半

31/3,
以小弟o既計劃黎計,
樂觀啲睇:
打工o既日子已經過左一半;
悲觀黎睇:
打工o既日子仲要捱多一半......

之前都講過,
番五日工o既體感時間,
就好似過左兩個星期咁......
照咁計,
三個月對小弟黎講就好似要過九個月咁=.=
仲要捱多九個月......

回顧番,
其實份工唔算係太辛苦,
反而舒服左,
因為由本來一日番12個鐘,
變成而家一日番10個鐘左右。
不過要煩o既野多左,
成日要計住啲食材夠唔夠......

另一個問題就係出糧。
出糧永冇話準時=.=
不過睇個勢, 係有拖冇欠嗰隻。
而小弟當然亦為免佢拖得就拖,
耐唔耐就拖加壓力俾佢叫佢出糧。

遊玩方面,
玩就玩得唔算盡興架喇,
不過京都同奈良主要o既景點都去過晒,
都算係無憾架喇,
而家展望o既就係四月中旬賞櫻可以順順利利咁啦。
其餘五、六月都冇乜特別地方想去,
到時再慢慢plan。

望就望黎緊三個月順順利利咁過啦......

咒怨II

琴晚大老闆黎隊酒,
都估到唔慌有好野,
仲要隔幾個舖位o既拉麵店老闆帶埋一家大細,
過黎食野, 同大老闆吹水。

本應十一點收工,
佢地就傾到2340先走。

好啦算,
執野收工。

執執下野,
可能因為見到間舖燈火通明,
一GROUP六條友,
睇都唔睇清楚就衝左入黎。
當時都執左九成野,
陸麵機都放晒水洗乾淨左,
加上小弟又想走呢。
於是同佢地講間店開到十一點。

點知可能大、細老闆走唔遠,
見到有班人係門口,
即刻過黎話照做生意......

我^&*#^&^%@#*佢個#@$#($%^*&$!!!!!

班友say晒sorry話食完就即刻走,
結果成左成粒鐘......

最$#&@#%o既係,
又有一條茂李係十二點半衝左入黎


#$%^@#$^%$&!*%^*@&#%$@*(&@#)#&$@R#$

結果搞到成點幾鐘先走得。

小弟由心底裏咀咒嗰班人=.=

你老闆

本來今晚應該好HAPPY同細老闆娘拍檔,
點知細老闆無所事事,
帶埋啲豬朋狗友黎食野。
都算,
擺起個老闆款,
大大聲係食堂叫我由廚房出黎,
又話枱面水壼啲水裝得太滿,
又話啲醬油太少冇添補......

$%^#@^%$@(#

算~
小弟睇得開,
受人二分四,
你發癲我當你精神病~

又一日

諗黎諗去,
結果都係冇乜野寫,
用番呢個標題......

差唔多到櫻花開o既時間喇,
小弟亦都開始密鑼緊鼓,
計劃下幾時幾邊度賞櫻。

杯麵

今日中午特登留肚,
番完上晝嗰更之後番房,
慢慢品嘗琴日整嗰個杯麵。

正如琴日篇blog所講,
其實除左可以係個杯上面畫公仔之外,
其他野係冇乜特別的。

不過即管品嘗下係香港冇見過o既蕃茄湯底。

一來小弟加得水少啦,
二來可能幫我落粉嗰個姐姐重手左,
個湯底都幾濃,
不過啱晒重口味o既小弟XP

得呀LY先生提醒,
食完之後洗番乾淨個杯黎留念=.=

即食麵記念館+寶塚歌舞劇團+手塚治虫紀念館

琴晚總算收番足一月份o既人工,
(=.=拖左成個月咁濟)
經濟上鬆動好多,
再加上成個月足不出戶都唔係辦法,
所以今日近近地係附近行下。

話就話近近地,
其實已經離開左大阪府,
去到東北面o既兵庫縣......
距離上我諗就好似由赤柱番深圳咁上下啦。

右下角打星o既就係小弟住o既地方,
左上兩個圈住o既市名就係小弟今日去o既地方,
留意左下角把尺o既單位係似5KM計算......

九點起身,
搭地鐵到東梅田(310yen),
再轉阪急到池田(260yen)。

因為梅田係總站,
所以一個超大o既月台,
排左好幾架火車。
可能歐洲等外國唔少呢種月台,
但呢種情況小弟咁大個人都係第一次見,
覺得幾特別,
所以就影低落黎。

第一站係池田市池田駅附近o既Instant Noodle Museum,

員工用膳

之前都講過,
同細老闆娘當夜更o既時候,
佢會時唔時自己買料整晚餐,
一來成日食拉麵都食到驚,
二來佢當打發時間。

當然佢唔會淨係自己整自己食,
而係整埋小弟嗰份。

都食過佢唔少野,
お好み焼き、咖喱烏冬、
蕎麥麵、炒麵飯等等,
而今晚係散らし寿司,
即係飯上面舖魚生等壽司材料。


已經係可以拎去賣o既程度=.=

不過好o既日子唔會長......
因為好似話四月開始又會轉運作模式,
細老闆娘如無意外都唔洗再番拉麵店幫手......
(T_T)

隨之而來o既係大老闆 （ﾟдﾟlll）
OH FXXK!!!

熱水

夜晚番到宿舍,
第一件事當然係沖涼先啦。

除晒衫入到沖涼間,
噢, 調轉左添,
入到沖涼間除晒衫,
開熱水喉,
點解放左咁耐水都仲係凍水?

唔係路,
焗住著番衫,
去其他沖涼間試水,
都係一樣!!!

肯定係熱水器有問題啦!!!
OH FXXK!!!

小弟唔係有潔癖,
而係一來唔沖過涼瞓唔安落,
二來番左成日拉麵店,
點都會有陣味=.=

結果唯有硬住頭皮沖凍水涼 (>﹏<)

小弟夏天天熱o既時候都會沖下凍水涼,
但冬天沖就真係未試過。
雖然日本開始步入春天,
不過沖涼嗰時,
小弟住嗰區氣溫得6度,
洗手都覺得隻手凍到痛,
更唔好話用黎沖身......

結果用最短o既時間,
用最少接觸凍水o既方法,
嗱嗱聲沖完閃。

冬天沖凍水涼,
真係好玩=.=

雜談

特首:

近排香港最多人關心o既,
都莫過於新一屆特首o既選舉。
(雖然唔係香港人選=.=)
小弟身在異邦,
不過日日都有睇YAHOO新聞。

兩個主要o既候選人,
(何生唔好意思)
兩個都多負面新聞架喇,
不過小弟個人主觀,
對梁比較有好感。
話晒一隻奸o既狼,
都好過一隻龍年o既豬=.=

ANYWAY,
選邊個都唔係好關香港人個體o既事,
但為都唔係一人一票選出黎......
不過的確今年展示出,
民意對呀爺o既決定都有一定o既影響!



頭條新聞:

單車 II

之前買左單車,
就當然用單車番工放工啦。

有左單車真係方便好多,
雖然話由宿舍行五分鐘就到拉麵店,
踩單車唔會話快好多。
但坐係度踩兩踩就到目的地,
同用兩條腿走路, 真係分別好大。
另外, 放左工仲可以兜遠少少去超市買野食呀咁,
都唔會話花好多時間。

你老闆

琴晚大老闆又走左黎。

真係你老闆,
黎親都冇好野,
今晚又係度研究新菜式......
搞一大輪之後,
又係要小弟執手尾,
搞得黎都成十二點=.=

小弟只係想準時放工啫......

日記

好似漸漸,
魷日記變左捱日記咁......

琴晚同屋企人講電話(SKYPE),
佢地叫我唔好寫啲「又一日」呀、「渡日如年」呀
咁負面o既野。
叫我寫番啲地道野呀,
文化野呀咁。

但真係冇乜野好寫lei,
要寫o既都係十二月、一月嗰時寫左好多=.=

大家忍耐下啦,
過埋下個星期,
小弟會開始出動去觀光架喇,
到時會UP好多相上黎架喇,
請大家繼續支持!

單車

本來話shift假的,
不過可能唔夠人手,
而又要放假o既情況下,
唯有用「定休日」黎解決。
即係全店逢星期X放假咁囉。
本店就定左係星期一放假喇。

之前仲PLAN晒點賞櫻添。
而家唔係賞唔到,
不過要再由頭PLAN過,
同埋有少量地方未必去得到咁囉......

ANYWAY,
今日放假,
話就話為免洗額外錢,
所以唔出遠門,
不過事實上今日洗o既錢都唔少=.=

本身早上去剪頭髮的,
不過間睇落比較平o既剪髮舖休息,
咁啱原來佢定休日都係今日=.=

行去遠少少o既超市途中,
會經過一間單車舖,
就係之前話見到3500yen二手單車嗰間。

其實小弟時唔時都會留意下有冇平單車,
但一直都冇乜啱心水。
今次見到一架, 冇3500yen咁平,
要4500yen,
但顏色係小弟喜愛o既藍色,
而且睇落絕對比上次嗰架美觀,
所以稍作思量之後,
就決定買喇。

都預左一闊三大架喇,
淨係買單車咩。
仲要鎖車家嘛。
再考慮埋晚上收工天都黑,
於是再加埋燈。

另外, 日本單車有樣野叫「防犯登録」
睇字面都估到,
即係登記左你架車,
俾人偷左之後,
警察會憑住單車後尾冚個number幫你搵番。
當然搵唔搵得番又係另一回事啦。

單車4500yen,
燈1200yen,
鎖1200yen,
防犯登録500yen,
不過稍稍講價,
6600yen交易,
都算係咁啦。

日圓

而家小弟o既生活超有規律,
對於上班族黎講可能唔係咩新聞,
但對於小弟黎講,
咁有規律o既生活,
係自中學以黎o既事情......

早上十點起身,
十分鐘刷牙洗面,
然後月十分鐘上網睇下新聞,
20分出門口。

兩點幾三點番到房,
hea一陣上下網咁,
三點幾訓番陣,
然後17:20再出門口番舖頭。

夜晚十一點幾十二點番到房,
沖完涼睇動畫,
兩點至兩點半訓......



講番正題。
番工前睇yahoo新聞已成習慣,
除此之外仲會睇下yahoo搜尋o既十大,
今日見到有「日圓」。

日圓插水......
差唔多跌番去海潚前o既價......

唔知小弟係日本番到香港,
日圓會跌到去邊呢......

P.S.
好奇怪點解唔係「日元」而係「日圓」呢?
有冇人可以解答一下。

又一日

明明星期一先放完假,
番到今日都只不過係番左五日工啫,
但唔知點解體感時間就好似過左三個星期咁......
令小弟諗番起A Level時上英文堂o既感覺......

渡日如年

今次係第二次用呢個標題。

上次渡日如年係因為冇野做,
悶到嘔電, 所以覺得時間過得慢。

今次渡日如年,
係因為開始對呢份工厭倦,
唔想做, 所以渡日如年。
不過為左光輝o既將來,
唯有頂硬上啦。

雜項

定食:

係無啦啦o既情況下,
今日拉麵店換左菜牌,
除左啲拉麵減左少少價之外,
(680yen-->600yen)
仲多左樣野,
叫「每日定食」。

個問題係,
每日定食有啲咩野食都未定=.=
細老闆係咪腦殘架!?

ANYWAY,
中午俾減左吸引入黎o既客人的確係多左啲。



ネギま！:

新紀錄

今日又係冇乜野好寫o既一日,
不過拉麵店又刷新左紀錄,
晚上得兩個客......

好似話聽日開始啲野食會減價,
由680yen一碗減到600yen一碗。

我唔洗佢太忙,
亦都唔好靜到要倒閉,
夠養我直到六月就OK架喇=.=

生日禮物

收到香港幾個FD寄過黎o既生日禮物。

其實應該到左兩三日,
不過小弟又冇為意,
管理人又唔記得放MEMO係我個郵箱。

久遺了香港郵政o既奇怪藍綠色搭紫色字樣,
但而家係小弟o既眼中,
呢個咁九唔搭八o既顏色配搭,
竟然變得那麼的和諧=.=

又放假

一週一日假o既承諾仍然生效,
上星期二放完之後, 今日再放。
其實呢兩日都唔係小弟選擇,
因為呢個更表一早已經篇好左,
不過為左黎緊賞櫻,
所以三月尾至四月頭o既假期已經遞交,
希望真係可以如小弟所願咁放啦。


ANYWAY,
因為冇乜祭典, 又冇乜地方想去,
所以今日除左交電話費、
食LUNCH同買晚飯o既材料之外,
都係屈係房裏面,
打下機、上下網咁又一日。

本來前幾日話暖番啲,
點知琴日開始又凍番,
今日本身天文台話好天,
結果兩點鐘嗰時落左十分鐘雪=.=

好彩冇信佢講,
如果唔係留番今日先去大阪城公園賞梅,
就真係唔慌唔霉.....

雜談

包食:

一來女人怕肥啦,
二來成日食拉麵都會厭,
所以基本上而家細老闆娘落場,
好多時都會自己帶材料煮晚飯,
當然會煮埋我嗰份啦。
於是呢排晚餐都唔怕悶,
食得都唔錯下。

感覺上晚上o既拉麵店,
好似變左私人廚房咁......

大阪城公園

今日利用中午落場嗰三個鐘,
搭地鐵去大阪城公園賞花。

當然而家天寒地凍,
未咁快有櫻花住啦,
預計今年關西地方o既櫻花,
會係三月中至四月中開。

小弟今次係賞梅, 而唔係賞櫻。
大阪城公園種左植左1270棵近100個品種o既梅花。
本身打算趁琴日星期五唔會好多人去睇,
點知琴日落雨,
只好黎番今日星期六同人迫......

唔到過大阪城公園梅林,
都唔知原來梅花都有咁多品種同顏色。

ANYWAY,
唔多講, 睇相啦。

做老闆真好=.=

係度搞清楚一件事,
經過多方打探之後,
發現原來係冇大老闆的。
嗰個散發住大老闆氣場o既人,
只係細老闆o既朋友,
教細老闆點做拉麵店。
所以由始至終都只係得細老闆一個老闆。

不過為左方便唔係日日睇小弟BLOG o既朋友,
之後仍然叫細老闆做細老闆。



基本上而家一、三、五、日晚,
都係細老闆落舖幫手。
(其餘日子係細老闆娘)
不過條友, 與其話係幫手,
不如話係黎倒亂......

又一日

「又一日」將會係黎緊用得最多o既標題,
因為真係冇乜野好寫。

今日全日加埋都唔夠廿個人,
淡得很=.=
好似一踏入左二月就淡左好多,
點解呢?

今日唔知點解成日都哼住同一首歌,
比小弟年紀大o既人,
好多都應該聽過,
首歌叫「What a Wonderful World」

又一日

一星期有一日假放o既打工,
總算叫做冇咁難捱。

就好似以前番學咁,
「星期日放完假,
　星期一精神飽滿咁番學,
　星期二開始跌watt,
　到星期三頂唔順o既時候,
　見仲有兩日就星期六就會有番啲幹勁,
　星期四期待星期五,
　到星期五就係happy friday!!!」
咁o既感覺。

ANYWAY,
仲有四日就再放假了!!!

真係好佩服啲人可以一年365日都番工=.=

放假

正如琴日所講啦,
因為幾個原因,
所以今日放假都冇特別去邊。

反正得閒,
於是去AEON買餸o既時候,
順便影下啲平時唔會影o既相咁啦。

拖糧

仲記得1/3同細老闆攤牌件事嗎?

當時細老闆話因為冇現金,
所以出唔到糧住......(應該係二月尾出)
不過就實牙實齒咁
保證一月o既糧會係三月分階段出,
同埋話一個星期保證我有一日假。
而第一階段o既50000yen,
deadline就係今日。

唔係話小弟真係會信佢,
而係啲錢係佢手,
做細o既仲可以點。

今日開始小弟老過譚詠倫

因為之前某人八掛加上手多多o既關係,
係拉麵店個月曆上記低左小弟o既生日日期。
細老闆娘同細老闆見到,
就話5/3晚放左工請我去食飯慶祝。

一)
你有錢請我食飯,
倒不如準時出糧俾我仲好!!!
二)
同老闆食飯,
只有應酬o既氣氛,
點會係慶祝丫......
三)
放左工都成十一點幾,
唔好玩啦,
我情願番房瞓......

本來都諗緊點樣推左佢架喇。

雛祭り

三月三係日本o既「雛祭り」(HINA-MATSURI),
簡單黎講就係為女孩子慶祝o既兒童節啦。
而男仔o既慶祝係五月五。

本身係農曆o既節日,
不過日本明治維新之後,
將所有節日都改晒去西曆(包括七夕),
所以雛祭り都唔例外。

三月三唔係日本法定假人,
但家人盡量都聚首一堂為家中女孩慶祝。

雛祭りo既來源同歷史小弟懶得講喇,
有興趣大家就WIKI一下啦:

http://zh.wikipedia.org/wiki/%E5%A5%B3%E5%85%92%E7%AF%80 

玉華園

京都HKY小姐o既母親黎左日本探佢,
之前問我有冇野想要,
於是托佢媽媽幫我買兩本旅遊書。
而我媽媽亦都托佢媽媽帶野俾我,
咁啱HKY小姐今日黎大阪,
於是順道俾野我。

約左三點半左右係難波會合。
咁啱今日早更係黑田,
而黑田又住難波附近
於是兩點幾放左工之後,
黑田就車我去難波,
慳番程車錢。

三點左右到日本橋,
HKY小姐仲有排都未到,
於是行下日本橋,
順便食埋個午飯。

去到一間叫玉華園o既中國餐館,
亳不猶豫就走左入去。

攤牌

ANYWAY,
琴日因為人工o既事,
心情超差。

今日本來打算攤牌辟炮唔撈架喇。
都唔係打算,
直頭進行左。