魷日記: 大坂城 (大阪城)

今日八點半就起左身,刷牙洗面搞掂晒就出發去大坂城。

借旅遊書係度解釋幾句啦。
(《京阪神旅遊全攻略》; 正文社; 6th Edition; p1106~1107)
本來「大阪」係寫做「大坂」,
但因為「土反」似講緊「土に返す」(唔識日文都明啦下話~),
到左明治時期, 當時擔心叛亂,
「土反」似講緊「武士謀反」,
所以二戰後一律已經轉晒做「大阪」,
但大坂城係安桃山時期建o既,
所以正式應該係寫做「大坂城」

廢事煩, 下文小弟全部寫做「大阪」算......

講番大阪城,

雖然大阪城代表住豊臣秀吉政權,
而最初亦都係豊臣秀吉所建,
(當然唔係佢自己一個人起, 唔好同我捉字失)
但後來豊臣秀吉死左, 豊臣秀頼繼承父業冇耐,
遭到徳川家康攻沒。
徳川家康可以話係幾乎將大阪城拆晒, 再由頭起過。
所以而家見到o既大阪城外觀,
其實係徳川家康時期o既建築樣式。
(當然, 而家o既大阪城都係重建物)
而原豊臣秀吉時期o既建築,
就埋左係地台下面=.=
(真係拆得幾切底......)

再同對日本冇乜認識o既人補下日本史。
(其實小弟都唔係話好好, 簡單講下都仲得)
就算冇睇日本片, 冇打過《無雙OROCHI》,
都總會聽過織田信長、豊臣秀吉同德川家康呢三條友。
咁佢地係咩關係?

簡單黎講:
1) 織田信長幾乎統一戰國時期立立亂o既日本
2) 織田信長無啦啦俾身邊一個親信謀反迫死左(明智光秀)
3) 豊臣秀吉繼續織田信長霸業, 同期, 德川家康安定係本州東面
4) 豊臣秀吉死後, 豊臣秀頼繼位
5) 德川家康攻沒大阪城, 奪得霸權

(有錯請提出, 小弟話晒都唔係讀日文史)

由我附近個地鐵站搭地鐵,
唔洗轉車直接去到谷町四丁目落車,
行五分鐘就到西面入口---大手門。

沿途已經見到馬路、公園o既樹葉已經變黃、紅。

↓大手門正面

大阪城大手門有一個好出名o既地方,
就係佢右手嗰條柱。
1923年, 政府請人加固大手門條柱,
但個入榫位竟然係一邊梯形扣住,
一邊係反V形。如下圖

如果係梯形嗰邊入榫, 個反V會頂住,
但反V嗰邊入榫的話, 個梯形榫又唔成立,
究竟係點入!?

如果好似下圖咁由背面睇番出去,
頭先講嗰條柱就係下圖左邊嗰條。

門口有棵紅葉o既樹,
姑且按個friend意思,
睇下影唔影到好相啦,
不過好似唔係好得......

過左大手門一直向東行,
就會見到櫻門,
不過入城之前,
先睇一睇櫻門對面o既豊国神社,
係供奉豊臣秀吉o既。

冇咩特別野拜(冇話求文求武呀咁),
不過可能會見到有人係度行神道教婚禮。
(我走o既時候咁啱有, 不過無謂影人地)

又講多少少, 日本其實有分「神社」同「寺」,
簡單分的話, 神社係神道教的,
(一種中國道教+佛教+日本地道o既信仰宗教)
門口一般都會有鳥居, 即係有個好好似「开」字o既門坊係入口,
示意過左呢個門口, 就入左神祇o既結界入面。
而寺就純佛教一啲, 冇鳥居。
當然啦, 以上兩者都有機會有例外。

睇完豊国神社,
就正式行入櫻門。

過左櫻門, 就會見到有一舊大石,
叫蛸石(「蛸」即章魚)。
日本好多o既城係興建o既時候,
石頭都係由唔同地方o既藩主運過黎, 以示敬意。
當然, 運得越大舊, 就代表有孝心。
而蛸石係大阪城入面最大嗰塊,
最長11.7米, 重約130頓。
咁大舊石要由岡山搬過黎, 都真係......

舊石叫「蛸石」, 係因為佢左下方,
有一塊似章魚o既圖案。
(發揮下想像力啦香港人~)

再行入啲,
途經一排銀杏樹?
成地都係黃色落葉舖成o既地毯,
勁靚。

然後入到大阪範圍, 就開始係咁影個城喇,
冇乜野好講解。

用黎放火槍?

唔想咁快入城住,
於是係城外行下行下,
就行到去北面o既極樂橋,
係嗰度打雀。

都行得七七八八,
係時候入城喇~
盛惠每位600yen

下圖: 金明水井戸
相傳豊臣秀吉怕水俾人落毒,
於是投金條進內辟毒。
(唔係應該放銀咩?不過放銀係殺菌...)
後來經證實............係坤水架.......
不過入面就真係有好多硬幣係入面。
點解中國人同日本人,
見有水就會掟錢!?
等我又放桶水係屋企門口先。

下圖放係大阪城樓前o既「號炮」

好遺憾, 入左主城樓天守閣之後唔可以影相,
所以入面o既相欠奉。

仲以為入到去會見到城o既內籠、結構,
但原來入面係一個新穎o既博物館,
有好多同大阪城、或者係豊臣秀吉o既事物,
不過八成展品只有日、英說明,
兩樣都唔精o既朋友可能會悶啲喇。

入面有一層全層講「大阪夏の陣」,
亦即係德川家康攻沒大阪城嗰仗。
有一套動畫解說, 有中英日韓語解說。
都講得幾details。
原來真田幸村真係好勁!

上到最頂層係觀望台,
當然可以影相啦。