忘年会

第二日番工。
有關拉麵加配菜嗰啲野,
開始熟手喇。

一朝早(其實都成十一點),
都係冇乜人,
但唔知點解到左十二點,
一黎就黎左十幾個客(大家唔相識的),
即刻忙到一團糟。

兩點收舖o既時候,
進藤先至同我講今晚有忘年會,
問我有冇野做,
冇野做一齊去喎。



忘年會, 類似香港o既團年飯咁啦,
不過團年飯係年頭,
日本o既忘年會係年尾。

一般公司都會包起一間居酒屋,
甚至更大o既會場,
 大家辟酒呀、發癲呀咁。

當然啦, 對於我番黎o既呢間拉麵店,
得兩間舖, 計埋老闆, 計埋我呢個閒人,
都只不過係八個員工。
斷唔會包起一間居酒居,
而係係一間稍高級o既日本料理店o既一角食餐飯,
摸下酒杯底咁。

不過呢...番得嗰一日半o既員工,
第二日就忘年會,
都冇乜野好忘......

下午五點,
坐進藤手車去。

佢手車真係好辣.....
右手夾住支煙,
左手拎住電話講,
以時速四十公里,
係高速公路四十五度角連cut四條線......
小弟真係肴肴地低......

去到料理店, 終於見到傳說中o既老闆---岩崎。
同場仲有老闆娘、加藤、同埋兩男一女,
嗰兩男一女都係係另一間番工,
不過有時都會過黎我嗰間幫手。

男o既都係三十幾四十歲咁上下,
而女o既, 除左老闆娘, 都係同我咁上下大啦。

睇黎大家都好fd底,
因為大家都互相取笑,
又打晒大脾咁(唔係BL嗰啲)。

可惜小弟o既日文能力有限,
而佢地又用關西腔,
所以只有兩成聽得明=.=

需然係咁,
但我已經覺得我耳仔
比初初黎o既時候已經適應左好多。

唔知埋單幾多錢,
不過啲餸菜都係細碟又唔飽嗰啲,
睇黎都應該幾貴......

十一點幾,
進藤車我到地鐵站,
自行搭地鐵番屋企,
已經差唔多十二點鐘喇。

聽日繼續打工!