再去初詣

琴晚收到電話,

話今晚都唔洗番工,

所以計劃左再去第二間神社度初詣。

搭地鐵到天王寺附近,

再轉電車(類似香港o既叮叮, 不過得一層)。

大半個鐘左右就到達。

呢度又講多少少,

日本o既巴士、電車都係用車中間o既門上,

用車頭o既門口落客。

去到o既時候三點幾, 天開始暗。

今日仲要係年初三。

但神社仍然係鬼咁死多人=.=

  

未經過鳥居,

啲攤檔已經周圍都係.....

  

如果要經正門入神社,

就要經過一條超斜o既紅木橋。

  

望番轉頭,

可以見到有幾咁多人=.=

人龍一直去到門外.....

而前面亦都係車水馬龍。

通常入神社呀、寺廟之前,

日本人都會洗下手,

如果有個兜仔裝水o既,

就先用右手拎個兜裝水洗左手,

然後調番轉。

如果係好似下圖o既自動式o既就唔洗煩~

  

上圖左手邊有個牌,

示意有地方俾善信

丟棄舊年買o既破魔箭等物品,

(都係啲吉祥物咁上下啦)

大家見到的話,

唔好當係普通垃圾桶......

 經正門入廟內,

見到鬼咁多人圍住一間野,

以為做咩事,

原來大家都係圍住掟錢祈福......

  

行入少少,

再有一間類似o既建築物,

啲人又係圍住起勢咁掟錢,

然後祈福。

再行入去就係正殿。

當然, 啲人仍然係咁掟錢,

不過唔同o既係,

正殿入面真係有專人係度諗經祈福,

同埋有信眾俾錢入去入面接受祈福。

講緊入場最低消費係幾千yen,

我就當然唔會做傻事啦。

  

睇完人地掟錢,

自己都洗番少少錢。

先係俾200yen求番支籤。

十三號籤, 中吉,

內容? 都係啲可有可無o既野啦,

信不信由你。

同樣地,

如果抽到唔好o既籤,

啲人就會張支籤綁係指定o既地方,

又或者搵啲樹綁起佢......

如果好似我咁抽到中吉呀大吉呀咁呢,

就請閣下摺起佢放係荷包喇。

  

例牌做o既野,

除左求籤之外,

就係寫「絵馬」(E-MA)

即係許願木牌。

小弟都用800yen買左塊,

至於寫左咩?大家估下喇。

估中o既話番黎香港我請佢食飯!

我講o既!!!

(只限頭位答中者, 每人限估兩次)

神社當然唔會放過呢個

一年一度o既賺錢好機會,

除左求籤、絵馬之外,

仲有好多貴夾唔抵o既呃錢野賣啦~

成萬yen一支木箭(右手邊),

你話買唔買=.=

平o既都成一千yen。

至於御守り(O-MAMO-RI), 即護身符,

平平地800yen豪俾佢啦。

話晒都係working holiday,

所以買左個旅行安全。

因為人流管制,

只可以由則門出,

係另一邊出去o既空地,

見到更加多o既攤檔。

因為冇高地, 睇唔到一共有幾大,

但越行就越入,

感覺跟本就係維園o既年宵攤檔!!!

規模跟本同前日四天王寺o既冇得比!

有好多只有係動、漫畫先見過o既店舖檔攤,

今日終於親眼見到!

最老套o既面具啦。

金魚すくい(KINGYO-SUKUI), 即係撈金魚。

無厘頭o既射箭。

射的(SHATEKI),

即係用氣槍射粒木塞出去,

打跌o既目標就係閣下o既獎品。

輪投げ(WANAGE), 掟圈圈,

唔講都估到點玩啦。

呢個幾得意,

係用波掟跌啲玻璃碟,

不過以我所見,

冇乜生意=.=

好落本o既鬼屋。

新年流流玩鬼屋=.=

但又真係有人俾錢入去架喎......

福袋。

日本人會將年中賣淨賣唔去o既野,

(又或都係多左o既貨啦)

pack成一袋, 唔俾拆開,

大家就自行隨機挑選。

好彩o既話真係會買中貴價野都唔定。

其實各大超市、商場亦都會有,

不過市場取向、價格定位就梗會唔同。

甚至而家會有一啲講明入面有咩o既福袋=.=

咁o既情況, 講到底, 咪即係package......

甘酒(AMA-ZAKE), 「甘」即係甜o既意思。

日本人都會參拜完之後,

飲番杯熱辣辣o既甘酒暖身。

話就話酒, 其實都不含酒精,

又或者係極少。

小弟雖然冇參拜,

但都想試下甘酒係咩一回事。

飲落, 只係薑汁糖水(+薑蓉)一杯=.=

盛惠200yen。

估唔到土以其黎o既朋友都開番檔撈番筆,

見幾得意, 就用左500yen買番個黎食。

行到攰, 要睇o既都睇完,

搭番電車番天王寺專地鐵番屋企。