初詣

今日用左中午休息嗰幾個鐘,

去左大阪天王寺(地方名)附近o既四天王寺(寺廟名),

睇下日本人o既初詣係點o既樣。

所謂o既「初詣」(HATSU-MOUDE),

係指日本人一年第一次到寺廟神社參拜。

比較神心的話, 一般係係除夕已經排隊,

等十二點過左之後即刻去拜下,

感覺就好似啲人過年係黃大仙插頭注香咁啦。

退而求其次, 可以瞓個覺, 第二日先去。

另外、日本新年仲有好多「初」,

例如「初夢」(HAJI-YUME)。

即係指年初一到年初二嗰一晚發o既夢,

有「一富士二鷹三茄子、四扇五煙草六座頭」o既講法,

意思係「初夢」夢見以上o既野的話,

黎緊一年會有好運, 以夢見富士山為最佳, 如此類推。

「姫初め」係咩? 好孩子不要問!!!

經過住o既附近,

之前咪講過有塊空地有好多貓o既,

因為未到集合時間,

所以只影到長駐係度嗰一隻。

係附近搭車, 唔洗轉線,

一直搭到去「四天王寺前夕陽ケ丘駅」落車。

(好長o既名=.=)

再行約十分鐘就到四天王寺。

四天王寺應該係佛教o既寺廟,

但唔知點解都係有鳥居係度?

過左鳥居,

就見到好多小攤當,

轉個頭再介紹。

睇下寺廟入面o既相先啦。

因為唔係旅遊聖地, 冇場刊, 

所以好多野都唔知點解,

所以小弟用僅有o既日文,

將知道o既講俾大家知。

好似話個肚入面有「福」,

背後個袋有「黃金」,

摸下相應o既地方就會沾光咁話。

冇細心睇係咩,

但我諗都係轉一圈當當唸左一次經掛。

冇入去上圖o既總殿,

入去要俾300yen。

上圖係個鐘樓,

一定時間(一兩分鐘左右)會響一次。

自動波, 先投入100yen,

然後按自己生日拎相應o既籤文。

講多少少,

日本寺廟神社,

好多o既求籤嗰啲咁o既野,

都係冇人睇住的。

大家唔洗驚,

只要自動波投入相應o既金額,

然後自動波求籤、或拎相應o既籤文就OK。

當然你唔俾錢就拎都未必有人知o既,

不過日本人相信, 咁樣做會遭天遣。

而大家都唔好做失禮人o既事啦。

當然我都拎番張啦。

不過入面寫啲野無陵兩可,

呢度唔浪費筆墨講。

我嗰張唔係求o既籤,

(即係冇話大吉、小吉、凶嗰啲)

求到吉固然可喜, 拎支籤番屋企,

但如果求到唔係吉,

日本人習慣將籤綁係指定o既地方,

或者係樹上面, 唔拎番屋企。

好似上、下圖所示咁。

爆多人排隊祈福

極樂淨土之庭,

好似係一個幾靚o既庭園,

四點收工, 我去到o既時候已經係四點半,

加上我唔想俾500yen入去,

所以我冇歸西。

cut左少少野就變左上圖所示,

有邊個想入去?  XD

臨走前睇下啲檔攤啦。

好似年宵咁,

佢地都有賣下花咁。

上圖所示o既,

佢地叫「長崎味自慢BABY Castella」。

用蜜糖、雞蛋同奶造成。

我想話, 只係大粒少少o既雞蛋仔=.=

下面嗰檔野得意啲.

直譯叫「蛋仙貝」,

大家可以睇下面連續o既做法~

  

其實只係係蝦餅上面塗上醬油,

洒上米通, 加隻蛋, 再擠啲沙律醬........

好食唔算好食o既,

不過叫做幾得意咁囉=.=

睇動畫就見得多喇,

真正o既 林檎飴 (蘋果糖) 就真係第一次見,

梗係買番個試下啦!

初初以為成個都係糖漿做成o既,

完來入面真係有個蘋果。

我買o既係細版(300yen),

所以個蘋果都係就珍版。

糖漿得個甜字, 冇話好唔好食。

仲以為啲糖漿會冚晒蘋果o既甜味,

但點知個蘋果都好甜,

再加蘋果本身o既酸味,

都真係幾好食。

其實仲有其他例如菠蘿呀、提子咁。

大家見到不妨試下。

話就話今日黎係去初詣,

其實我都冇入場拜過,

實在係太多人喇=.=

好難想像大家係凌晨十二點,

排晒隊等入場嗰下=.=