本身打算係房瞓下覺算,
但諗諗下, 難得放假,
就咁就過左好似好浪費咁,
於是臨時臨急就plan左去京都旅行。
一來因為plan得比較急啦,
二來平時番工都比較攰,
所以今日鬆鬆地只係去三個景點算。
主要係京都南部,
沿JR奈良線南下,
先係去伏見稻荷大社,
過兩個站去桃山城,
然後再落去宇治。
點知一早就出事喇=.=
預左七點起身的,
點知瞓過龍,
訓到七點九先起身,
結果去到伏見稻荷大社已經係十點鐘左右......
(本身打算九點到的)
之前o既BLOG都提過,
如果個神社有好多紅色鳥居,
(即係「开」字形o既牌坊)
十成九都係稻荷神社。
而除左多鳥居之外,
稻荷神社亦會有好多狐狸o既雕像,
因為日本人相信狐狸係稻荷神o既使者。
而京都伏見區o既稻荷大社,
就係日本全國大大小小稻荷神社o既總店!
更有出名o既「千本鳥居」。
(「本」係日語量詞單位)
但唔知點解好似冇乜旅遊書講伏見稻荷大社。
不過無阻小弟o既意志,
決定一覽千本鳥居o既真面目。
有時不得不讚日本仔o既心思,
連個車站都配合番個神社o既設計~
JR車站對面已經就伏見稻荷大社。
就會見到下圖o既拜殿。
然後後面就係本殿。
而伏見稻荷大社o既gimmick就當然係鳥居,
所以連絵馬o既形狀都係鳥居形。
要點寫? 自己花心思喇。
不過唔可以影相,
所以只好遠距離影過去。
橙紅同金色襯得好鮮豔奪目。
(「奧」即「入面」、「深入」o既意思)
不過入去之前,
小弟留意到一旁, 有人掟緊錢。
然後許願。
好喇,
開始進入千本鳥居o既世界。
係外面影都好好睇!!!
不過左右o既目的地都一樣=.=
「行完」之後會到達「奧社奉拜所」
當然唔少得狐狸形o既絵馬啦。
可以見到有唔少人發揮創意,
將狐狸「改頭換面」
但詳情唔清楚。
嗰啲細細個o既鳥居仔,
類似都係一啲祈福咁o既道具啦。
(當然要俾錢買!!!)
兩個石燈上面圓形o既石頭都係搬得郁o既,
叫「おもかる石」(OMOKARU-ISHI)
直譯就「重石」啦。
話係先投弊許願,
然後捧下舊石,
如果舊石比想像中輕的話,
願望就會達成,
如果比想像中重的話就哇哈哈喇。
小弟都玩過下,
本身打算正正常常許個願。
但諗諗下, 都係唔好搵呢啲野教飛,
於是許左個無傷大雅o既願就算。
結果係!?
同想像中差唔多,
咁即係點!?!?!?
點解頭先要括住「行完」千本鳥居?
因為原來仲有的......
唔好見上面得四張相,
其實已經行左廿分鐘......
然後突然豁然開朗,
雖然唔係屋舍儼然, 有良田美池桑竹之屬,
但雖不中亦不遠矣。
只見山中有一湖泊, 環境清幽。
稍事休息, 再行起程。
都係啦, 同其他神社一樣,
一個大神社入面仲有好多小神社,
滿足唔同人o既希望。
下圖熊鷹社就係其中之一。
然後又係鳥居=.=
小弟太睇小千本鳥居!
原來千本鳥居唔係講緊一條路,
而係「一個山頭」所有大小路都係鳥居!!!
因為都差唔多樣,
所以唔多放相上黎,
但上兩張圖,
已經包含左十五分鐘山路o既光陰!!!
行左幾遠路!?
睇吓下圖咪知囉!
可以睇到成個京都=.=
然後,
繼續行......
行五分鐘之後,
就到達下圖o既「二之峯---下之社」
再行五分鐘,
就到達中之社。
更正,
其實小弟唔係行,
而係半跑咁上山=.=
所以慢慢行的話時間應該double......
雖然話係尾站,
其實呢個山頭係一條環形路,
兩邊上山都得。
証據係小弟「落山」o既時候,
見到o既係鳥居o既背面。
(背面刻有鳥居捐贈者o既名同日期)
但已經係用左半個鐘全速跑番落樓門o既過程......
不禁令小弟諗番起去年行張家界o既苦況。
本身仲諗住今日係「慢」遊京都,
點知半跑上出,
全跑落山之余,
落得山已經係十二點半!!!!!!
先祭五臟廟先。
求其係間小店食左個ざるそば定食,
是為920yen......
另加800yen......
總括黎講,
如果鐘意睇古蹟o既朋友,
不妨去宇治之前經一經稻荷站睇稻荷大社,
但除非閣下好鐘意行山,
又或者係好多時間,
如果唔係小弟建議大家唔好行到上咁高,
行到去奧社奉拜所,
又或者係入少少o既嗰個湖已經好夠。
食完個唔係好抵o既蕎麥麵+關東煮之後,
就搭車繼續南下兩個站到桃山。
桃山城又係一個旅遊書冇記載o既地方,
其實小弟會黎,
都係因為琴晚睇地圖o既時候,
見到順路, 所以先過埋黎睇。
出左JR桃山站向東北移動,
沿住上山o既馬路行十五分鐘就到。
講就好似好輕鬆,
但唔好唔記得小弟頭先跑左成朝山=.=
而家攰到HIHI......
桃山城係豐臣秀吉隱居之所,
起係桃山係因為該地連接奈良及京都,
是為軍事要點。
後來幾番戰亂, 被完全焚毀,
再由德川家康重建,
到最後德川家決定廢城,
將其材料運到其他地方起城池、寺廟......
所以而家o既桃山城,
係係1964年重建的。
而家桃山城附近有啲球場呀咁,
成為左伏見桃山城運動公園。
一路行都已經發覺有啲唔妥,
因為沿途除左高尚住宅之外,
基本上係冇乜人黎參觀的.......
除左呢個城係後期模仿興建之外.
行到去城度, 終於明白另外一個原因......
城內係唔開放的,
只可以係城外觀看=.=
於是用左180yen搭兩個站黎,
行10分鐘上山,
係城外圍一圈影相10分鐘,
行番8分鐘落山搭車走人...........
第一次係日本,
覺得去一個「景點」係浪費時間的......
(仲有車費)
半個鐘唔洗KO左桃山城,
然後再花190yen搭JR到宇治。
唔洗多提大家都可能認識宇治,
因為宇治出名抹茶。
出左宇治駅會見到有一個宇治觀光案內所,
裏面除左有唔同名店o既抹茶制品之外,
最重要o既係有免費地圖提供。
小弟當然拎番張啦,
唔係貪心, 而係真係有需要。
因為其實有認真睇過旅遊書o既朋友,
可能都已經發覺,
由於篇幅有限,
介紹o既都係一啲超級大路o既地方、店舖。
如果真係想認真旅遊的話,
去到當地, 拎一張地圖研究一下係好重要的。
過左馬路會見到一個好靚o既牌坊,
上面兩個公仔著住日本平安時代o既服飾,
陣間再講點解。
唔洗審都估到沿呢條路行實冇死。
冇錯, 行入去轉左,
行冇耐就會見到宇治橋呢一個地標,
再出發去平等院等等非常易認。
宇治橋係日本最古老o既橋,
(橋前面嗰個木牌係咁寫架)
係六四六年首次建成。
咁當然啦,
大家而家見到o既紅毛泥車輛使用緊o既,
係重建後o既橋啦=.=
係宇治橋前面有一個女人石像,
正如圖片所見,
個女人叫「紫式部」(MURASAKISIKIBU),
基本上係日本冇人唔識佢。
平安時代, 京城由奈良遷都京都,
貴族文化以宇治為中心黎發展,
而紫式部就係當時o既人。
紫式部最出名o既係寫左一部長54篇o既《源氏物語》,
係世界歷史上首現o既長篇文學作品。
由於紫式部係參考當時宮廷實況黎寫《源氏物語》,
所以除左文學意義上之外,
對於歷史研究亦都好有幫助。
由於《源氏物語》o既舞台係宇治,
如果大家睇過《源氏物語》黎遊宇治,
可能樂趣更大。
(小弟當然係-------冇睇過=.=)
從宇治橋向東南行,
就會進入平等院o既表參道。
(「表」即外面, 「參道」即係參拜o既道路)
一開始已經係手信店。
因為宇治出名抹茶,
所以幾乎所有手信店都係以抹茶制品為招徠:
抹茶團子、抹茶蛋糕、抹茶布甸、抹茶朱古力、
抹茶雪糕、抹茶蕎麥麵、抹茶煎餅、抹茶糖,
基本上你諗得出o既都有=.=
店員勁爆殷勤,
只要你一行埋去,
佢地就會俾一串兩粒o既抹茶團子你試食。
都仲未食完,
佢地又會俾第二、三樣野你試食.......
真係就算你本身唔想花錢,
都唔好意思唔買。
不過意外地抹茶團子超好食。
以前食過o既團子可以分兩種,
一種係冇味, 另一種係甜到你食唔到咩味=.=
但抹茶團子甜味啱啱好,
而又食到好香o既抹茶味。
有好多唔同o既包裝啦,
不過小弟小試一串先,
四粒一串為70yen,
絕對係物有所值。
(當然你厚起面皮食佢兩串試食慳番70yen添)
各位看官有機會都要試試。
(唔係叫你試下拎人地兩串試食=.=)
不過其他店o既團子係咪都係差唔多味就唔知喇
一路行入去平等院都有好多手信店,
不過而家唔急買手信住,
睇完平等院番轉頭先慢慢睇。
世界文化遺產---平等院
係1052年建成, 最為人認識o既,
應該係佢o既主殿「阿彌陀堂」(即「鳳凰堂」)。
同埋堂上面嗰兩隻銅鳳凰。
經歷戰火、祝融等,
留低o既得番鳳凰堂、觀音堂同鐘樓。
不過已經好夠!
小弟唔係歷史學家或者係佛學家,
但見到鳳凰堂都覺得好特別,
同埋feel到嗰種歷史o既歲月同份量!
入場費600yen,
已經包埋博物館o既費用,
不過如果想入鳳凰堂參觀的話,
要係入口入左去之後嗰個小亭度俾300yen報名,
廿分鐘一節30人輪流入場。
小弟決定睇埋個博物館先。
係鐘樓下面有一個入口,
一入去係一個好cyber o既博物館,
完全唔會覺得外面係一個世界冲化遺產......
(P.S. 館內嚴禁攝影)
入面當然係講平等院o既歷史呀,
同埋啲佛像o既details咁啦。
因為入面提供o既資料同展品真係非常足夠,
所以小弟最後決定唔花300yen入鳳凰堂。
睇完平等院,
出番去係時候買手信。
點解黎左日本咁多次&咁耐,
而家先黎買手信?
因為小弟唔係好鐘意買啲無聊野。
啲裝飾呀、匙扣呀、公仔呀就最阻地方+冇用,
但宇治出名抹茶,
有地方特色之余起碼食得先啦。
其實都冇特別跟旅遊書,
只係求其見到邊間舖合眼緣就入去。
不過結果都係入左去家名店入面=.=
叫「伊藤久右衞門」。
買左成萬yen......
望向東南面會見到河中間有個島仔,
仲要有個人釣魚添,
都幾寫意。
下圖係由中間個島望向宇治橋。
唔洗計流體力學,
大家都會估到啲水流有幾急,
都唔知點解 梶原景季 同 佐佐木高網,
可以騎住馬係水中交手......
感覺應該同劉備騎住的盧涉水較腳嗰幕差唔多。
從平等院嗰邊過對面岸就已經即刻係宇治神社,
就係上圖鳥居嗰個地方。
望向上游,
如果係春天或者係秋天,
景色一定會更靚!!!
宇治神社對面又有個石像啦,
睇石上刻o既字,
似係講緊《源氏物語》第十話o既一幕。
唔理咁多,
入宇治神社睇下先。
其實冇乜野睇=.=
因為真正o既主角,
係向山上行多五分鐘路o既世界文化遺產:
宇治上神社。
一來時近黃昏,
二來冇乜人,
三來依山而建,
宇治上神社俾小弟一種詩情畫意o既感覺。
宇治神社同宇治上神社o既神籤都係兔仔形狀,
宇治上神社好好心咁預備左一啲print out,
(上圖右下角)
俾遊人免費閱覽,
解釋點解會用兔仔形狀,
同埋講解神社內其他要點,
不過只有日文version。
好似話以前宇治唔係寫做「宇治」,
而係「菟道」, 其余o既唔洗多講大家都估到~
每年1/9作一作法整兩堆沙,
然後大家想保家宅平安,
就花百零二百yen買番包番屋企,
係花園氹氹圈洒咁啦。
(香港星斗市民何來花園=.=)
其實頭先稻荷大社都有。
而係叫桐原水o既泉,
俾大家洗手用,
不過唔可以直接飲。
旁邊有一舊大石,
上面有好多小石。
好似話舊大石係代表神社o既「社跡」,
而小石係啲人許個願然後放上去的。
同拜殿(即係有兩堆神沙嗰個)同為世界文化遺產。
宇治上神社o既誕生並冇清晰記載,
但經過科學鑑定,
本殿係係1060年左右建成,
係現存最古老o既神社建築。
係上宇治神社o既一角,
都有一個小小o既稻荷神社。
雖然宇治上神社好似冇乜野好睇咁,
地方又唔係大,
但如果大家唔係真係太趕的話,
不妨到來感受一下靈氣,
睇下呢個最古老o既神社。
五點幾,
神社o既神官?都已經收晒工,
要睇o既野都睇完,
都係時候走人。
向晚意不適,
驅車登古原。
夕陽無限好,
只是近黃昏。
因為約左人係駿河原食野,
搭JR唔係好方便,
所以係河o既東北岸搭京阪電車走人。
係袛園四条同HKY小姐會合。
本身話去食1000燒肉放題,
(「放題」即「任食」)
不過HKY小姐話琴晚食左麻辣火鍋,
今日個肚唔係好舒服,
所以去左一間超平o既意大利菜快餐店食野,
再叫埋個drink bar(即係任飲),
六點幾食到九點幾先走人。
好食唔係話好好食,
但真係超抵食!!!
好,
講下今日o既戰利品先。
係抹茶蛋糕。
抹茶o既香味就夠喇,
不過口感略嫌鬆散乾身,
另外如果可以甜番少少會仲好味。
抹茶餅乾夾住抹茶朱古力,
唔睇價錢的話都幾好食。
抹茶煎餅,
香口鬆脆又唔太貴。
係雀巢同伊藤久右衞門合作出品,
宇治限定o既KitKat。
以日本生活指數唔算貴,
不過真係好好食~
另外仲係駿河屋買左一set 6個抹茶布甸,
好好食!!!!!!
ANYWAY,
今日洗費超高=.=
唔計買手信,
都用左成9500yen......
睇黎今個月唔可以再出遊......
如果唔係真係租都交唔成......
沒有留言:
張貼留言