三十三間堂大的大會

今朝六點鐘,
個鐘響左一野就即刻彈左起身,
真係奇蹟......
(小弟一般都賴床半個鐘的...)

刷牙洗面0615出門口,
由附近地鐵站搭地鐵到天王寺轉乘JR,
要搭0647大阪環狀線內回り
(故名思意形環狀線, 內回り係逆時針,
 外回り係順時針, 去大阪駅, 兩邊都一樣)

真係準時都冇人有,
準時0647開。
0709去到大阪駅,
轉乘新快速(米原經由近江塩津),
0745去到京都。

一切都比想像中順利,
一來列車準時,
二來轉車月台標示清楚,
三來, 我一早check好晒往咩方向等等。
四來京都比想像中近,
感覺就好似由市區搭車番琛玔咁。

一出京都駅就可以見到京都其中一個地標。
睇《京都so good》得知呢個塔係似蠟燭,
而131m高代表當時京都人口131萬人喎。

冇時間慢慢遊。
京都駅前面就係巴士站。
唔洗刻意搵都即刻知道應該搭邊架,
因為係某個站前面等別多人,
而且個個都拎住碌野。
無錯, 嗰啲就係大的大會參賽者。

我搭o既206號巴士,
係均一區間220yen。
即係話搭幾遠都係220yen,
唔洗拎整理券,
落車俾錢就得。

另一種巴士,
會按距離收費,
屆時上車要先到某機器禁掣拎整理券,
代表上車區域咁上下。
然後係車頭落車o既時候,
係車頭部機投入整理券同埋顯示o既價錢就落車。

番番正題,
搭左十分鐘就到三十三間堂,
落車跟大隊行,
幾步路就到三十三間堂入口。
同計劃一樣,
而家係八點鬆啲。

一入到第一時間就見到好多女仔著住好鮮艷o既衫,
拎住一支支野三五成群咁企係度,
應該係等緊人, 或者係預備緊大的大會比賽。

日文「的」(MATO),
即係標靶o既意思,
所以「大的大會」,「 又或者射的大會」,
即係日本傳統射箭比賽。
而射的呢種運動就叫「弓道」(KYUU-DOU)

日本有好多「道」,
例如弓道、柔道、劍道、華道(即插花)。
(唔好同小弟講一本道......)
雖然前三者都係競技,
但逢有「道」字o既,
其實都講緊修心養性為主。

弓道女生著o既唔係和服,
而係叫袴(HAKAMA)o既服裝,
劍道等o既運動式傳統服裝都叫袴,
不過弓道女生o既上衣,
袖比較長, 長到拖地咁濟。
至於男生就型囉,
驟眼睇好似得黑同白,
不過陣間睇相就會見到啲好man o既服式!

去到疑似入口, 又好多人o既地方排隊,
以為係等入場睇比賽啦。
但聽前面某個師奶o既交談,
原來睇比賽有另一個入口,
我排緊呢個係等入廟有啲唔知咩矢通し法事。

於是我就離隊,
係好多參賽者嗰邊入喇。
個入口果然好唔起眼,
加上啲參賽者又遮住晒=.=

首先見到好多男生集合等比賽,
睇黎比賽都係啱啱預備開始,
首先係男仔, 十一點半之後先係女仔,
有啲失望, 因為女仔衫比較鮮艷,
影起黎好睇好多。

去到觀眾席,
多人到喊......
仲要啲新聞記者等等,
行晒啲鋁梯係度影,
我都要舉晒手先影到相=.=

大家可以留意下左下方兩個男參賽者, 勁man!
我想話, 今日京都氣溫係1 - 8℃......

60M外有四個靶分左四隻色,
參賽者每排有12人,
我諗係分組計分掛。

(以下係小弟o既推測:)
靶旁邊有個大牌,
黃色代表黃色靶, 藍色代表藍色靶如此類推。
(仲有塊係另一邊影唔到)
完全射唔中個靶同背板(粉藍色)就冇事發生,
如果射中個靶塊背板就會有一個X
如果射中個靶就會有個O

影到都有乜野好影,
於是走番出去,
經過有個地方,
有個帳蓬仔,
有啲熱茶呀咁俾啲參賽者享用。
帳蓬外當然唔少得賺錢o既買賣,
賣箭呀、箭袋咁。

咁啱可能係女子組召集,
勁多女仔排晒隊,
當然要影番幾張啦。
個個都悉心打扮,
SET行晒個頭插晒花咁,
個樣唔得都好, 睇服飾都夠數。

不過影唔到女子組比賽真係可惜......



仲有時間,
咁啱頭先排晒長龍入廟參拜嗰條隊入得,
於是順便跟埋入去睇下咁啦。

有節目, 當然唔少得地攤啦~


0915, 差唔多係時候要走,
預番鬆少少啲時間,
如果唔係趕唔切班車就大獲。

以下係京都巴士站,
「100」下面顯示左四條路線o既巴士去到邊,
上面兩條路線o既黃色圓形代表架巴士去到邊,
移到最左手邊就即係差唔多到站。
當然因為路面情況,
唔可以話真係好準時,
但都相差無幾。

因為預鬆左少少時間,
所以可以慢慢影下相,
下圖係京都駅外觀。

京都駅正面入口

樓底都幾高。

入閘機

小弟就係坐呢架關西空港線特急はるか17,
直接番番去天王寺。
0945開車, 1030就到天王寺,
同我黎嗰時慢慢搭,
快左成倍之餘又唔洗轉車。
當然, 代價就係俾多940yen。



JR分幾種車,
普通、快速、急行、特急、新幹線等等。
如果我冇認知錯,
前嗰三種應該係唔洗加錢:
「普通」一般都會站站停, 比較慢;
快速、急行, 會揀站停,
多數都係停大站;
至於特急新基本上唔係好停,
不過要另加錢另外買票。
好似我今次搭咁,
由京都出車,
只係停大阪駅同天王寺駅,
然後就到機場。

你問我咁樣花四千yen車錢睇一睇人地射的抵唔抵,
我覺得可以啦,
一來, 比起冇去做而後悔, 我情願做左先。
二來, 而家都習慣左日本o既價錢:
以一餐平均600~800yen計,
千幾yen一程車其實都唔係好過份。



講番番黎,
成功1030去到天王寺,
轉地鐵搭番番我住嗰頭番工,
啱啱好1100到達!

好精彩的一個早上,
仲有成日工作等住我=.=



明日預告:
我會再去京都,
不過因為聽日放假,
所以我係去玩足一日!