黑田

今日兩條藤去左新舖打點,
得番我一個當然唔得啦,
於是有一個幫手黎左,
叫黑田, 30歲。
好似係平時負責豬骨湯底的。

因為佢好似同大老闆好熟咁,
所以係佢面前我都唔係好敢吞pop。
好在我琴日留左大量o既野今晚做,
所以晚上嗰七個鐘,
唔可以話好快過,
但唔難捱先啦。

佢凌晨一點收左舖,
仲要過去總店度整湯低=.=
真係超人,
小弟自問冇咁好精力。

閏年!?

呢排開始對呢份工有少少厭倦,
唯有苦中尋樂啦。
諗起上半年唔似下半年有四個月去到31號,
個人即刻開心左。

再諗,
二月得28日,
但人工一樣,
賺左。

不過今日係店個廁進行工程o既時候,
見到個月曆(唔知點解廁所會掛月曆=.=)
OH SXXT!!!
今年閏年, 二月有29日,
即刻DOWN左成晚......

奈良一日遊後談

琴日由奈良搭車番大阪,
係月台等車o既時候,
聽到後面有一男一女用港式廣東話交談,
討論緊係邊度排隊上車好。

事源係月台上,
唔同香港東鐵咁有框框住排隊上車o既位置,
日本JR月台係用兩個圓形或三角形表示上車位置。
圓形多數係普通車,
而三角形多數係快速列車。

見大家同鄉,
於是搭咀同佢地講係三角形排隊。

上左車坐埋一齊傾足全程。
佢地係用新年假黎關西六日五夜,
今日係最後晚,
聽日就搭飛機走。

傾開我係大阪搵工做o既慘淡,
同埋而家份工o既工時長,
個男人彈左句「人離鄉賤」。

超中,
四個字表達晒個情況。
賤, 唔係講緊人地歧視你或睇唔起你,
而係你自己為左生存,
都會將自己降格去就人地。

不過, 都係一個好好o既體驗黎o既。
(唯有係咁諗=.=)

放火燒山---若草山(&庚申堂+奈良公園+春日大社+東大寺+二月堂)

今日七點十分起身,
搭地鐵到天王寺,
然後坐區間快速到奈良,
0841就到達,
比去京都仲要近。

先簡介吓我o既行程先,
如下圖

 由西面o既JR奈良站,
沿 三条通(打橫最長嗰條路) 向東行800米到半路,
南行約400米睇下睇庚申堂,
然後向上行番上 三条通,
屈番轉頭睇一睇啲商店街,
然後再落番 三条通,
經過興福寺直入春日大社。

北上時經若草山踩一踩場,
然後去東天寺參觀,
睇埋二月堂之後,
最後去番若草山睇放火燒山。

試驗

今日晚上番工,
為左預備下個月開始同大老闆兩條友站岡,
於是預先試下一個晚上唔睇小說唔用電腦過活......
不過可能因為今日係星期五o既關係,
人客比較多, 耽住都有野做,
加上電視晚上有電影睇(《L Change The World》),
所以呢一晚快唔可以話好快,
但總於唔太辛苦就過左。

頂佢個肺大老闆又係十二點幾鐘走黎食野,
最後搞到成兩點鐘先走得!!!!!!
雖則聽日放假,
但要早起身去旅行家嘛!!!

Simon the Snow Blower

好似話日本呢排迎來一股寒流,
今日有九成o既觀測點都有落雪,
就連平時唔多落雪o既大阪,
今日下午都落左一陣雪。
不過一來好稀疏,
二來落緊雪o既時候我番緊工,
所以影唔到相。
就算影都影唔到啲咩。
啲雪落左十五分鐘左右就停左。

今日終於知道,
完來啲雪真係亂舞咁飄落黎,
而唔係垂直咁慢慢降落黎,
而且比想像中飄~
未見過落雪o既人聽我咁講都唔明架喇,
有機會的話,
遲啲影到相就UP俾大家睇啦。

話說今日個title,
係小弟N年前睇《決戰紫禁之顛》,
鄭伊麵介紹自己叫 西門吹雪 o既時候,
係字幕見到o既英文翻譯=.=

巨變

小弟做緊嗰間拉麵店,
好似話會開第三間,
於是兩條藤(進藤+加藤)會過去新店。

舊店得番小弟一個當然唔得啦,
隨之而來o既係大老闆親自落場=.=

OH! FXXK!

晩上嗰七個鐘點捱?
而家用電腦睇住動畫黎過都覺得慢長,
老闆親自落場,
肯定唔用得電腦啦。

另外就係,
而家啲準備工作,
係由小弟同加藤分擔。
大老闆落場,
即係得小弟一個做晒!?

天滿宮初天神梅花祭

天滿宮初天神梅花祭,
係大阪天滿宮每年24~25/1 o既祭典。

天滿宮係祭祀日本歷史人物 菅原道真 o既神社。
菅原道真 本身係一個好有學問o既人,
係朝廷官位都幾大,
後來又係俾人陷害啦,
被眨官而後鬱鬱而終。

因為 菅原道真 死左之後有好多異變,
(唔係無啦啦死好多人就行雷咁辟死人)
朝廷認為係菅原道真 o既陰魂作崇,
所以追封番菅原道真,
又建神社拜佢咁。
叫得天滿宮o既就係拜佢。

因為菅原道真精於學問,
所以被認為係學問之神,
啲人多數黎求合格呀咁。
我諗同拜孔子差唔多啦。

今日利用下午o既休假,
三點左右去到天滿宮
其實所謂o既天滿宮初天神梅花祭,
係講緊早上九點o既祭典。

因為菅原道真係係25/1被眨官,
所以到左呢日,
會用菅原道真鐘意o既梅花黎供奉佢,
呢個就係梅花祭o既由來。

另外到左中午一點鐘,
會有個叫「うそ替え神事」。
係話將大家平日講過o既大話,
交托俾菅原道真o既愛鳥「うそ鳥」,
(我諗係玩食字,  「うそ」係大話,
「鳥」同「取り」發音一樣,   「取り」 即拿取、取走)
幫大家去除罪孽咁話。

anyway,
我去到都已經係三點,
一切都已經完左,
得番最後一個活動,
就係請左隊知名棒球隊o既隊員黎抛波波,
稍後再詳述。

去到梗係影下相先啦。
 

星期一

今日係小弟o既拉麵店第一次做埋星期一,
(之前星期一係例假)
唔知係咪啲人都習慣左星期一唔開,
下午數埋都唔夠十個人,
晚上仲勁,
得1 group五個, 再另外加多兩個人黎。

結果成個晚上,
加藤小姐坐係度瞓,
而我就先睇左一個鐘小說,
(《僕は友達が少ない》第四冊都睇完喇=.=
 好彩一早買定第五冊)

改制

今日收到加藤小姐o既通知,
小弟做嗰間拉麵店,
將會取消逢星期一休店o既慣例,
改為一年365日營業,
而各人o既休假,
將會改為輪更擇日休息。

本身聽到個消息,
個心沈一沈,
不過諗諗下,
好似咁樣仲好。
因為我可以一早睇定有啲咩節目,
然後揀嗰日放假。
係假期就節目,
唔係節目就假期,
太好了。

新組合

而家番工時o既人手係咁的,
日間1100~1400有三個人
小弟+加藤小姐+α (可以係店長進藤, 或part-time安竹, 或老闆娘 新木愛)
晚上1800~0100有兩個人
十之八九都係小弟+加藤小姐

今晚因為加藤小姐有啲私事,
晚上放假, 結果小弟就同店長進藤拍檔。
小弟同佢單獨拍當係一次。

半天假

今日結果都係冇出去心齋橋一帶買生日禮物,
因為諗諗下其實結果都係差唔多,
大阪除左之外, 我諗都冇乜特別野。
反正我下星期應該會去奈良,
到時連埋呀媽份生日禮物一次過買,
一次過寄番香港仲唔洗咁煩。

今日晚上番工,
唔知點解番左兩個鐘之後,
店長話我可以落場番屋企。
(平時店長夜晚去第二間舖做野)

就係臨走切埋啲椰菜o既時候,
斬到手指尾=.=

因為有血出, 唔適合繼續理食材,
加上本身小弟都係早走架喇,
於是比原本更早歸家。

咁就多左一晚休息。

買禮物

今日下午,
犠牲左瞓晏覺o既時間,
出左天王寺一帶搵生日禮物俾個妹。
不過好可惜,
行晒啲商場、商店街,
都搵唔到實用而又有大阪代表性o既野......

話時話,
大阪其實都只係得食、食、同埋食=.=

唯有聽日再出遠啲心齋橋一帶睇下啦......

又一日

今日冇乜特別事做,
亦都冇特別事發生,
都係番工-->落場-->番房-->番工-->放工。

我個妹聽日生日,
睇下聽日出去買番份生日禮物先。
雖然寄過番香港已經過晒期,
不過仲想點呀,
有好過冇丫XP

本身去京都o既時候都打算買,
但實在見唔到有咩啱。
小弟買禮物又比較有原則---
就係唔想買啲無聊裝飾品等,
最緊要實用,
就好似2010年聖誕party買嗰份咁~
(唔好問我係咩)

萬年油

今日番工,
最後o既一項工作係洗炸野嗰個爐。
萬年油聽就成日聽喇,
自己平時都食唔少,
但真正要清理個萬年爐,
先知道有幾恐怖。

個爐應該都有成個幾月冇換過油。


先係放左啲油出黎。
我唔知啲油本身係咩色,
但而家放出黎嗰啲油,
好似焦糖咁o既色,
而且能見度一定唔多過2cm......

放晒啲油之後,
就見到個爐底嗰啲渣滓,
好似泥漿咁。

洗o既過程就唔講喇,
都係搵野洗洗刷刷咁啦。

換番就o既油落去,
原來本身o既油係同普通花生油一樣,
透明黃色的......

清水寺+知恩院+八坂神社+袛園+二条城+金閣寺

同琴日一樣, 六點鐘就彈左起身,
本身都有啲擔心起唔到身,
但又估唔到咁順利喎。
不過代價係眼瞓到死=.=

路線同琴日都係一樣啦,
先坐地鐵到天王寺駅,
坐0747o既JR環版線內回り到大阪,
然後轉新快速到京都。

去到京都都係坐206號,
不過過左三十三間堂再多幾個站,
係清水道先落車。

今日天氣唔多好,
一直都陰天,
不過都好過落雨o既。
但我想落雪多啲......

因為冇太陽,
所以都幾凍,
好采今日戴左手襪.
(多謝陳X采小姐提供)
如果唔係真係快門都禁唔到......

今日o既第一站係清水寺,
相信唔熟日本o既朋友都會聽過。

清水寺係由延鎮上人創建,
座落係京都音羽山,
大概公元800前後咁上下建成啦。
(都係有紀錄同冇紀錄之爭)

不過清水寺起好之後都燒過唔少次,
而家見到o既大部份,
都係由江戶時代德川家光(德川家康個孫)修建,
不過仍保留住平安時代o既建築模式。
(《京阪神旅遊全攻略》; 正文社; 6th Edition; p2201)

三十三間堂大的大會

今朝六點鐘,
個鐘響左一野就即刻彈左起身,
真係奇蹟......
(小弟一般都賴床半個鐘的...)

刷牙洗面0615出門口,
由附近地鐵站搭地鐵到天王寺轉乘JR,
要搭0647大阪環狀線內回り
(故名思意形環狀線, 內回り係逆時針,
 外回り係順時針, 去大阪駅, 兩邊都一樣)

真係準時都冇人有,
準時0647開。
0709去到大阪駅,
轉乘新快速(米原經由近江塩津),
0745去到京都。

一切都比想像中順利,
一來列車準時,
二來轉車月台標示清楚,
三來, 我一早check好晒往咩方向等等。
四來京都比想像中近,
感覺就好似由市區搭車番琛玔咁。

一出京都駅就可以見到京都其中一個地標。
睇《京都so good》得知呢個塔係似蠟燭,
而131m高代表當時京都人口131萬人喎。

決戰星期天

琴日下午無啦啦有咁多人黎,
好可能係因為過一個街口,
有一間新o既大型藥店就黎開張。
唔同公司o既工人黎將啲貨品上架,
所以lunch time就有咁多人湧現。

今日係星期六,
我本身都懷疑啲人洗唔洗番工,
有冇咁多人黎食。
店長佢地話預備定先,
於是作好打仗o既準備,
炒好一大堆飯, 以免售罄。

良民證

平時中午1100~1400,
大概會有廿個客咁上下,
主要係1200同1230兩個peak。
但今日中午唔知做咩事,
1130開始啲客就不斷湧入黎,
全院滿座之餘仲要有幾group人見到冇位就後走左。

平時煮十mug米,
一日都用唔晒,
今日淨係一個下午,
已經用晒十mug米,
仲要同落左單o既客講唔好意思炒飯賣晒。
炒到手都斷......

咒怨

今日晚上同琴日差唔多,
八點開始就冇乜人黎。

不過今日電視有野好睇,
所以間好快過。
個節目係介紹伊斯蘭教、猶太教、天主教o既生活,
三個教o既聖地,
同埋點解佢地會有咁多鬥爭。

攝製隊仲去到三個教聖地o既寺廟教堂
一般唔俾入o既地方拍攝,
真係大開眼介,
亦都學到好多知識。

其實如果香港電視台多啲呢啲節目,
我諗我都會睇少啲動畫。
《水資源》其實係一個好開始。
不過最好係唔洗啲明星講咁多野。

悶到抽筋

今晚成晚,
由六點到一點,
都只係得八個客,
仲要全部都係八點半前入席。
八點半之後,
得十一點半黎左一個客......

可想而知啲時間幾難捱。

不過我都有過牆梯。
呢幾日我都有帶電腦番拉麵店。
雖然冇無線上網,
不過我一早已經入左幾套動畫。
今日終於發揮作用。

於是加藤就係度用手機上網睇片,
而我就用電腦睇《花咲くいろは》。

我諗都係時候考慮吓申唔申請無線上網。

Μορφέας

睇個title好似好把炮咁,
其實只係想表達,
因為琴晚(今朝先啱)六點先訓,
結果一訓訓到下午一點鐘先醒。

本身今日10/1先係十日戎(TOUKA-EBISU) o既正日,
(唔知係咩就睇番琴日o既blog惡補)
早上有啲類似花橋廵遊咁o既野,
不過實在係太攰,
結果訓醒, 啲節目都完晒。

今宮戎神社

日本一月十日,

有個叫十日戎(TOU-KA-EBISU)o既節日。

えびす(EBISU)係日本七福神之一 (E請用英文響音讀法讀)

有好多個寫法 (都係同一個讀音EBISU):

夷、戎、胡、蛭子、恵比須、恵比寿、恵美須, 等等。

其象徵意義大概就好似中國o既財神咁上下啦。

本身えびす係漁業o既神,

主要係漁民模拜。

後來由漁業引身為商業、貿易等事業,

於是慢慢邊左財神。

成人式

問左店員加藤,
原來三連休o既星期一,
放假原因係因為「成人式」(SEI-JIN-SHIKI),
直譯就係成人禮。

日本戰敗後,
因為國力虛弱,
為左激勵年青一代,
以及為年青一代帶黎希望,
1946年琦玉縣蕨町就搞左年「青年祭」
(祭, 即慶典、節日)
呢個就成為左日本成人式o既前身。

1948年開始,

渡日如年

講真,
我而家做緊呢份工唔係辛苦,
雖然工時係長啲,
但係人工比較好,
本住先苦後甜o既決心,
我情願頭半年唔玩咁多,
搵多啲錢之後,
下半年可以去多啲想去o既地方。

再重溫一次,
我o既作息時間如下:
1000起身梳洗,
1030到拉麵店準備
1415左右收工番房(上下網、訓番個零鐘), 或出街
1730到拉麵店準備
0115收工番房, 沖涼、打日記、睇動畫
0300-0330訓覺

日間嗰更,
雖然係最多人黎食野,
但唔係真係太忙。
最大問題係晚上嗰更......

唔係忙,
真係太得閒。

晚上嗰七個小時,
基本上數埋唔夠廿個客,
可想而知有幾多時間係係度hea......

可能因為日本呢三日連休,
(我都唔知連啲咩休喇)
所以啲人都出晒街,
冇人黎食野(我嗰區係住宅區)。

企係度又冇野做嗰下真係......

五級燒傷

煮開野識炒飯o既朋友都會知道,
炒飯先係加熱啲油,
然後打蛋,
再用鑊鏟打均隻蛋。

今日晚上炒飯o既時候,
打均隻蛋o既時候太用力,
一野將啲油發左落隻手度,
做成六至七塊燒傷。
由LVIS可得知,
啲油係從右邊向左邊飛濺

又一日

好抱歉, 今日真係冇乜野好寫,
都係番工, break, 再番工,
番房, 打日記, 睇動畫, 瞓。

炒飯

小弟間拉麵店, 除左拉麵之外,
另一個招牌菜係炒飯。
其實之前店長進藤已經積極地train我炒飯。
一來可以幫輕下佢,
二來女仔跟本抛唔起個鑊。

原來係為左呢一日o既來臨。

再去初詣

琴晚收到電話,

話今晚都唔洗番工,

所以計劃左再去第二間神社度初詣。

搭地鐵到天王寺附近,

再轉電車(類似香港o既叮叮, 不過得一層)。

大半個鐘左右就到達。

呢度又講多少少,

日本o既巴士、電車都係用車中間o既門上,

用車頭o既門口落客。

去到o既時候三點幾, 天開始暗。

今日仲要係年初三。

但神社仍然係鬼咁死多人=.=

放我半天假

今日冇咩特別,
不過唔知點解中午冇啦啦同我講,
晚上嗰更可以唔洗番, 放我半日假。

都冇乜野做, 同埋有少少作病,
所以都係留係宿舍煮野食、上下網, 洗下衫咁。

果然唔番工, 係唔知道放o假既可貴!

所以呢,
抱歉了, 今日冇咩野可以講。

初詣

今日用左中午休息嗰幾個鐘,

去左大阪天王寺(地方名)附近o既四天王寺(寺廟名),

睇下日本人o既初詣係點o既樣。

所謂o既「初詣」(HATSU-MOUDE),

係指日本人一年第一次到寺廟神社參拜。

比較神心的話, 一般係係除夕已經排隊,

等十二點過左之後即刻去拜下,

感覺就好似啲人過年係黃大仙插頭注香咁啦。

退而求其次, 可以瞓個覺, 第二日先去。

另外、日本新年仲有好多「初」,