好喇開估喇,
今日小弟去左邊度賞櫻?
就係京都隔離個縣---滋賀縣。
滋賀縣係邊?
下面地圖括住嗰三個地方,
就係小弟今日遊覽o既地方,
大阪就係地圖o既最左下角......
又係晨早六點爬起身啦。
首先由大阪搭粒幾鐘車黎到近江八幡。
到達時已經係八點半
近江八幡位於琵琶湖東面,
當時豊臣秀吉個家姐個仔---豊臣秀次,
將近江八幡 打造成一個繁華o既商業城鎮。
琴晚睇地圖,
見由車站去到個景點,
都只不過係一直線兩三公里路,
所以都冇打算check巴士路線同埋搭巴士。
結果一行就行左半個鐘,
仲要係以競步o既速度行......
首先黎到o既係八幡堀,
一條長6公里o既運河,
當年商人就係以呢條運河作水路交通。
當然小弟唔會行晒6公里啦......
有少少蘇杭o既感覺。
(但小弟冇去過蘇杭...)
過左八幡堀之後,
就會見到日牟禮八幡宮,
係一個受當年商人歡迎o既神社。
原來前晚同琴晚,
就係日牟禮八幡宮 o既八幡祭,
日本o既選択無形民俗文化財之一。
(即係非物質文化財產咁上下啦。)
其實個日牟禮八幡宮都係順道一睇架啫,
最主要想去o既地方, 係要再行前啲搭吊車上o既八幡山。
八幡山,
同時亦都係豊臣秀次o既城堡遺跡,
不過而家山上只係得番個地蔵廟同瑞龍寺。
由瑞龍寺望落琵琶湖, 係其中一個美景。
可惜今日天陰有霧,
睇得唔係咁清楚。
老實講,
其實山上都冇乜野好睇,
櫻花又唔係多,
於是逛左一陣,
就搭番吊車落山,
參觀八幡公園喇。
叫做睇完第一個景點啦,
感覺上無論係觀光又好,
賞櫻都好, 都只係一般般,
反而最靚係條運河。
走o既時候本來打算搭巴士,
點知睇下個時時間表,
一個鐘先得一兩班,
仲要啱啱走左班......
行半個鐘番去車站可能仲快,
結果又再利用11號到達車站。
ANYWAY,
行番到近江八幡已經係十一點半。
搭JR到下一個站睇下一個景點。
下一個站係安土。
安土站o既正面,
有一個織田信長o既銅像,
(仲記得織田信長係邊個嘛?)
陣間大家就會知點解。
到達安土之後第一件事係搵觀光案內所
(日文「案內」即「資料」「介紹」)
正如之前係BLOG度講啦,
唔係話貪心拎佢啲小冊子,
而係有一張當地制作o既地圖係方便好多!
可惜,
安土o既觀光案內所星期一放假!!!
正當小弟係門口裝裝吓o既時候,
原來入面有幾個女人係度開緊meeting。
其中一個可能係觀光案內所o既負責人o既女人,
開門走出黎話今日休息,
不過可以俾我入去睇下。
太好人了!!!
真係唔感謝佢都唔得。
多得呢位女士,
少弟可以係觀光案內所休息o既時候,
能夠睇到呢個1:20 o既安土城模型。
安土城係由織田信長所建,
只係用左三年時間就建成。
而且所運用o既技術、裝飾等,
係當時黎講係非常新穎以及宏偉。
就連當年身在日本o既傳教士,
都係寄番歐洲o既信中提及,
佢係歐洲從未見過如此宏偉o既建築物。
可惜係遠征中國毛利氏途中,
(日本o既「中國」, 即大阪西面,四國、九洲北面部份)
係京都遭到親信明智光秀o既叛亂而亡。(本能寺之變)
雖然三日後明智光秀就俾豊臣秀吉討伐,
但唔知點解安土城會被火燒毀,
只剩下頹垣敗瓦。
至於安土城被燒毀o既原因,
到而家仍然係一個謎。
由車站行過去安土城跡,
講緊o既又係成半個鐘o既時間。
睇睇巴士個時間表,
因為唔係咩大市鎮,
45分鐘先得一班......
當然,
小弟每次出遠門都做足功課。
一早得知車站附近有三間舖可以租單車FOR觀光。
(其實就係車站對面)
租單車去安土城,
來回連遊覽大約兩個小時,
租金都只係500yen,
搭一程巴士都冇左200yen啦。
於是就租左架單車,
踩左十分鐘唔洗就到安土城跡。
未到安土城跡正面,
已經見到好靚o既櫻花,
襯埋一片田, 幾好feel。
然後就係安土城跡o既正面喇。(以下四張圖)
講真, 佢唔講都唔會知呢度係以前o既一座城。
就算講左都睇唔出。
唯有靠資料牌去了解。
不過荒廢左o既城留低O既石壆、
加上零丁幾棵滿開o既櫻花,
有一程滄桑o既感覺。
上面幾張,
其實都係城前面o既附屬建築,
真正o既城堡係山頂。
交低買路錢之後沿路上,
首先左手邊就係豊臣秀吉,
仲係跟織田信長做o靚時住o既地方。(下圖)
當時豊臣秀吉仲未改名,
仲係叫羽柴秀吉。
而再上啲o既右手邊,
就係德川家康住o既地方,
不過冇拍低。
啲石級好那高,
級級都到膝頭咁高,
行得好辛苦=.=
途中有啲石級o既石頭標有「石佛」o既字樣。
講緊當年為左起城堡,
有理冇理周圍搵石頭,
有時連刻有佛像o既石頭都唔放過。
睇清楚啲係咪有個人形o既圖案呢。
再上,
有織田信長廟。
係當年豊臣秀吉,
用織田信長o既衣服做o既衣冠塚。
因為當年織田信長被圍於本能寺,
自知難途,於是放火自殺(此乃其中一說)。
不過燒完之後, 卻搵唔番條屍。
所以亦有傳當時織田信長未死,
只係走左佬。
(終於)上到山頂,
見到四邊有石壆,
而地上埋有整齊幾排o既石頭。
呢度就係安土城o既核心---天主。(上圖)
一般日本城池o既城堡核心都係叫「天守」,
亦即係天守閣。
安土城嗰個叫天主, 同西方宗教信仰無關,
只係織田信長覺得自己係天下o既主人,
所以先咁叫。
不過日文「天主」同「天守」發音一樣,
只係寫法不同罷了。
安土城天主共七層,
上面六層而地下一層,
大家見到四圍有石壆,
係因為而家見到o既係地下嗰層,
當時石壆上面先係地面。
而地上一排排o既石頭,
就係天主o既柱o既地基。
就咁係呢個地基望番落山,
已經覺得好有霸氣,
莫講話當年個城仲未燒燬,
由城上望番落山。
都唔知咁大舊石係點搬上山,
不過應該都係同金字塔o既道理差唔多。
安土城跡o既三重塔。
沿路落就會見到下圖o既二王門。
唔係話一定要有個天守閣可以上先叫好睇,
有時好似安土城跡咁,
睇住當年o既殘骸懷緬一下,
別有一番感受。
踩番單車番安土站。
時間係下午一點半。
因為安土唔係大站,
所以只有「普通」列車先停,
而「快速」、「急行」等列車會飛站。
俾錢買左飛,
入左閘睇時間表,
先發覺啱啱走左一班車,
下一班車要半個鐘之後=.=
無理由坐係度戇QQ咁等足半個鐘架,
於是走向閘口問月台,
睇下月台長俾唔俾小弟出去對面食個午飯再入番閘。
問題都未問完,
月台長已經好爽快咁話OK。
於是就係對面o既蕎麦麵店渡過半個小時。
食完野,
繼續搭車北上,
下一站係彥根。
黎彥根就梗係睇彥根城啦!
彥根城係彥根蕃主井伊家o既住處, 跨越14代,
所以係彥根駅o既前面就有個井伊直政o既銅像。
而銅像下面就有一個彥根城o既小模型。
黎到彥根會見到上、下圖o既吉祥物,
叫ひこにゃん(HIKO-NYAN),
都唔知係咩動物喇,
不過以佢個名估計, 應該係貓掛......
(彥根日文讀作「HIKO-NE」,
吉祥物個名「HIKO-NYAN」,
就係取「NE」同「NYAN」o既詣音。
而「NYAN」係日文貓o既叫聲o既擬音)
出左車站西口,
一直行會先到滋架縣護國神社,
雖然門口都有好靚o既櫻花,
不過行程緊密,
加上對佢冇乜興趣,
於是繼續向彥根城進發。
見到左面一排松樹,
沿路直行就係彥根城入口喇。
而松樹後面就係護城河,
護城河城牆o既櫻花,
可以話係彥根城櫻花o既代表作,
真係好靚!!!
彥根城、姬路城、犬山城、同埋松本城,
同列為日本四大國寶城。
皆因經歷戰火連連,
仍能奇蹟地保留至現今。
小弟去埋犬山城的話就去齊晒喇!!!
下圖o既馬屋,
係當年要黎養馬之用,
城內留有馬屋o既城堡就只有彥根城,
所以係日本指定重要文化財產之一。
隻馬當然係假架啦。
過左橋,
就正式開始進入彥根城。
原來啲城堡梯級咁闊係有原因的。
呢種間距o既梯級,
可以擾亂敵人衝上黎o既步伐以至氣勢,
小弟試過跑上去,
的確係唔知點咁,
一步又唔夠, 兩步又疾住......
天秤櫓o既特點係有一條小橋,
只有彥根城先有咁o既設計。
「櫓」係要黎由上而下攻擊敵人o既建築,
而啲窗口就係射箭呀、開火槍o既地方。
上圖就係頭先天枰櫓嗰條橋。
天枰櫓可以入內觀看。
由天枰櫓望番出黎,
視野廣闊,
敵人所在, 一覽無遺。
繼續上山,
到達太鼓門櫓。
兜左幾十八個彎,
終於到達山頂o既本丸天守......
因為沿路植物比較多,
由山下並不能見到天守全貌,
所以只有上到黎先見到。
小弟都係鐘意留番啲好野係最後。
入城慢慢睇之前,
先到西之丸睇下櫻花,
同埋去參觀下三重櫓。
下圖就係三重櫓。
三重櫓起係一個十米高o既城牆上(圖o既背面),
再加上樓高三層,
居高臨下。
裏面三層都可供參觀。
由三重櫓望出去彥根市。
好喇,
正式入去彥根城o既天守參觀喇。
不過比較特別o既係,
入口唔係天守正面,
而係天守右邊o既延伸建築物。
(上圖右手邊)
由天守望番出黎o既景觀。
城內橫樑。
城內o既樓梯成75度角,
老人家同小朋友攀登o既時候要小心。
因為天守頂部o既窗都封左透明膠板,
加上啱啱入左班耆英團, 超多人,
影唔到靚相, 索性唔放上黎喇。
出番天守外面,
周圍影下相咁啦,
然後就走人喇。
因為仲有一個景點要去。
參觀完彥根城之後,
再搭JR北上到長浜。
不得不提一提呢一個搭火車o既經驗,
因為係香港冇可能體驗到。
由彥根駅搭山陽線上行到米原駅,
落車等下一架北陸線下行到長浜o既火車。
到站o既列車本身係十二卡,
但到站停低之後,
前面四卡同後面八卡分開,
前面四卡繼續向長浜方向運,
而後面八卡則打回頭,
繼續行走山陽線下行。
之前學日文都聽過老師講,
搭日本火車要小心,
唔同車卡會去唔到地方。
嗰時聽完都冇左回事,
但今次真係親眼見到。
好在小弟今次係係月台等上車,
如果小弟一直係該列車入面的話,
可能唔會留意到車卡會分離,
同埋可能會留低係錯誤o既車卡=.=
ANYWAY,
搭幾個站之後就到長浜,
個車站唔係大,
但內部裝修都幾靚。
黎長浜係想到豊公園賞櫻同琵琶湖,
因為好似話日落o既琵琶湖好靚,
所以安排係呢個時候黎。
豊公園,
故名思意係紀念豊臣秀吉。
園內有長浜城,
不過其實係一個博物館。
當然啦,
小弟到達長浜o既時候已經係五點,
乜Q都收晒工,
所以只有由外面拍照。
係而家o既偽長浜城傍邊,
有長浜城天守閣跡o既標示,(上圖)
並且有豊臣秀吉o既石像。(下圖)
咦!?點解石像個樣,
同小弟打機見到嗰個馬騮樣相差咁遠o既......
然後行到湖邊,
時值黃昏,
雖然天有陰霾,
但總算見到雲邊一抹彩霞。
可能係小弟大鄉里,
岸邊會有浪o既湖,
小弟真係第一次見。
話晒香港所謂o既湖,
係人地眼中可能只係小水氹......
點解小弟會影呢個長浜皇家酒店?
冇o既, 只係小弟一個小小o既情義結。
去年六月同屋企人跟團遊日本,
第四晚入住o既就係呢一間酒店。
大半年後, 飛幾千公里舊地重遊,
有一重特別o既感覺。
因為冇乜特別野睇,
所以六點就走人喇。
不過今次醒水喇,
入閘之先check下個時間表。
果然, 下班車又係要等成半個鐘。
於是先到附近o既商場買少少野食醫肚。
唔好以為小弟今日就咁完結。
番大阪之前,
反正順路,
係彥根出一出閘,
再遊一次彥根城,
為o既就係睇夜櫻。
不過有一個問題出現:
今日唔記得帶腳架!!!!!!
冇腳架,
有更好o既相機都影唔到靚o既夜景!!!!!!
冇辦法之下唯有就地取材,
將相機放係石頭上、或者係矮燈箱上影=.=
所以如果見到以下啲相有陰影、
又或者係斜斜地,
唔好意思, 係因為受放相機o既地方所限......
一行到護城河,
已經見到好醒目o既櫻花。
日頭已經覺得呢一排櫻花好壯觀,
夜幕低垂後,
打上白色燈光,
更加係不得了!!!
正如日間參觀彥根城所見,
彥根城o既櫻花比大阪城更多更靚,
不過問題係即使有夜櫻睇,
彥根城晚上都唔開放。
而更大問題係,
彥根城個閘口係山腳,
即係話過左橋已經係極限,
冇得上山!!!!!!
所以夜櫻可以取o既景有限。
真可惜,
浪費晒彥根城o既櫻花orz
冇帶腳架,
都唔知係好彩定唔好彩喇,
只係為左呢幾張相而孭成日,
實在有點兒不值,
但如果有腳架的話,
呢幾張可以影得更好......
雞肋
冇得上城,
但城下公園有啲攤檔,
時間都已經係晚上七點幾,
於是決定係攤檔醫左個肚先番大阪。
夜晚晚,
坐係露天o既臨時座位,
睇住黑媽媽都唔知係咪櫻花o既櫻花,
食住唔太好食但又唔化算o既街頭小食,
意外地感覺良好。
開始有啲明白點解日本人會約埋三五成群,
係櫻花下飲飲食食。
八點幾九點搭JR番大阪,
再轉地鐵番宿舍,
沖埋涼, 已經係十二點......
今日真係攰到嘔。
一來, 由上星期一、三、五開始,
一直都外出係咁行係咁行,
二來, 星期三、五、同今日,
更加係瞓得三個鐘,
六點就爬起身,
之後仲要番工番到兩點......
三來, 今日一直係咁爬山:
八幡山、安土城跡、彥根城,
全部都行到死死吓,
尤其是安土城跡, 啲石級高到......
呀織田先生, 你番上屋企行咁多級唔攰架咩?
不過絕對係抵的,
呢一個星期,
完完全全可以完成晒,
小弟一早PLAN好O既賞櫻course,
已經死而無憾喇(啋!)。
不過小弟O既櫻花之旅仲未完,
黎緊仲有最後一擊,
不過近近地係大阪,
敬請大家到時多多支持。
沒有留言:
張貼留言