最後一堂星期六的課

今晚就去機煬,

不過今日我仍然會番埋最後一日part-time。

有啲人話我傻,

但其實我特登book聽日o既飛機,

就係想上埋今日o既堂。

朝早到方生屋企,

幫佢細路補數學。

真係好擔心佢細路,

而且佢仲揀埋module one同埋physic......

中午到林家, 教小妹妹小提琴。

林生林太封左好大封利是俾我,

小弟無啦啦走左去唔教已經唔好意思,

仲要收咁大封利是,

實在係受寵若驚, 誠惶誠恐。

下午到黃家教小弟弟小提琴,

呢個只係教左幾個星期,

加上個小朋友都幾唔聽話,

所以感覺一般,

不過, 咁就斷左條米路......

晚上到陳家教小提琴,

又係一個好深感情o既學生,

佢都好唔捨得我,

仲畫左張卡送俾我添。

陳生亦都封左封利是俾我。

感覺上,

我出左黎教琴咁耐,

都冇遇過啲好麻煩o既學生或家長,

大家都好好人。

番香港之後,

都唔知邊度再搵人學琴lu。

晚上番屋企食飯,

八點幾食完,

陳rainbow小姐送對手襪同冷帽俾我。

番屋企沖埋涼,

九點幾就出發去機場喇。

雖則聽日機,

但事關係早上七點半,

計番條數, 瞓都冇得瞓就要去機場,

仲要想去都冇車去,

所以一如既往,

係機場過夜。

搭車去機場o既途中,

唔知點解,

突然間有種「去唔去都冇所謂, 不如唔好去」o既感覺,

不過都上左車去緊機場...

今晚機場唔知點解好似心以往多人,

唔知係咪因為近聖誕。

不過我都霸到個好位,

將啲行里o既分配重組,

睇左一陣小說就訓喇。

Tomorrow will be a brand new day!