見完今日一份, 仲有聽日一份, 不過...

個鍵盤, 總算叫做係我打日記之前一分鐘正常番少少,
禁兩下得一下有反應咁啦......

今日去見工, 一出門口。
PK, 大大隻黑色o既貓坐係路邊......
我住嗰度附近有塊空地,
經常有貓係度留連,
不過黑色o既貓, 行經咁多次都係第一次見,
仲要揀正今日=.=
Damn it !



琴日叫我四點左右去,
因為要早十分鐘, 同埋我又怕搵唔番嗰間野,
(因為真係要入到去啲後巷仔)
所以都早左成廿五分鐘到=.=



去到嗰頭, 明明琴日走o既時候認住啲地標,
係嗰條巷架啦, 點解唔見嗰間舖架呢?
係嗰條巷o既範圍兜左十五分鐘左右,
算啦, 係大街行下先。

再番轉頭, 終於見到間野。
一來間野真係好細間,
二來佢個閘真係連招牌呀乜都遮晒,
佢唔開閘都唔知係間居酒屋......



坐低傾啦。
都係講清楚番幾多個鐘,
番幾多日, 幾多錢咁。

佢話番五點開舖, 做五個鐘左右,
如果多客可能會做夜啲,
一個星期做六日左右。
但時薪得嗰750yen......
當然我不形於色啦,
但心裏面真係一沈......



anyway, 馬死落地行,
真係冇辦法, 都要做住先。
如果咁計, 一個月得七萬幾yen,
有少少炆呀吓......

但問題係, 佢話佢都要考慮,
因為佢都話, 語言真係一大問題,
佢都話有時啲客都會講得好快,
同埋有會有口音, 本地人都會甩碌,
何況外國人......

於是佢話聽晚五點前會打俾我。



其實對呢位東主o既印象唔錯,
我都明佢o既商業考慮。
佢小本經營, 間店得廿零個位左右,
一個月應該都唔會賺好多,
如果唔係個老婆婆(好似係佢媽媽)年紀大,
佢都唔會請人。

所以我覺得呢單野五五波啦。



聽日傍晚都仲有一間居酒居要in。
不過呢間更加唔抱期望,
因為一個星期前拜訪,
一個星期後先約interview,
即係証明佢都唔等人用,
所以就算見得成都應該唔係日日番嗰隻......

琴晚同一個都係係大阪讀緊日文o既同學傾,
聽講東京會有好多工, 無論係食店定文職都係=.=
我係咪揀錯地方落腳呀 ＜( ;ﾟДﾟ)＞



唔錯都錯左, 唯有繼續努力......