再等

總括黎講,
今日係冇做過啲乜o既。

因為冇野做,
所以今日訓晏左,
成十點幾先起身。



上網、寫日記。
其實小弟update緊呢個blog之外,
仲有寫一個日本o既網誌, 叫mixi,
你可以叫佢做日本人o既面書咁上下啦。

一晚寫兩篇都實在有點厭倦,
所以呢個blog即日寫,
而日文嗰個就第二朝先寫。



講番番黎,
睇過琴日o既post o既人都知我今日下午見工,
三點幾唔三四咁,
於是係房上下網呀、睇下niconico咁(唔知係咩就search google啦)。

一點鐘, 去超市買餸。
(講到好似個師奶咁=.=)
因為琴日食得平,
今日可以超少少budget。



今晚想食西餐,
於是買左意粉、carbonara汁、牛扒同菠菜。
為左炒炒啲意粉同煎牛扒,
又買左舊牛油。

百思不得其解,
點解一舊牛油會貴過塊牛扒=.=
(兩樣都差唔多400yen)

不過呢個係晚餐,
午餐係炒公仔麵同煎餃子。



買完餸煮完食埋,
都兩點幾。

做少少準備,
就去見工喇。
行兩個街口就到,
超近。



去到間牛丼店,
同個女店員打個招呼之後,
(正正係上星期六drop低我資料嗰個靚女)
佢就叫我入去廚房後面個休息室。
入面有個年紀大少少o既女人。

都係叫我填form,
同問我啲簡單問題咁啦。
有冇part time經驗呀、
點解揀呢間呀咁上下。



佢仲讚我啲日文都幾OK,
係度應該唔會有障礙,
不過今日仲有一兩個人會見工,
話見埋之後就店長決定(妳唔係店長黎架咩=.=)
如果星期五之前都收唔到電話的話,
就即係冇行咁話。

成個過程都唔夠三十分鐘......



番到房,
咁等法唔係路,
再打電話問下其他店先。

咁啱一問就中,
即刻叫我聽日14:15去見工......
睇黎佢都好似等緊人咁喎。



anyway, 呢幾日寫履歷書寫到發癲......
都唔知點解日本o既履歷書一定要用手寫,
仲要唔俾寫錯!!!
寫錯左要用張新o既由頭寫過......

好似香港咁Print出黎咪好地地囉。
好似罰抄自己o既生平咁......

平成10年7月 聖公会XXXX小学校卒業
平成10年9月 XXXXX入学
・
・
・
平成22年9月 香港科技大学XXXX学科修士卒業

仲有工作經驗呀、求職動機、自我推銷、興趣等......



聽日in 嗰間都係快餐店,
不過稍為和式一啲。
聽天由命啦。