然後就再出外搵工喇,
琴日又冇回音, 等埋聽日都唔係路。
先行去西邊, 平時一直都行開,
睇下有冇漏網之魚,
同埋比平時行遠左少少。
漏網之魚有一間,
門口貼晒話アルバイト募集,
即係請PART-TIME。
今日o既策略係有理有理衝入去店入面問。
打電話太間接喇, 同埋又聽得唔清楚......
打開門入到去問個靚女店員,
同佢講話應徵。
佢轉個頭入店入面,
然後出話黎。
「對唔住呀, 我地店好似冇請人」......
靚女, 妳後面個收銀枱都貼住張 アルバイト募集o既A4紙喎......
西面冇斬獲, 向東面行。
今日先發覺, 原來我從來都冇向東面行過,
可能因為車站、超市等都係西面,
好自然每次一出門口就行去西面。
原來西面仲多食肆,
不過冇一間請人。
真係咁夠人做野嗎 T_T
番番起點,
然後向北面平野站嗰邊進發。
途中因為主要係住宅區,
冇乜商店, 有o既都係一個呀伯睇住間舖,
做又三十六唔做又三十六嗰隻,
都唔會要請人架啦。
行左約兩公里,
去到平野站嗰邊,
果然去到車站附近,
又多番啲商戶。
MOSBURGER門口又係貼住話請人,
走入去問,
回覆o既都係「我地冇請人」
頂你就唔好貼招聘廣告係門口啦%^&*#&(&#*
途中行過好多便利店,
不過都冇請人,
行到黎平野站,
即刻有兩間話請人,
一間係LAWSON,
一間係SEVEN。
兩間都係店長唔係樹,
叫我留底contact同個人資料。
其實小弟唔係好想做便利店,
一來因為比食肆人工稍低,
二來食肆一般包伙食,
呢個係非常非常非常重要o既一樣野。
當一餐500yen,
一週番五日, 一個月廿日,
就慳番10000yen!!!!!!!!!!!
有人之前會問點解你好似冇乜點搵工,
主要就係因為呢個原因。
可以o既話搵晒食肆先,
真係唔得先馬死落地行搵其他。
希望聽日2-5點會打電話叫我番工啦 T_T
大家見我上面段野好似唔係好長,
其實我已經行左成四個幾鐘......
行番宿舍除近食個親子丼就番房。
又講少少日本野啦。
親子丼:
「丼」單字讀don-bu-ri
前面跟住其他字就讀don (廣東話一聲)
講緊o既係用大碗裝o既飯上面舖一層餸o既合體。
因為傳統上日本餐係飯還飯、餸還餸, 分開擺,
所以丼係一個簡便o既食法。
如果小弟冇記錯,
好似話丼係為左方便勞動階層,
嗱嗱聲食完就做野啦,
仲邊有咁好心機等你慢慢砌靚啲小菜。
所以食丼亦都有俾人一種粗魯/豪邁o既感覺。
所以你入去日本o既丼店,
絕少絕少會見到女性食丼。
一來正如上面講, 食丼有一種粗魯/豪邁o既感覺,
係女性身上就唔係咁好啦。
二來女性一個人食丼,
會俾人覺得你係冇朋友, 或不善交際,
先落得如此下場。
當然, 香港o既 吉你媽 就冇咁拘泥啦。
然後講咩叫親子丼呢,
其實係雞蛋(半炒熟)同雞肉舖係面o既飯。
因為雞係呀媽, 雞蛋係仔,
食人老母同仔, 是為親子,
所以 雞蛋雞肉飯就係親子丼喇。
今日寫日記比較夜左少少,
係因為頭先同人係skype傾左一陣。
呢位叫nicole o既女性,
係日文班o既同學,
早我少少黎左日本,
開始為期一年o既日文課程,
不過佢o既居住地係京都。
大家都係講起係日本生活o既窮困啦,
因為大家都仲係用港幣洗日元,
都唔好話唔傷......
同埋大家都講起,
係日本搵工真係比想像中難好多!
如果有朋友睇過《打工旅遊情報書》(天窗出版)
都會覺得日本搵工好易搵。
但我(地)想講, 唔好信咁足,
好講彩數同埋睇你住邊區。
不過睇黎我好彩過nicole少少,
因為我屋租比較平,
而且俾5000yen就水電煤氣全包。
所以我幾乎廿四小時都開暖氣。
但nicole小姐o既水電煤氣係獨立計的,
所以佢而家京都嗰邊落緊雪都唔捨得開暖氣......
日文班o既同學, 救濟下nicole小姐啦~
沒有留言:
張貼留言