天滿宮初天神梅花祭

天滿宮初天神梅花祭,
係大阪天滿宮每年24~25/1 o既祭典。

天滿宮係祭祀日本歷史人物 菅原道真 o既神社。
菅原道真 本身係一個好有學問o既人,
係朝廷官位都幾大,
後來又係俾人陷害啦,
被眨官而後鬱鬱而終。

因為 菅原道真 死左之後有好多異變,
(唔係無啦啦死好多人就行雷咁辟死人)
朝廷認為係菅原道真 o既陰魂作崇,
所以追封番菅原道真,
又建神社拜佢咁。
叫得天滿宮o既就係拜佢。

因為菅原道真精於學問,
所以被認為係學問之神,
啲人多數黎求合格呀咁。
我諗同拜孔子差唔多啦。

今日利用下午o既休假,
三點左右去到天滿宮
其實所謂o既天滿宮初天神梅花祭,
係講緊早上九點o既祭典。

因為菅原道真係係25/1被眨官,
所以到左呢日,
會用菅原道真鐘意o既梅花黎供奉佢,
呢個就係梅花祭o既由來。

另外到左中午一點鐘,
會有個叫「うそ替え神事」。
係話將大家平日講過o既大話,
交托俾菅原道真o既愛鳥「うそ鳥」,
(我諗係玩食字,  「うそ」係大話,
「鳥」同「取り」發音一樣,   「取り」 即拿取、取走)
幫大家去除罪孽咁話。

anyway,
我去到都已經係三點,
一切都已經完左,
得番最後一個活動,
就係請左隊知名棒球隊o既隊員黎抛波波,
稍後再詳述。

去到梗係影下相先啦。
 

 呢個係正殿o既後面,
原來我係後門入左都唔知。

咁啱有「神楽奉奏」進行緊。
神楽奉奏即係啲善信俾啲錢,
有專人跳舞祈福咁囉。
祈福黨?

今次係小弟第一次真正見到有巫女(MIKO)跳舞。
(唔係《魔女宅急便》嗰種巫女)
當然拍左video啦,
不過up唔到上黎XP

其實都講唔上係舞,
只係右手拎住串鈴,
左手拎住扎梅花,
跟住音樂揚兩揚咁。

 等棒球隊o既其間,
又周圍影下咁啦。

呢個就係正殿o既前面

棒球隊出現之前,
見到正殿入面有位上左年紀o既伯伯,
好似好把炮咁。

而望下後面,
啲人已經迫到出宮外面......

到左棒球隊出場,
當然唔係成隊黎晒啦,
黎左五個。

啲人對棒球員o既瘋狂,
比得上周瘦娜啲粉絲=.=
仲要好多都係上左年紀o既嬸嬸......

遊戲係咁o既,
佢地五個人會掟啲軟棒球出黎,
多數都係白色,
當中有啲係綠色。

接到波波o既就可以去換取一個餅(MOCHI)
(唔係西式硬嗰啲, 日文o既餅都係指類似草餅嗰種)
個餅會附有紙仔, 如果紙仔有字,
就可以去換禮物。

綠色波波好似會多份禮物,
詳情唔係聽得好清楚。

只見啲波一飛入人群,
就立刻被吞噬......
我諗當年劉翔條褲俾人撕開成七塊布都係咁上下情況。
到左呢啲關頭, 邊個國家o既人都係咁上下,
已經講唔上禮唔禮讓,
而係好似梁振英咁,
當仁不讓XP

上圖係啲人用波換餅o既混亂情況,
同上海世博「張飛爭奪戰」有得fight !
而下圖就係櫃桶底o既餅。

然後就係排隊換禮物。

我一味影相,
當然冇接波啦。
人地換禮物o既時候,
我就周圍影相喇

天滿宮正門後面,
以及正門吊住o既嗰舊野,
刻有十二生肖。

同其他神宮、神社一樣,
境內都仲有好多其他小神社。
下圖係白米大神=.=

見親有咁多紅色鳥居,
十之八九都係稻荷神社。
稻荷係主穀物、食物o既神,
因為相傳狐狸係稻荷o既使者,
所以所以稻荷神社都會似狐狸代替狛犬。
(即門口一左一右, 個口一開一合嗰兩隻野)

小弟好鐘意好多鳥居中穿過o既空間感~

 天滿宮外面仲有一個小神社,
睇啲旗仔有梅花logo,
好可能都係天滿宮管轄。

神社入面有啲梅花,
可惜仲未開花。

入番天滿宮,
騫然見到有塊「百度石」,
難度我國o既資訊網已經入侵日本!?

日落西山下。

好抱歉, 而且亦都好遺憾,
影唔到祭典o既盛況......