瞓唔夠三個鐘,
0545就爬左起身,
為o既就係去京都嵐山賞櫻......
要好好珍惜呢半日膽粗粗請番黎o既假,
不過天公不造美,
今日全日落雨,
仲要落得唔細吓......
先搭地鐵到 東梅田,
再行去搭阪急到 桂,
再轉車到 嵐山駅。
一埋到站, 都未落車
已經見到好靚o既櫻花。
一出車站,
又係一片花海!!!
揀搭阪急,
除左因為比較平之外,
仲有係因為阪急嵐山站o既位置。
如果搭其他鐵路到嵐山,
要到賞櫻聖地中之島公園,
就要專登行過去,
但如果搭阪急的話,
就好順路咁經過。
過左上圖o既小橋,
就到桂川中間o既小島---中之島公園。
下圖開始就係中之島公園o既櫻花。
就會見到嵐山o既標記---渡月橋。
渡月橋之所以叫渡月橋,
係因為鎌鎗時代o既亀山天皇,
見到月亮係橋上移動,
好似個月亮過河咁,
(冇病下話=.=?)
所以叫渡月橋。
當然啦,
以前o既渡月橋唔會有馬路......
就係桂川o既上游。
霧氣繚繞,
甚有氣氛。
過左渡月楀,
就正式到達名為嵐山o既地域。
黎到嵐山,
第一件事唔係買手信,
又或者係睇古蹟,
而係去搭火車......?
呢個亦都係小弟咁早爬起身o既一個原因。
トロッコ係嵐山o既觀光小火車,
由JR嵯峨駅到亀岡,
每小時一班,
頭班係早上0907。
(點解咁零丁?)
為免同人迫,
有咁早得咁早搭頭班車係唯一o既解決方法。
先到counter買車票,
車程約半個鐘,
單程600yen,
來回飛平少少。
不過小弟買單程,
因為去到亀岡,
可以坐船沿桂川落番嵐山。
坐船比較貴3800yen,
連接駁巴士要4200yen(由車站駁到碼頭),
不過人一世物一世,
唔坐又點得呢,
加上小弟咁早爬起身,
坐船係一個好重要o既原因:
船程約兩個鐘!
買完火車飛,
對面就係船飛o既counter,
一站式服務~
去到counter,
只要出示單程o既火車飛,
靚女姐姐就會幫你選擇相對應o既出船時間,
然後俾一條紙仔你填名、地址,
係要黎for 坐船o既保險的。
(費用已包, 唔填唔得)
建議大家要坐小火車的話,
最好早半小時到,
因為購票、填表需時。
夠鐘就要上火車喇。
中間嗰條紙就係for 保險嗰條。
左上係票套, 左中係船票預約票,
左下係接駁巴士票+若干Q-pon
小弟o既票係指定席,
不過對於影相o既人黎講,
劃位係冇用的。
為左可以好好咁影相,
小弟就鼠左去第一卡(上圖),
因為得嗰卡係冇玻璃窗。
反正架火車又唔係滿坐。
講係咁講,
其實都比小弟想像中多人,
因為一來今日係星期一,
二來係頭班車,
三來今日落雨,
所以架車有五成滿都有啲意外。
ANYWAY,
出發喇~
開始慶幸今日落雨,
好天固然好,
但霧氣繚繞o既大自然景色,
另有一番風味!!
途中遇到已經出發到o既船,
船頭掌舵人係頭頂旋轉竹桿作為打招呼。
半個鐘o既車程,
話快唔快, 話慢唔慢咁就完左。
因為櫻花唔係好密,
加上火車不停移動中,
(不過去到某啲位,
車長都會停一停俾大家影下相)
所以如果以賞櫻為名的話,
感覺一般。
但以旅遊+散心+享受湖光山色,
呢600yen絕對唔係無謂。
到左亀岡總站,
就要即刻去搭巴士接駁去坐船,
因為巴士係只係做小火車o既遊客,
所以miss左呢一班,
就要等一個鐘之後,
而且船飛o既時間亦已經預約左,
所以唔miss得。
廿分鐘巴士之後就到左上船o既地方。
拎番頭先嗰set船票,
將保險嗰條紙同埋預約票交到counter,
就換黎下圖o既登船票。
唔好似為坐船係好似維港遊嗰啲咁o既大船,
而係真係泛舟湖上嗰啲小船,
每船坐27人, 連船夫共30人。
遊客四個人一排, 坐七排
小弟唔知話係好彩定係好心有好報,
讓人先上船,
結果得番最後一個位,
就係第三排最右邊o既上船位。
有咩咁好,
因為落雨加有少少風,
撇雨都幾勁,
但前兩排食晒。
而最右手邊,
可以係冇人頂位之下任影相!
上船之前都覺得3800yen有少少肉痛,
不過船行左冇耐,
就完全改變晒諗法。
大家可以睇吓下圖船夫幾用力划!!!
約兩小時o既船程,
有七成o既時間水流幾乎係靜止,
就唯有係靠大叔撐起成船人。
後面黃衫嗰個負責用竹杆插落河底,
然後推住竹杆, 由船頭跑到去大叔坐住嗰條橫木,
重覆又重覆!!!!!!
去到水流急又窄o既地方,
又要用竹杆已變船o既方向,
或者係將船推離障礙物。
可以話係最辛苦o既岡位。
然後再加上船尾舵共三人,
輪流負責三個岡位兩小時!!!!!!
你話嗰3800yen係咪物超所值!
當然,
俾錢人划船, 就唔洗黎到日本o既,
欣賞美境先係主要目的。
兩小時o既船程,
大部份時間都係慢慢行進,
加上小弟o既有利位置,
兩個小時影過夠!!!
間唔中都有好似上兩張圖咁,
水流比較急o既段落。
有啲地方,
水流急之餘,
只係啱啱夠一艘船過,
稍有不慎都會觸礁......
行左三分二船程,
有一艘小食船靠埋黎做生意,
令小弟諗番起係大陸坐船......
落船lu。
正如小火車咁,
因為嵐山桂川兩岸櫻花唔算密,
所以以賞櫻黎計, 唔太能夠飽眼福,
不過以享受觀光黎計,
坐船遊桂川絕對係值得一試!
秋天紅葉滿山o既時候,
一定要再黎多次!!!
上到岸已經係十二點,
所以早起身係有原因的!
開始遊下啲櫻花名勝+歷史古蹟。
黎到嵐山,
當然要黎一黎世界文化遺產---天龍寺。
不過天龍寺飽歷祝融,
而家見到o既大部份都係明治時代,
比較近期重修的。
天龍寺出名o既,
就係上圖「法堂」內部天花上面,
畫有o既大型「雲龍圖」,
不過而家見到o既,
係平成四年畫o既第三代雲龍圖,
望一眼盛惠500yen......
小弟就覺得唔係太化算喇......
天龍寺另外出名o既,
仲有日式庭園---「曹源池」,
同埋同一庭園o既幾棵枝垂櫻。
進入庭園, 另收500yen......
唔好去搶......
下兩張圖就係曹源池。
然後就去睇下主角(小弟心目中)---枝垂櫻。
睇過上幾張圖o既枝垂櫻,
即刻覺得入場嗰500yen抵番晒!!!
當然,
唔係淨係得櫻花o既,
庭園入面仲有其他植物都幾靚。
穿過庭園係北邊門口走人,
轉個彎就到野宮神社。
野宮神社o既鳥居大有來頭,
係日本最古老o既黑木鳥居,
敵發住古樸o既氣質。
另外,
神舍內o既青苔都幾靚。
離開野宮神社,
向嵯峨野進發,
途中經過竹林之道。
唔洗多講,
故名思意,
即係勁多竹o既路啦。
是為一眾遊人殺菲菻o既地方。
行經呢段竹林之道,
不其然令小弟諗番起黃蒙田o既《竹林深處人家》,
不過差在冇扁尖筍同碧螺春啫。
向嵯峨野
深入行約十五分鐘,
就到達祗王寺。
老實講,
袛王寺冇乜野好睇,
主要係睇青苔。
當然啦,
如果一心要睇青苔o既,
就不得不去苔寺。
不過唔係今日去。
唔好似為青苔平平冇奇,
其實都可以幾靚。
離開祗王寺,
再向北行十五分鐘,
就到達化野念佛寺(ADASHINO-NENBUTSUJI)
ADASHINO, 即無親人、朋大供奉o既死者。
不過間寺係點搵呢啲人番黎供奉,
就真係唔知喇。
每個石頭都係一個墓碑。
當然,
寺內都不乏櫻花o既蹤影啦。
由化野念佛寺行番出嵐山,
足足行左大半個鐘,
仲要係以小弟飛快o既腳程計喎......
其實係嵐山幾個大車站,
都有單車出租,
大約100yen一日,
俾小弟呢啲行得遠o既人代步。
點解小弟唔租?
今日落雨呀大佬!!
行番出桂川附近,
時間已經係下午兩點幾,
求其搵個地方食野。
難得出門賞櫻,
加上出左糧,
風吹雞蛋殼,
梗係食番餐好架啦。
唔知點解嵐山有好多食肆都係以豆腐為招徠,
小弟求其揀左間合眼緣o既就走左入去。
食左個1800yen左右o既定食。
每碟野o既份量唔係多,
而且有幾多啖肉,
不過食下食下都幾飽。
右下角o既甜點---蕨餅(WARABI-MOCHI)尤其好食,
令小弟一食完個款餐,
就即刻係店前面買番盒食!!
店內裝修骨子,
而且因為係二樓,
(即香港o既一樓)
所以望出去景觀唔錯。
食完都差唔多三點,
係時候回程。
點解咁早走?
大佬,小弟請左半日假咋,
仲要六點鐘番番舖頭開工直至凌晨兩點架......
沒有留言:
張貼留言