櫻花 (大阪造幣局)

本身打算琴日去o既大阪造幣局,
改為今日去。
打算琴日去o既原因,
係因為琴日係星期五,
應該唔會好多人,
不過琴日落雨就冇辦法啦,
唯有今日去。

今日係星期六,
都預左會多人架喇,
不過真係冇諗過會多人成咁......

「人人朝著那方向,
   心中帶著笑......」
小小弟真係笑唔出喇,
仲多人過星期日o既旺角!!!
大阪造幣局o既櫻花真係咁受歡迎!?

實施人流管制,
一方通行(即單向行走)
對面馬路係回程。

連馬路都要封路,
由交通警管理遊人過馬路......
開完演唱會o既紅館!?

初初仲諗住可能要睇地圖,
因為由地鐵站行去都有少少距離,
不過事實上係唔洗,
因為後面o既人會推你行走......

造幣局通道前,
有大量攤檔。
小弟去過咁多個賞櫻地點,
各地都有呢啲攤檔,
但造幣局o既攤檔係小弟暫時見過最多的。
亦由此可見造幣局o既櫻花有幾受歡迎!

想話,
要影相真係好難,
除非將支炮向天發射,
如果唔係, 冇一張相係影唔到人的!!!
而且後面啲人會推你行,
但前面啲人又唔係好行,
一邊睇路, 一邊睇花, 一邊影相,
唔通要好似《三眼小子》咁要有三隻眼!?
可惜小弟第三隻眼同正常人一樣,
唔係生係額頭......

唔講咁多喇,
睇櫻花啦。

呀叔你人比花嬌喎......

中間棵綠色o既,
唔係冇晒啲花得啲葉,
而係啲花本身係綠色......
綠色o既櫻花小弟都係第一次見,
後小小會有close up。

呢棵叫「天の川」o既櫻花,
(「天の川」即「銀河」)
形狀似箒把
根據個介紹牌所講,
好似係比較有特色o既品種。

呢個就係頭先話綠色嗰種櫻花o既close up喇,
真係綠色架,
不過個名叫「御衣黃」。

因為今日比較大風,
加上啲櫻花開左有一段時間,
風一吹, 花瓣就隨風而散,
所以話, 上圖天空o既黑點唔係垃圾啦。

上、下圖: 手毬,
特色係啲花堆埋一堆咁開,
形成一個個繡球o既咁形態。

(下四圖)「今年の花」:
每年都會揀一種花黎介紹,
而今年就係小手毬。
又真係幾靚o既。

條路長唔長短唔短,
啱啱好適中:
行完呢一段路之後,
明白點解造幣局o既櫻花咁受歡迎:
皆因品程非常之多,
令人大開眼界;
而且唔係同一個品種種埋一齊,
所以賞花都賞得冇咁悶;
另外, 種植o既櫻花都比較矮,
遊人要同花合照都比較容易。
黎之前仲以為,
都睇左咁多櫻花,
黎到都可能會覺千篇一律,
但結果係令小弟大開眼界,
好在小弟冇放棄呢一個櫻花景點啫!!!

回程路有勁多攤檔,
本身都唔係肚餓,
不過見到下圖o既雞皮餃子,
就即刻買番盒黎食,
皆因小弟鐘意食雞皮。

四點幾走人,
番番拉麵店開工T_T