經過琴日o既失敗,
今日小弟有萬全之策,先係用相機影低google map,
然後再帶埋京阪神旅行指南,
想搵唔到目的地都好難!
先由附近車站-喜連瓜破-搭地鐵直剷到難波,
出左地鐵站口, 對住個地圖搵新生銀行,
但唔知點解對極都對唔到自己係邊...
唯有周圍行住搵。
反正有時間,
就梗係影下相啦。
行左一個圈之後發覺,
新生銀行就係小弟頭先對地圖時企o既背面=.=
what the hell !?
開戶口。
老實講, 小弟自問日文算ok,
但一遇著啲專門用語就死直,
再加上銀行職員嗰啲超禮貌o既敬語,
(敬語: 日文有禮貌o既說話系統,
一句說話用同唔用敬語, 可以完全唔同...)
真係聽到頸都則埋......
用左大約半個鐘開戶口,
當中都有啲阻滯。
阻滯一:
登記中文名時,
小弟 完全唔知自己個名o既日文發音...
識小弟o既人都知小弟個名有幾複雜,
結果好采, 銀行電腦登錄系統有手寫輸入,
而好采佢電腦有小弟個名o既字。
阻滯二:
開戶要電話號碼=.=
冇喎, 點算......
好在隨身帶住住大阪o既日文老師電話,
老屈話打俾佢就搵到小弟,
勉強過關...
阻滯三:
外國人登錄証要到一月中先寄到小弟府上,
但申請左臨時行街紙, 咪俾佢囉,
佢話唔係外國人登錄証的話唔可以即刻俾到提款咭小弟......
咪又係政府文件, 洗唔洗分得咁details呀......
anyway, 十日後會收到提款咭,
費用全免。
成功開戶之後,
即刻過後面條街開手機。
日本有三大電話台,
docomo, au 同 softbank。(點解要改英文名?)
小弟揀左au, 原因好簡單,
小弟黎左日本幾日,
聽得呢間公司名最多。
(小弟黎之前係聽docomo最多架)
開手機唔洗好專門o既用語,
不過啲敬語都係聽到小弟一舊舊......
將行街紙同銀行戶口証明文件交俾佢,
職員話唔知O 唔OK,
佢打電話俾總公司之後,
又再問小弟拎passport,
真係十萬個好采小弟唔記得執走個passport。
小弟想問:「張臨時行街紙咁冇認受性架咩!?」
然後揀plan上台啦,
當然又係有阻滯......
阻滯一:
同樣地要用電腦填小弟個中文名,
但佢電腦唔以新生銀行有手寫輸入。
結果用最原始o既方法,
用原子筆填form......
阻滯二:
上台要俾銀行戶口,
小弟係開左戶,
但佢話因為小弟未有提款咭,
戶口亦都冇錢,
所以唔OK......................
.......................................
.......................................
十萬個無奈囉...
***開戶要電話號碼; 上台需銀行戶口***(好一句對偶)
玩哲學dilama咩大佬呀!!!!!!!!!!!!!
好在佢話銀行戶口可以後補...
阻滯三:
填完form,
要fax去總部等批,
叫小弟係附近行番一頭半個鐘先喎。
反正附近好多商店街呀, 百貨公司咁,
又差唔多成三點, 係時候搵野食。
當然目標係500yen左右啦。
途中行過「自由軒」,
出名食咖哩飯, 不過較貴,
等小弟搵到工之後先去拆番餐勁o既。
不過比較過之後,
都唔夠呢間「ザめしや」抵食,
550yen炸豬扒、蛋, 加烏冬定食,
加大碗飯仲唔洗錢!!!
真係食到反肚...
日本o既服務性行業(唔好諗歪!)真係好細心,
見你個袋放左係地下,
佢會俾個藍你裝住,
唔好整污糟, 雖然食物唔係一流,
但有呢啲服務, 心裏面都加左唔少分!
吽左一個鐘, 係時候番去拎手機,
見原本招待小弟嗰個職員同其他客介紹緊,
唔阻佢, 於是係店門口掩掩揚揚算。
佢見到小弟之後, 同另一個職員(應該高級啲)講左幾句,
然後高級啲嗰個就走黎,
用一個唔好意思到想喊o既樣同小弟講,
因為總行仲未批, 問小弟可唔可以再過半個鐘先黎,
話半個鐘之後一定得咁話。
見到佢嗰樣咁, 就算係假o既, 啲劇都交得足過無線啦,
反正小弟又冇野做,
咪再行下囉。
半個鐘之後真係有得攞喇,
個職員(高級啲嗰個)同小弟拎埋個購物袋連手機盒出店口,
用番同一個「難過樣」, 又多謝幫襯, 又唔好意思拖小弟咁耐,
躹十萬個躬睇住小弟走。
唔係話崇日、唱衰自己,
但貴為購物天堂o既香港,
待客態度同細心, 真係十萬年後都趕唔上人地......
順帶一提,
小弟 個電話係零機價出機,
最普通o既款,
個plan亦都應該係比較平嗰個。
雖然係最平嗰款,
但已經先進過小弟係香港用緊嗰部NOKIA 5字頭系列,
起碼而家呢部有埋鏡頭......
(不過冇microSD, 就好似冇廁紙o既廁所; 又或者上唔到網o既電腦咁)
黎得難波, 當然要去日本橋啦,
日本有云「東有秋葉原,
西有日本橋」
雖然規模冇秋葉原咁大,
但都係集電器、動漫於一身o既一條街。
當然小弟冇錢買figure嗰啲啦,
但都買左一本《生徒会役員共》第6話。
六點幾天已經全黑,
番房, 睇下部手機點用。
啲logo呀、制式完全同香港嗰啲好唔同,
聰明o既小弟都搞左好一段時間先明白。
經過之前兩晚經驗,
已經掌握到半額便當o既時機同手段,
所以今日帶埋相機去直擊。
行過又黑又凍o既橫街,
經過LIFE之後就係AEON喇。
去到o既時候,
半額神已經開始貼緊20%
OFF o既貼紙。
當然小弟唔會出手住啦,
但已經見到半額神已經俾人圍住。
係呢個時候,
小弟就睇下超市有冇其他野啱買啦。
因為今日做緊優惠,
所以有好多野都好平:
烏冬19yen 200g 一包!?!?!?
好, 聽日下午應該唔洗出街,
可以自己煮。
行過凍肉嗰邊,
又俾我見到最後一盒半價肥牛,
只係432yen (其他平均都600yen以上)
唔理啦, 肚痾當清腸胃!
再買25yen 四分一個椰菜,
聽日嗰餐500yen左右搞掂。
九點幾, 係時候番番黎半額便當現場,
首先係炸熟食嗰邊,
50yen一件再半價,
即刻執左8件, 有咁多肉, 今晚實飽!
然後就係便當喇,
一早已經睇中左,
今次o既戰略係企係個便當前面,
等半額神貼到過黎。
小弟研究過,
半額神係由凍櫃左邊貼到右邊,
而稍為背向左邊,
只要我企佢右邊等,
佢一貼我就攞到,
而半額神o既背脊則擋住其他餓狼。
當然, 好順利咁拎到手,
但回頭望, 半額神已經被淹沒係人群中......
可以比較下半額前同半額後,
相信再過十分鐘就會清晒倉......
↓事後
於是今晚o既晚飯,
只需488yen,
我仲要飽到食唔落個飯團......
沒有留言:
張貼留言