有。
個天總算待小弟不薄。
講番番黎,
今最後一日o既行程, 亦都係最後一個景點,
就係岡山後楽園。
日本有好多三大乜乜, 三大乜乜,
而岡山後楽園就係日本三名園之一。
(另外兩者為「金沢市・兼六園」同「水戸市・偕楽園」)
上圖係岡山後樂園o既地圖,
而影到嗰半邊面,
就係當時o既導遊。
當時日文都仲未係好叻啦,
加上鴨仔團, 行程比較趕,
所以都唔可以逐個建築慢慢睇。
再者呢篇野係五年後o既憶述,
記得大概做過啲咩已經好犀利=.=
係呢度就冇乜野好介紹喇
大家慢慢睇相啦。
(當年小弟未有單反, 得個百零萬像數o既DC仔)
後面嗰個係岡山城,
不過行程唔包。
咁啱有對新人係度影結婚相,
問准對方之後, 影左張。
祝百年偕老, 永結同心~
好大一片荷花池,
如果開滿荷花一定好壯觀!
位於公園末端o既竹林。
諗起中學一課書《捉人・深處・強姦》,
呀唔係《竹林・深處・人家》先啱
周圍都有參天巨木
有關於當日遊覽岡山後楽園o既仔細部份,
都唔係記得好清楚,
不過好印像深刻o既係,
園內o既造景、建築物o既間格、空間感等,
俾人好舒服o既感覺,
空曠o既地方唔會話大得荒蕪,
建築群又唔會話好擠擁,
即使已經唔記得細節, 但三年後(2011)遊覽另一名園兼六園時,
仍然好懷念岡山後楽園o既環境,
有機會都想再一次細看岡山後楽園!
差唔多到中午, 行程完結了,
係時候搭旅遊巴番廣島機場回航。
因為仲有時間,
於是同同學一齊係機場食個広島風o既お好み焼き。
お好み焼き(OKONOMI YAKI)
相信好多人都聽過, 但應該好多人都唔知,
お好み焼き都有分「広島風」同「大阪風」兩大種類。
(仲有啲minor啲o既分類, 嗰啲小弟都唔清楚喇)
其中最明顯o既分別,
係個底餅有冇麵條!
広島風o既お好み焼き係有麵的,
而大阪風o既お好み焼き就只係由麵分開出黎o既漿所構成。
大家睇吓下面一連串広島お好み焼き制作過程就會見到
1) 先將底漿煎熟至凝固
2) 再係上面加食材(椰菜呀、葱呀、肉呀咁)
3) 底餅連餸成個反轉煎熟
4) 同時間係一邊煎好麵餅
5) 將底餅連餸放上麵餅, 再煎一陣
6) 完成!
因為有麵餅o既關係,
所以広島o既お好み焼き比大阪o既飽肚,
但大阪風o既お好み焼き, 勝在可以食多幾個,
試幾款唔同味。
仲有幾樣野, 就算係日本人都未必知,
其中一樣, 就係お好み焼きo既切法。
如果大家係第一次食,
又或者係關西以外o既地方見人地食お好み焼き,
最普遍o既切法係好似切pizza、切蛋糕咁,
以放射方式切。
但其實係唔啱的。
お好み焼き係關西o既食物,
當然要跟關西人學正宗o既切法。
正確o既切法係好似上圖咁,
以橫切加直切o既方法切開!!!!!!
大家到日本時, 又或者同日本朋友食お好み焼きo既時候,
不妨留意下大家o既切法。
一睇就知道對方係咪關西人。
另外, 仲有一個日本人對關西人 (尤其是係大阪人)o既誤解。
一班唔同出生地o既日本一齊去食お好み焼き,
最常出現o既情況係, 大家會叫大阪人朋友示範正宗お好み焼きo既燒法。
而嗰個大阪朋友o既反應係............滴汗=.=III
因為大阪人鐘意食お好み焼き,
但比較少自己整黎食 (尤其是現代人),
出外食話, 都係店家燒好左拎上黎,
所以大阪人其實唔係好識由零開始燒お好み焼き的!!!!!!
講番番黎,
呢個四日三夜広島四国旅行團遊記,
文章o既完結方式好似有啲怪,
但的確已經完滿結束,
多謝看官閱讀m(_ _)m
你個blog好好睇, 多數寫得好既旅行blog都係台灣人, 廣東話真係極少, 加油ar, 期待你2015去多d日本, 出多d post
回覆刪除看完,邊看邊笑,應該說 邊看不停笑
回覆刪除神秘的男莊員上