梅田

本住琴晚見嗰份未必得o既心態,
今日食完個下午飯,
就出發去距離住所再遠啲o既梅田喇。

成日講啲地方名,
但大家冇概念的話都幾冇引,
今日就借用google map黎講解下啦。

最右下方嗰個格仔係我住嗰頭啦,
其他方格括住o既就係大阪o既鬧市,
亦都係我常去o既地方。
(梅田今日係第一次)



實際距離可以參考左下方o既scale,
如果你話(本人距離)感覺的話,
由我住嗰度出發,
去天王寺就好似去旺角,
去難波好似出尖咀,
而梅田就好似出CWB咁上下。

再多少少資料,
呢個地圖南北兩極,
大概係大埔火車站到九龍塘車站咁上下。

當然啦, 大阪唔係淨係得咁少o既,
四面都仲有好多地方,
不過唔係旅遊區,
而我又唔會去,
所以無謂介紹。

由我附近地鐵站出發,
搭去梅田要310yen=.=
試想像下由大埔搭去九龍塘要$31.......

去到梅田,
由城市o既外觀,
以致各人o既衣著打扮,
都俾我CWB o既感覺。

名店林立,
衣著時髦,
熙來攘往,
肩摩轂擊,
係咪覺得我中文好好呢,
我仲記得「肩摩轂擊」係《風雪中的北平》學架~
(唔知就google下啦)

實在太多食肆,
都唔知點入手好,
行行下, 與其話黎搵工,
不如話黎觀光。

貼街招請人o既店的確係比之前見o既多,
好可惜好多都係OPEN KICTEN。
即係話廚部要招呼埋客。
以我之前問過咁多間o既經驗,
呢啲一般都唔請,
因為佢地會覺得日文唔得,
招呼唔到客.......

不過講真,
你俾我做我都冇信心做到......

問左幾間啦,
有一間お好み焼き(中文好似叫雜錦燒)叫我聽日再黎見工,
因為好忙, 唔得理我住。
我先記得, 今日原來係聖誕節......
唔怪得咁多人啦.......

又講多少少,
聖誕節日本係冇公眾假期的,
大家一定好愕然,
不過的而且確, 崇洋o既日本係冇聖誕節假的,
我諗主要原因係因為,
耶穌教係日本o既影響唔係太大。

但當然, 百貨公司等商業,
唔會放過呢個機會。
而一般人亦都會當呢一日係假期咁慶祝,
一放工放學, 就即刻約人去街去red,
情侶當然會拍拖, 然後.........

係我打呢篇日記之前一分鐘左右,
收到聖誕禮物:
琴日見嗰間, 叫我星期二再去,
雖然未知去做乜,
不過應該走唔甩掛~

祝大家聖誕快樂~