半斤八両

今日星期一,
本身拉麵店逢星期一休息,
不過因為今日係公眾假期,
所以今日都要番工,
補假補聽日。

通常呢啲突然o既調動,
或者係某人唔得閒番工,
都係由細老闆補上。
今日都唔例外。

實在係唔鐘意同呢條茂李拍擋,
超奄尖聲悶, 原因如下:



1) 論點: 有客係度, 員工唔可以食午 / 晚飯
    論據: 無
    反論: 已經係蹲係廚房地下食,
              客人又唔會睇到......
              (& 佢自己直頭坐埋係大堂同朋友飲酒傾偈)

2) 論點: 客人係度, 就算到關門時間,
               都唔可以出店外將個「營業中」o既牌轉做「準備中」
    論據: 無
    反論: 實在係唔知點解唔得=.=
              個客又唔會理 / 知道會一個員工出店外做啲乜
              而且如果一個食緊的時候另一個入黎, 沒完沒了......

3) 論點: 間店做到十一點的話唔可以早收舖,
    論據: 如果搭正十一點都有客想黎食野咁點算?
    反論: 間店係做生意到十一點,
              唔係俾啲客十一點先入黎,
              做佢生意做到唔知幾多點。
              ANYWAY, 佢個論據小弟都理解, 但個問題係
              有時冇生意做到悶, 佢自己早十分鐘收舖就OK=.=

4) 論點: 就算小弟早收拾完, 而細老闆未計好啲數,
              都要等埋佢先放得工。
    論據: 佢冇鎖匙收舖。
    反論: 點解做老闆會冇鎖匙!?
              & 如果佢早計好條數過小弟收拾,
              一句「之後就交俾你喇」就走左去

5) 論點: 唔可以睇太多電視
    論據: 無
    反論: 唔望電視, 唔通望住個客食野?
              定係俾個客見到你望住地下發吽逗?
              (& 細老闆自己睇就冇問題)


仲有好多其他零碎野從略


然後,
今日又再多一條

因為條茂李唔會幫手執野,
所以收舖所有野都係小弟一個收拾,
講緊o既係一個小時或以上時間,
所以一般小弟都係提早
將一啲可有可無o既用具等洗刷 / 收拾。

結果條茂李同小弟講

論點: 有客o既時候唔可執野
論據: 俾客見到你係度洗野執野,
          好似唔想做生意&趕客走
反論: 就算係OPEN KICTEH
          個客都唔會知廚房o既人背住佢係度洗乜/執乜架啦=.=
          咁係咪即係有客的話連洗碗都唔得?
          冇野做, 又係咪望住個客食野?
          & 提早執野o既最主要原因,
          咪就係你條茂李唔幫手執野......



當然啦,
一切o既反論都係俏俏話,
唔會同佢講, 因為佢係老闆。
不過小弟想話, 你俾o既人工又唔係高,
(仲要拖糧!!!!)
咁那多要求係咪有啲過份?

此時, 一邊執野, 一邊哼住



「我哋呢班打工仔 通街走糴直頭係壞腸胃
搵嗰些少到月底點夠洗 (奀過鬼) 確係認真濕滯

最弊波士郁啲發威 (癲過雞) 一味喺處係唔係亂嚟吠
諗親加薪塊面挪起惡睇 (扭吓計) 你就認真開胃

半斤八両 做到隻積咁嘅樣
半斤八両 濕水炮仗點會響
半斤八両 夠薑就揸鎗走去搶
出咗半斤力 想話攞番足八両
家陣惡搵食 邊有半斤八両咁理想 (吹漲)

我哋呢班打工仔 一生一世為錢幣做奴隸
嗰種辛苦折墮講出嚇鬼 (死俾你睇) 咪話冇乜所謂

半斤八両 就算有福都冇你享
半斤八両 重慘過滾水淥豬腸
半斤八両 雞碎咁多都要啄
出咗半斤力 想話攞番足八両家陣惡搵食 邊有半斤八両咁理想 (吹漲)」



P.S.
雖然講到好似好慘咁,
其實工作內容唔算辛苦,
因為生意唔太興隆,
一日加埋都唔夠三十人黎食。
最辛苦係點樣打發時間......

只不過條茂李實在係太無謂,
係度發下牢騷咁啫。