郵筒

可能言語上有啲誤會,
店o既人以為我今日請假,
琴晚放工o既時候話「後日再見」先知發生咩事。

因為已經安排左人手,
都冇得話唔放就唔放,
所以今日上午休息,
下午先番工。

話就話休上午,
不過其實時間都唔係好多,
唔去得遠,
二來突如其來, 都冇準備,
三來今日都冇乜慶典,
所以只係近近地去郵局寄野同辦銀行啲手續算數。



寄左啲手信去屋企咁啦,
因為唔急, 所以揀船便,
要寄兩個月=.=

不過一啲都唔貴,
一個18cm X 23 cm X 15cm o既盒只係100yen(平到爛),
重量約1041g,
運費只係1080yen!!!
即係1yen1g左右!!!!!

呵,
冬天過左之後,
等我一野寄晒啲冬天衫番香港先。
咁下半年就唔洗拎番多行里,
番黎可以再預先寄野,
咁就唔怕行里超磅。

之前都講過,
日本郵政有辦埋銀行,
而且服務流通量都幾高。
基於下下走去店度交電話費都幾麻煩,
於是去申請郵政銀行o既信用卡。
用該信用卡電話費扣數的話仲免年費,
申請同cancel都冇手續費,
正啦。

於是係一個靚女服務員o既指導之下,
填左張form就完成手續。
不過張卡要個零月後先寄到。

同香港一樣, 申請信用卡有野送,
有兩款揀:
洗衣粉等日用品,
或者係郵筒錢箱。

一向實際o既小弟,
十之八九都會揀日用品。
但心諗, 作為係日本生活+申請信用卡o既紀念,
於是就要左個郵筒~

近排寒流持續吹襲日本,
連平時唔係好落雪o既大阪,
今日都落左五分鐘雪,
當然規模唔可以話大,
但都密過上次,
終於影到相喇。