本身都有啲擔心起唔到身,
但又估唔到咁順利喎。
不過代價係眼瞓到死=.=
路線同琴日都係一樣啦,
先坐地鐵到天王寺駅,
坐0747o既JR環版線內回り到大阪,
然後轉新快速到京都。
去到京都都係坐206號,
不過過左三十三間堂再多幾個站,
係清水道先落車。
今日天氣唔多好,
一直都陰天,
不過都好過落雨o既。
但我想落雪多啲......
因為冇太陽,
所以都幾凍,
好采今日戴左手襪.
(多謝陳X采小姐提供)
如果唔係真係快門都禁唔到......
今日o既第一站係清水寺,
相信唔熟日本o既朋友都會聽過。
清水寺係由延鎮上人創建,
座落係京都音羽山,
大概公元800前後咁上下建成啦。
(都係有紀錄同冇紀錄之爭)
不過清水寺起好之後都燒過唔少次,
而家見到o既大部份,
都係由江戶時代德川家光(德川家康個孫)修建,
不過仍保留住平安時代o既建築模式。
(《京阪神旅遊全攻略》; 正文社; 6th Edition; p2201)
沿住清水坂上慢慢就見到似係遊客區o既地域:
啲路又鋪得靚啲,
啲舖又飾修得靚啲。
不過因為只係八點幾,
所以啲舖都未開。
唔緊要啦,
走嗰時應該差唔多開,
到時再睇。
行七分鐘左右就見到清水寺正門「仁王門」,
晨早流流真係好,
冇乜人, 點影都得。
望向仁王門左邊o既係「西門」(唔好諗粗口=.=)
同埋「三重塔」, 如下圖所示。
不過下圖o既西門同三重塔重疊左。
穿過是但一個門, 左手邊就會見到鐘樓,
清水寺除夕敲鐘就係敲呢一個,
平時當然封住唔俾你亂搞啦。
再行入啲就會見到「隨求堂」。
睇旅遊書話可似俾100yen入去參觀佛像入面,
入面黑潻潻, 然後慢慢前行會見到個梵文,
等參觀者感受「無眼, 界乃至無意識界」。
(《京阪神旅遊全攻略》; 正文社; 6th Edition; p2207)
不過一來仲係八點幾,
counter都未開,
二來小弟冇咩興趣,
於是影過下相就算。
三重塔要黎收佛舍利。
呢度o既三重塔唔係日本最高嗰幢,
最高嗰幢係奈良藥師寺東塔。
(《京阪神旅遊全攻略》; 正文社; 6th Edition; p2207)
三重塔前面又有個地方洗洗手。
「歡喜水」即係點?
行落去會見到上圖五顏六色o既野同埋有間小廟,
如果我冇睇錯, 好似係供奉「水子」(MIZU-KO)
水子即係胎死腹中o既胎兒,
聽落好似有啲恐怖。
好喇,
係時候俾錢入去睇主要o既部份喇。
盛惠300yen。
以呢個價錢睇世界文化遺產,
真係一啲都唔貴。
門票話只係當日有效,
但我想講, 張門票係冇日期的,
而所謂o既票只係紙質好少少o既一張紙,
隨時可以複製到......
可能因為都成九點鬆,
所以開始多其他遊客。
上圖所見o既全部都係袓國o既同胞。
好嘈......
正門同樣有個地方洗手,
雖然天氣凍, 但呢個都要洗一洗o既。
聽講平時人多唔俾你咁慢慢影相,
不過而家都未算多人,
所以可以影過夠。
話時話條龍都幾型。
一入去就係一條走廊,
下圖走廊盡頭有個木架同有碌野棟左係度,
陣間再介紹。
下圖係上圖走廊o既外部,
可以見到突出黎o既就係聞名已久o既清水台。
一大一小o既錫仗同一對鐵下駄。
有傳係歷史人物武藏坊弁慶o既用品。
不過係個傳言係假的。
只係明治時代開始先放係度o既酬神祭物。
大鍚仗高2.6M, 重90KG
小錫仗高1.76M, 重14KG
鐵下駄重24KG (下圖)
(《京阪神旅遊全攻略》; 正文社; 6th Edition; p2209)
同埋禮佛o既臺,
冇乜興趣入去睇,
影左啲木柱o既展品就算。
唔識日文都睇得明啦下話。
下圖係上圖o既舞台古柱大特寫。
隔黎就係做生意, 同埋參拜o既地方,
賣下御守り咁。
而對出就係清水舞台。
係走廊影番,
可以見到清水舞台有幾高。
上、下兩圖係由清水舞台影番入頭先講話做生意同埋參拜o既地方 。
唔好誤會上圖係清水舞台,
而係由清水舞台影過去「奧の院」,
雖然佢都有個舞台仔啦。
而下圖就係由清水舞台影落去「音羽の滝」(OTOWA- NO-TAKI)。
「滝」即瀑布。
點解唔影清水舞台?
「不識廬山真面目 只縁身在此山中」嘛,
睇住下圖o既清水舞台略影頂住先啦。
穿過清水舞台,
會見到下圖地主神社,
主要祭祀神道教o既「大國主命」及有關神等。
(神道教: 日本本土鬼神說+中國道教、佛教之獨有宗教)
因大國主命其中一職負責掌管姻緣,
所以黎得呢度都係求姻緣。
(《京阪神旅遊全攻略》; 正文社; 6th Edition; p2210)
拜嗰個當然唔係我,
而我亦都冇話特別想拜,
反而想影多啲相。
下兩圖嗰兩舊石唔可以唔識。
(如果你想求姻緣的話)
相傳由後面個女人庶住嗰求石開始,
合埋眼,
成功行到去男人前面嗰舊石的話,
就可以達成戀愛o既祈願。
上圖就係頭先個女人遮住左o既另一舊。
唔好以為閤埋眼行好似好簡單,
以我所見, 都有三四成人係行歪左。
地主神社隔離有條好斜o既樓梯,
可以一口氣落到去音羽の滝。
不過呢條樓梯為安全計,
標示話只可以落, 唔可以上。
(但只有日文, 冇其他語言=.=)
下行時, 樓梯o既左邊就係清水舞台,
可以一窺清水舞台o既結構。
落到去就係音羽の滝,
由山流出o既泉水被分開三條,
左、中、右分別代表學問、戀愛、長壽。
不過只可以揀一款, 飲多過一款就唔靈,
而且唔可以多飲過一口,
如果唔係靈驗度就會反比例地下降。
(《京阪神旅遊全攻略》; 正文社; 6th Edition; p2211)
睇落好似有好多人排咁,
呢張相影到o既只係小兒科,
我過左大半個鐘再黎,
條隊打左幾個餅,
高達八成人都係煲冬瓜的。
而且佢地慌死蝕底咁,
三條水流係咁飲起勢飲搏命飲。
如果唔行樓梯落,
水平咁行另一條路,
就會去到頭先影到o既奥の院。
係嗰度就可以影到清水舞台全景喇!
因為係冬天, 但又冇落雪, 所以光禿禿,
但現場親身望過去, 真係好有氣勢!
我已經決定左春天一定會再黎影櫻景!!!
I WILL BE BACK!!!
日本祭祀神佛(其實中國都係)都會有舞蹈,
因為清水寺供奉o既佛像係崖邊,
要跳舞禮佛又唔想移動本尊,
就只有好似而家咁起一個舞台,
呢個就係有清水舞台存在o既原因。
好似話呢個190平方米o既舞台,
冇用過一口釘, 全部都係似入榫搭建。
日本有句諺語, 叫
「清水の舞台から飛び降りるつもりで」,
字面係「以清水舞台跳落去o既打算」
即係話本住一死o既決心去做一件事。
事實記截中, 過往都真係好多人由清水舞台跳過落去......
都影得七七八八,
於是沿路行番落山。
可以見到啲舖都開晒,
人流亦都好多,
同頭先冷冷清清完全係兩回事。
沿清水坂行番出去,
右手邊會有個分叉路,
本身叫「產寧坂」,
因為同音, 所以又叫「三年坂」,
不過唔知幾時傳下傳下,
傳出話係呢條斜路仆親三年內必死=.=
如果真係唔好彩仆親但又唔想死,
就可以係以下「瓢箪屋」頭買番個葫蘆裝水飲......
(瓢箪即葫蘆)
(「二寧」同「二年」同音)
然後就係一年,
不過冇乜野睇。
過左三二一年坂,
就會到「ねねの道」(寧寧之道)
沿住寧寧之道行,
盡頭就係円山公園。
聽講下圖o既垂櫻,
花開o既時候會好靚~
到時有機會再黎。
円山公園o既東北面就係知恩院。
我唔係信佛, 當然唔係去參拜啦,
不過知恩院有一條好出名o既走廊,
叫「鶯張りの廊下」,
因為走廊地板o既獨特設計,
行過o既時候會有嘰嘰聲,
聽落好似鶯叫咁,
所以叫鶯張りの廊下。
亦即係二条城用到o既技術之一。
穿過南門,
就會見到好宏偉o既黑色佛廟。
真係好有壓迫感!
間廟好多地方都裝修緊, 封住晒,
初初仲擔心睇唔到條走廊。
但有理冇理亂行一輪之後,
除埋鞋入大殿, 無視祈緊福o既人o既目光,
再經過骨灰翕使用注冊o既office=.=
終於兜到去傳說中o既「鶯張りの廊下」。
當然睇相冇野好睇啦,
小弟拍左片, 收左音,
不過放唔到上黎XP
初初仲以為只係好似普通門骹嗰啲吱吱聲,
但原來並唔係咁。
要比喻的話, 就好似打鞦韆時嗰啲嘰嘰聲,
不過比輕清脆, 都真係幾好聽。
如果大家唔係特別想影相,
旅行o既schedule又冇乜時間的話,
可以唔黎知恩院,
而直接去二条城(稍後再介紹)。
從正門走,
要行一條好斜o既樓梯,
有幾斜?
30度似上都有=.=
係正門o既北邊,
馬路中心零零舍舍圍住左一舊石,
叫「瓜生石」。
有好多傳說啦, 我都唔多講,
不過專家話有可能其實係一舊殞石。
(《京阪神旅遊全攻略》; 正文社; 6th Edition; p2110)
ANYWAY,
好似下圖所示咁,
隊正係路中心,
都幾阻地方。
落番南面円山公園,
往西行就會到八坂神社。
八坂神社同其他神社一樣,
範圍內仲有好多細o既廟供奉其他神。
下圖所示o既就係供奉「美神」---宗像三金神 o既廟。
仲附有「美容水」, 可能會好過SK ii 啲神仙水=.=
有一半都係想成為藝能人出度成功=.=
八坂神社真正o既正門唔係對住祗園o既西門,
而係南樓門, 見下圖。
南樓門有一個京都最大o既石鳥居。
穿過上圖o既西門就係袛園商店街---四条通
主要係一條購物大道,
對小弟黎講冇乜興趣。
時間已經係點幾鐘,
有啲肚餓, 所以去左下圖,
旅遊書介紹o既「壹錢洋食」食野。
菜單入面, 一頁紙都冇,
(「芽新」為英語「MENU」o既日文意聲諧音字)
只係係簿皮入面印有店內唯一食物o既相=.=
一錢洋食, 650yen
係用麵粉、蛋等煎成o既薄皮包住蛋呀、肉呀咁,
都係食個汁啫, 不過啲味又幾夾。
間店除左出名一錢洋食之外,
其實仲出名在於店內有大量鹹鹹濕濕o既裝飾,
或者係黃色幽默......
↑ 有好多意義深詳o既絵馬 ↓
恐怕唔係話咁輕易出得街的......
食完,
行去搭巴士o既時候經過一條小路。
(其實都唔小=.=)
應該就係藝妓(賣藝不賣身)嗰條街,
不過趕搭巴士,
所以冇詳細睇, 亦都冇乜興趣睇。
係衹園搭12號巴士,
下一站就係二条城。
冇諗到可以係清水寺+袛園一帶行咁耐,
到達二条城已經係兩點鐘左右。
二条城係德川家康留係京都時o既住所,
亦係德川家康及其繼承人接見權貴o既地方。
講起二条城, 就會令人想起戰國、幕府o既結束,
因為德川家政權末期,
朝廷o既勢力日漸回復,
後來德川幕府抵受唔住壓力,
由第15代將軍德川慶喜,
正式係二条城接見諸侯,
宣佈「大政奉還」,
即係將政權歸還朝延。
日本歷史由江戶時代進入明治時期。
歷史課黎到呢度。
講番, 入城要先俾600yen,
比起清水寺好似唔係咁抵,
不過呢啲野冇得計o既~
小弟係鐘意影下啲門柱呀、
花紋圖案咁。
東大手門o既背面,
右手邊有條樓梯,
應該係上城門守城用掛,
唔俾上, 所以唔清楚。
係左手邊會有間屋仔,
應該可以係嗰度借導遊耳機,
不過小弟廢事煩,
掂行掂過。
轉過彎就到「唐門」,
叫得唐門,
係因為佢o既建築風格係參照中國,
講落係咪真係有啲時中國o既古建築呢~~~
馬後炮......
圖案係武將等比較少用o既鶴呀、龜呀、蝴蝶等。
天花都幾靚,
一啲都唔豆腐渣。
車寄係俾坐牛車黎o既貴賓上落客。
都幾精緻。
從車寄可以入內觀賞二条城主殿。
要先係車寄除鞋換提供o既拖鞋。
好可惜入面唔可以影相,
所以冇相可以提供俾大家。
仲記得頭先知恩院o既「鶯張りの廊下」嘛,
即係行上去地板會嘰嘰聲嗰條走廊。
同知恩院唔同,
二条城全部走廊都係「鶯張りの廊下」 !
而且啲木板俾知恩院o既更加大塊,
行上去感覺更加正!
總括黎講,
主殿入面有好多好大o既和式大房,
(真係好大=.=)
而且所有趟門都畫有極具價值o既畫。
入面唔同房有唔同功用,
不過介紹牌只有日文,
所以如果真係想了解多啲o既朋友,
就真係要借番部耳機聽下。
不過就算唔知啲內容,
就咁行係條走廊度都好正。
出番黎沿建議o既順路行,
先經過「二の丸庭園」。
都係啲日式庭園啦。
會見到下面o既本丸御殿。
對出就係本丸庭園。
係本丸o既南邊,
有一個高地,
就係本身天守閣o既地點,
可惜1750年遭雷擊毁,
到而家都未修建。
但係係天守閣遺址,
可以影番落城其他地方,
係一個唔錯o既攝影地點。
二条城就黎到呢度。
因為仲要趕去下一站---「金閣寺」。
有少少擔心,
因為而家已經差唔多四點。
日本景點多數都只係開到五點,
(特別event例外)
而且好多時四點開始就唔俾入。
(二条城就係......)
係二条城落車嗰度,
再次搭12號巴士去金閣寺。
唔知點解巴士勁多人。
途中有個站,
有一Pair外國人上車。
其中個女人想行入啲車箱,
但俾我孭嗰個三落架卡住,
由於我係一個好有禮貌o既香港人,
所以我就say sorry話「I am sorry that I am too bulky」,
於是個女人就開撩我傾偈。
(唔好太多想像,
對方只係一個四十幾歲o既人妻)
都真係傾左好多野。
佢地黎自San Francisco,
先黎京都玩幾日,
然後再上北海道滑雪......
另外有傾下興趣呀、
去過邊個國家旅行呀、
鐘意咩運動呀咁。
呢啲他鄉遇異客,
都幾得意。
佢地都係去金閣寺,
不過我想慢慢影相,
所以落左車之後就各有各行喇。
好彩金閣寺仲未關門仲可以入內。
金閣寺, 正式係叫鹿苑寺,
最早屬於室町時代將軍足利義滿o既住所,
並以而家金燦燦o既建築為退休後修道o既地方。
本身經歷過戰亂都好地地冇乜事,
但1950年俾一個見習僧人放火燒到渣都冇......
所以而家見到o既, 只係仿造物......
估唔到張飛係一張平安符,
都幾過隱, 不過盛惠400yen。
其實冇乜野好睇,
俾400yen,
都只係想一睹金燦燦o既金閣寺。
當然, 境內都仲有其他景點o既,
不過都係啲睇唔睇都罷o既野,
所以呢, 俾唔俾400yen入黎睇,
就見仁見智喇。
不過如果有機會的話,
小弟想落雪o既時候再黎影一次!
而家都好多寺廟用呢啲自動化求籤機。
好似有點兒搵笨,
同抽閃咭有咩分別=.=
後話:
去觀光o既巴士路線check得好清楚,
所以都好順利,
但回程就唔記得check。
結果搭錯車,
用多左成個鐘先到京都駅......
沒有留言:
張貼留言