EQ

呢幾日係咁俾嗰兩條藤(加藤+進藤)噴。

可能因為一來新店嗰邊工程延期,
打亂左佢地好多野;
二來佢地要顧兩邊比較忙燥底左,
三來佢地急住要我學晒啲野,
所以勁唔好老脾。

再加上日本人勁認真到過晒龍,
(聽就聽得多, 呢幾日真正感受到)
成日俾佢地捉到啲細眉細眼野,
郁啲就勁惡咁鬧。

不過好在小弟早已練成金剛不壞之身,
正如前幾日o既BLOG所講,
你鬧我當旁觀(當然有錯要改啦)
而且仲會覺得對方咁辛苦鬧人好好笑。
(盡量唔笑出聲)



有咩咁好笑?
俾各位看官兩個例睇睇



e.g. 1
問「你講丫, 點解會搞成咁!!?」

答1 「......」            --->「叫你講呀, 做咩唔出聲呀!!!」
答2 「因為XYZ...」--->「我唔要聽籍口!!!......」
答3 「唔係好知」  --->「你自己做o既野都唔知架咩!!!?」



e.g. 2
問「你究竟知唔知要點做!!?」

答1 「知」    --->「你真係知!!? 知你就唔會做成咁啦!!!」
答2 「唔知」--->「唔知你又唔出聲問!!?」
答3 「......」  --->「問緊你呀, 做咩唔出聲呀!!!」



以上o既例子係咪好搞野呢,
BAD ENDING 100%,
難過任何一個溝女GAME o既對答選擇,
勁過SCHOOL DAYS o既結局!!!



當然, 俾人鬧, 氣氛唔多好,
就實有少少唔開心o既,
不過俾人鬧都有一樣好,
就係時間好快過。

一來要花精神理解,
二來俾人鬧都係交談o既一種,
三來叫做有啲野做吓。

好似今晚咁,
俾兩條藤輪住找錯處黎鬧,
一晚七個鐘,
好快就過左,
然後番房睇動畫~~~



其實「鬧」係世界上最低效率o既溝通方法!
(夏金城o既歌詞仲比較有效率=.=)
因為被鬧o既人一定會有抗拒o既心態,
就算道理正確, 都不被接受。
二來, 鬧人嗰個又努氣,
加上怒火會令人失去條理,
想表達o既野都表達唔到。



anyway

都係嗰句啦,
你鬧我我當唱歌,
(當然有錯要改)
唔据就炒我搵過第二份工
XD