搭地鐵到天王寺,
然後坐區間快速到奈良,
0841就到達,
比去京都仲要近。
先簡介吓我o既行程先,
如下圖
由西面o既JR奈良站,
沿 三条通(打橫最長嗰條路) 向東行800米到半路,
南行約400米睇下睇庚申堂,
然後向上行番上 三条通,
屈番轉頭睇一睇啲商店街,
然後再落番 三条通,
經過興福寺直入春日大社。
北上時經若草山踩一踩場,
然後去東天寺參觀,
睇埋二月堂之後,
最後去番若草山睇放火燒山。
今日早上陰天,
仲有少少毛毛雨,
如果真係落雨的話,
燒山就會改去二月頭,
希望冇事啦。
奈良站唔夠京都站宏偉,
但勝在旁邊就有個舊站,
相影成趣。
舊站而家就做左旅遊資訊中心。
唔似得某政府乜Q都拆晒再起過新o既。
因為小弟skin deep o既關係,
所以都係跟旅遊書介紹黎行,
仲未得閒到(同埋高深到)自己搵景點。
因為商站街九點十點先開,
所以跟旅遊書介紹,
先到南面庚申堂睇一睇。
其實「庚申」指o既係中國道教o既「庚申信仰」,
詳情唔多講喇, 加上我都唔係太大興趣。
不過因為日文o既天干同十二生肖讀音一樣,
(對番下面)
子 丑 寅 卯 辰 巳 午 未 申 酉 戌 亥
鼠 牛 虎 兔 龍 蛇 馬 羊 猴 雞 夠 豬
所以黎到日本,
庚申信仰就無啦啦同猴子扯上關係......
係堂頂可以見到三隻馬騮, 左至右是為
聞かざる、言わざる、見ざる(MI-ZARU, IWA-ZARU, KIKA-ZARU),
意思係不聞、不言、不看,
因為「不」古語「ZARU」同「馬騮」發音一樣,
玩食字之下就同馬騮排上關係=.=
仲有隻露點o既馬騮唔知佢想點=.=
吊住一隻隻好唔知點o既野,
其實叫做身代わり猿,
白色嗰個係頭,
手腳屈左去背脊。
話縳係屋企, 代人吸災喎。
其實間野冇乜特別,
除非想買番隻身代猿,
如果唔係, 唔黎呢個境點都唔太可惜。
見幾靚就影低左。
雖然都仲係市區,
不過有草屏o既地方,
都已經見到有鹿。
啲呀婆呀伯以餵鹿為樂。
上圖所示o既係興福寺o既五重塔,
而下圖就係德善院入口同埋南円堂。
因為都成九點幾,
商店街都陸續開門,
所以行番轉頭睇下啲手信。
經過中谷堂,
旅遊書介紹話啲草餅好好食,
於是買番盒試下(390yen)。
都係包住啲紅豆飴咁啦。
外層係幾好咬口o既,
不過我鐘意東京深大寺o既蕎麦餅多啲。
行經東向通商店街o既時気,
會經過一個教堂,
特別o既係間教堂一啲都唔似教堂,
反而似寺廟。
可以話係和洋合壁o既代表作。
因為奈良出名奈良公園,
奈良公園出名鹿,
所以手信店都係以賣鹿o既精品為主。
不過又真係幾得意o既。
向番西行,
今次終於正式行入去興福院,
影到五重塔o既全景。
因為興福院開始就係郊區,
所以鹿o既數目開始多,
下圖為一菲籍人士拎住鹿煎餅俾鹿圍o既情況
XD
就開始進入春日大社o既範圍。
初初仲擔心會唔會見唔到鹿,
同埋見唔到賣鹿煎餅o既店。
但小弟可以同大家講,
完全係唔洗擔心, 一定會見到。
只要突然有好一大群鹿,
隔離就一定有人賣鹿煎餅。
而有人賣鹿煎餅的話,
就一定有一大堆鹿圍住!
點解啲鹿唔走埋去食店o既鹿煎餅?
因為店住一係用餅罐蓋,
一係用掃把拍走啲鹿=.=
勁惡嗰隻!
開始走入春日大社,
之前,
咁啱今日有篝火會(大とんど祭場),
即係將大家啲舊o既吉祥神物呀、
又或者係許願o既牌呀,
一把火燒鬼佢。
太好了,
大阪o既睇唔成,
可以係奈良睇番。
其實都冇咩特別,
都係有人念經呀,
然後有人一將箱箱紙皮箱掟入去燒咁。
不其然諗,
其實日本事無大小都咁燒法,
溫室食體排放都幾係野。
幾多環保技術都唔夠補。
隔離就係一望無際o既草皮。
路邊會有路牌,
內容大概係話:
雖然奈良公園o既鹿習慣左人多,
但終歸都係畜牲,
間中都會攻擊人,
所以長者同小孩要多加注意。
四格圖係講啲鹿會
咬、踐踏、頂、同撞。
黎到奈良公園,
當然要買番疊鹿煎餅玩下啦。
一疊10塊, 150yen, 真係唔係貴。
為左保護啲鹿,
連縳住啲煎餅o既紙條都係食得o既。
(當然係講緊啲鹿啦=.=)
小弟試過下啲鹿煎餅,
大概好似冇味o既消化餅咁啦......
一開始因為啲煎餅俾紙條卡住,
拎唔到出黎,
但啲鹿已經好心急咁圍埋黎,
有隻仲要兩次趴上我個身度=.=
如果係柔弱啲o既女仔,
又或者係小朋友的話,
真係會俾啲鹿推倒=.=
玩完自拍之後,
係時候繼續我o既旅程:
沿路行入去春日大社。
春日大社其中一個出名係好多燈,
無論係石燈,
定係陣間會見到o既銅(?)燈。
而係改用鹿。
經過一圖o既南門,
就會見到下圖o既弊殿舞殿。
一般入到黎就要止步,
因為再入要俾錢。
小弟覺得慳得就慳,
都係唔入去。
不過手信都要買o既。
由於奈良公園+春日大社出名鹿,
所以連籤文都係用木刻o既鹿咬住,
盛惠500yen一隻。
堂然, 平平地你可以買普通o既籤o既。
小弟唔係求俾自己,
而係送俾人,
所以揀左鹿。
驚遊客睇唔明,
仲有英文版添~
仲有好多神社,
比較出名o既有下圖o既夫婦大國社。
同之前京都o既地主神社一樣,
都係求姻緣, 不過唔同o既係,
夫婦大國社係名正言順求正室o既夫妻和順,
同地主神社o既求桃花有少少唔同。
可以見到左邊, 遠處燈柱後面,
同埋右邊都掛滿心形o既絵馬。
睇就知幾有人氣啦。
直頭俾個箱你放入去算數......
下圖係另一個比較出名o既小神社,
叫金龍神社,
求o既好似係生意興隆, 財運亨通咁上下。
因為路線所限,
一定要行經番春日大社。
諗下諗下,
人一世物一世,
今次黎左下次都未必會再黎,
500yen就500yen俾錢入去睇下啦!
其實都係睇燈籠為主。
叫「林檎の庭」, 即係蘋果庭園。
雖然真正獻嗰個係佢個女,
但好似話睇番直江兼続o既文書,
應該係直江兼続交帶落叫佢個女咁做。
直江兼続係邊個?
都係日本戰國時代o既名將咁啦,
有興趣者自己查wiki啦。
http://zh.wikipedia.org/wiki/直江兼續
以為係春日大社o既本殿,
其實只係中門,
本殿係唔入得去。
但如果沿路行,
兜去後面,
可以透過圍欄睇到入面o既本殿。
睇到春日造(即春日式建築)特式o既交叉屋頂。
再行見到有間入面黑漆漆o既屋,
係模仿夜燈會o既情況。
然後出面又有好多燈啦。
走廊又係燈。
離開春日大社北上,
途中經過水谷橋。
水谷橋就係今晚放火燒山大隊會經過o既地方之一。
過左水谷橋,
再行前少少就會見到若草山,
就係今晚放火燒嗰個山。
呢個時候,
個天開始放晴。
太好了, 今朝仲擔心今晚會落雨,
放火燒山會改期添。
係放火燒山之前,
有一個好有趣o既活動,
其實唔係放火燒山o既官方活動,
而係由民間團體搞,
不過都搞得有聲有色,
講緊o既係「鹿せんべい飛ばし大会」。
睇到啲中文字都大概估到,
活動內容就係飛鹿煎餅!
不過用o既鹿煎餅比平時買到o既大,
直徑有30cm。
而且係公開的,
即報名即玩。
不過獎品一啲都唔兒戲。
冠軍可以得到真鹿角獎座一個。
(上圖左手邊)
而飛到唔同距離都會有安慰獎。
小弟見人玩就開心喇,
但因為仲有景點要睇,
所以告別若草山,
向東大寺出發。
但去得東大寺,
點都想由正門入,
所以先兜去南大門。
大家見到啲人o既size,
都大概估到個南大門有幾宏偉!!!
真係好有迫力!
而且全由木構入榫建成!
轉入側面買票之後,
入到去就會見到大佛殿(下圖)。
真係好大o既一個建築,
啲人就好似螞蟻咁細粒。
以前o既人真係得閒,
可以起到啲咁大座o既建築物......
東大寺除左出名在歷史同埋建築之外,
當然唔少得大佛啦。
大佛因歷史不斷o既兵災,
原本o既只得番零碎部件,
而家見到完整o既大佛,
係鎌倉時期及江戶時期修補o既。
東大寺o既大佛係世界上最大o既金銅佛像,
同關東鎌倉o既大佛並稱日本東、西兩大佛。
小弟有幸, 兩個都已經拜會到!
傍邊當然仲有其他觀音呀、神佛呀咁,
詳細唔多講喇。
係大殿右後方有一條柱,
地面部份有個正方形o既窿(30cmx37cm),
因大小近似佛像鼻孔,
所以俾小朋友穿過當作息災祈福,
不過而家多數人都係本住玩樂o既心態為主啦。
叫 「賓頭盧尊者」, 係釋迦弟子十六羅漢之首。
好似話摸下相應o既地方就可以治病。
不過小弟之見,
叫賓頭盧, 不如叫枯頭盧好似仲貼切=.=
睇完東大寺,
出番黎旁邊有條斜路上。
話晒都行左成朝,
本身都唔係好想再行,
不過反正小弟黎奈良都係行啫,
唔差在行多少少。
行到上去先知,
完來係有名o既三月堂、二月堂所在地!
三月堂o既相冇up上黎,
而下圖所見o既就係二月堂。
三月堂係東大寺現今保存歷史最久o既建築,
而二月堂就好似清水寺咁,
都係有個依斜坡而建o既舞台。
係二月堂望出去, 非常開揚,
好似話係度睇日落係非常好o既選擇。
雖然影嗰陣唔係日落,
不過影到太陽光係雲中透出黎,
都幾靚。
二月堂舞台上,
有個差唔年紀o既黃種人男性,
用頗純正o既英文叫小弟幫佢影張相。
咁小弟同佢影o既時候,
又用番啲扮晒純正o既英文口音同佢交流啦。
係交談之下,
原來佢都係香港人, 不過係澳洲長大。
係澳洲嗰邊搵到工搞掂晒,
以working visa 黎日本工作。
今日放假所以黎睇火燒山。
時間都已經係兩點幾。
同佢傾左一陣之後,
大家分道揚鑣,
佢去若草山踩吓場,
我因為已經踩過,
所以係若草山對開求其食個午飯。
就係下圖o既烏冬,
盛惠700yen......
慢慢食完個烏冬都已經三點左右,
行番出若草山,
啲人仲排緊隊飛鹿煎餅,
不過節目都差唔多到尾聲。
可以見到有一個火燒若草山o既指揮中心。
唔好以為燒山活動只係普通祭典一個,
所用o既人大物力非常多。
除左營運同警備之外,
最主要o既係消火員。
為左避免燒埋其他地方,
奈良唔同地方o既消防員都有派小隊出動,
圍住個山防止燒埋唔應該燒o既地方。
早起的鳥兒有蟲吃,
早咁多黎(六點先燒),
先見到營運負責人嗰啲o既祈福儀式。
就係用黎點火o既神器。
差唔多到四點,
主、協辦團體都開始忙起黎,
上圖可以見到消防員做準備。
安排周到o既活動,
當然唔會要啲觀眾白等啦。
係若草山有個舞台仔,
俾霸唔到位近距離睇火燒山o既人睇直播之外,
燒之前仲有文藝表演。
雖然過左冬至,
但日本o既冬天仍然係四點幾開始黑,
六點前就黑齊。
上圖係四點o既時候,
因若草山望番落奈良市方向。
彩霞真係幾靚。
上圖嗰隻野,
可以話係除左鹿之外,
另一奈良o既logo。
形像係生左鹿角o既佛=.=
因為咁樣惡搞大佛,
引起一啲人o既反感,
覺得係不敬,
所以呢個吉祥物初初面世o既時候,
都有唔少波瀾。
係營運o既帳篷後面,
有幾個燒住柴火o既油桶,
俾工作人員及觀眾取暖,
都真係幾周到。
唔係講笑,
小弟經過京都一遊之後,
今日都着左唔少衫。
上身:
長袖底衫+厚身樽領外衣+兩層防風防水外套+手襪
下身:
長內膽+牛仔褲
雖然係咁,
但四點幾離開柴火去霸位之後,
真係凍到HIHI
個身都仲OK,
但手同腳已經冇晒感覺=.=
早左兩個鐘o既關係,
好順利咁企係最前線!
上圖影嗰個,
應該係放火燒山時要點著o既篝火。
天越黎越黑,
人亦都越黎越多。
set 晒三腳架,
小弟當然都有帶備三腳架啦!
儀式祭禮o既大隊已經黎到若草山山腳,
可以見到興福寺、東大寺、同春日大社o既燈籠。
因為天黑o既關係,
ISO推到去2500先影得好。
(亦即係有兩碌野點火嗰個位)
唱經等儀式開始。
大家留意,
當時個天係仲未黑齊的!
一部份消防員上山準備。
唱左半個鐘經=.=
天都黑晒,
六點鐘終於開始行上山,
去到我霸位之後影嗰個篝火o既位置繼續儀式。
ISO已經要推到4000先影得好。
可以咁近距離睇到,
真係物有所值!!!
跟住由消防員點著火把,
走上山點火燒山。
法師吹響法螺,
煙花匯演正式開始。
係香港都冇親身睇過煙花,
現場睇煙花小弟都係第一次。
殺左小弟唔少菲菻。
(SOR, 應該係memory)
煙花足足放左十五分鐘!
回過神,
望向個山,
原來已經燒著左!!!
睇相好似冇乜野,
但現場o既聲、煙、同氣味,
再加上近距離,
真係好有迫力!
呢啲就係現場睇同隔左重睇o既分別。
甚至有時當信仰咁拜。
遠距離影番幾張,
所以開始落山。
離開左奈良公園範圍都仲見到。
其實要影火燒山影得靚,
並唔係咁樣近距離影,
而係要去對面山頭影番過黎,
大家可以上呢個網睇下人地影o既相~
http://www.kasugano.com/wakakusayama/photo/photo.html
補番少少來源。
火燒若草山,
係因為相傳每年唔燒一次就鎮唔住山上o既鬼。
而家燒, 主要係促進食物鏈咁上下啦。
當然, 旅遊觀光都佔好大部份。
有時都會諗,
究竟寺廟神社而家搞活動,
係真係拜祭o既心態丫,
定係吸引遊客o既心態呢~
沒有留言:
張貼留言