櫻花 (大阪城+萬博記念公園)

琴晚屎忽痕,
十二點幾一點飲左罐咖啡,
以前咖啡對小弟係冇影響的,
不過可能因為冇飲太耐,
結果?
琴晚眼光光,
望到凌晨五點幾六點,
天都開始光先瞓著=.=

呢啲咪叫捉蟲囉.......



番番正題,
是日放假,
養晦韜光左咁耐,
係時候出動喇。

大阪o既主要櫻花都開左七成以上,
於是今日o既景點係大阪城同萬博記念公園。

由於凌晨先瞓著o既關係,
本身打算九點起身,
變成十點先起身,
出得門口都差唔多十點半。

十一點左右到達大阪城公園外圍,
已經零零散散見到唔少櫻花o既容姿。

係度唔再講關於大阪城o既野喇,
有興趣o既人士請參閱小弟15/12/2011 o既BLOG啦
http://japsleevefish.blogspot.hk/2011/12/blog-post_15.html

都係經大手門入啦。
不過同上次黎o既分別,
在於今次大手門入面o既櫻花已經開住等小弟!

可以比較下圖,
上年15/12 o既大手門
大手門

啲人係度寫生,
都幾寫意,
如果係香港, 仲唔俾管理員趕走!?

今次唔係直接入大阪城,
而係途中轉左,
入去西之丸庭園。
因為西之丸庭園先係大阪城賞櫻o既地方。

入場費350yen,
以日本物價,
一啲都唔算貴。

都唔知講咩好喇,
總之就係靚同壯觀啦。
唔講喇,
睇相啦看官。

小弟覺得上圖三棵真係好靚,
已經係三個唔同o既品種。

 ↑　↓　最左嗰棵

↑　↓　中間嗰棵

放上黎o既相唔多,
但其實已經係西之丸庭園逗留左個半鐘。

離開西之丸庭園,
進入大阪城。
大阪城城郭入面o既櫻花唔算多。
不過係啲景襯托下,
都有少少觀賞價值。

豊国神社。
上次黎o既背景係紅葉同埋黃色o既銀杏樹,
今次就係粉紅色o既櫻花。

離開大阪城城郭範圍,

咁啱有對新人影緊相。
真係好似一幅畫。



雖然西之丸庭園o既櫻花係靚,
不過小弟覺得大阪城東面o既大阪城公園,
啲櫻花仲靚,
因為又密又多。

櫻花稠密o既地方,
大家唔難見到好多日本人舖晒地席傾偈食野隊酒等。
呢啲就係日本人o既「花見」(HANA-MI)~~~賞花。

日本人其實好喜歡係戶外玩樂隊酒,
可惜日本人平日日間係唔會隊酒,
(除非係好墮落o既人啦: 失業呀之類)
所以一有機會就會到戶外玩樂隊酒。
由於冬天天氣凍,
所以春見花見就成為長時間屈係室內以來第一個o既機會。

日本有一句諺語「花より団子」
意思大概係「醉翁之意不在酒」
而呢句野o既來源,
就係話比起賞櫻,
係戶外食團子(即日式甜到嘔粉團)先係主要目的。

唔講咁多,
繼續睇相。

兩點左右黎開大阪城範圍,
先搭半個鐘地鐵到 大日,
再轉大阪MONO-RAIL到萬博記念公園。

MONO-RAIL,
即係單軌火車啦。
因為香港冇,
所以小弟都覺得幾新奇。

路軌好似過山車咁。

搭左十六分鐘左右就到大阪萬博記念公園喇。
大家可能都已經唔知幾時係邊度見過呢隻奇怪o既野,
冇錯, 佢就係大阪萬博記念公園o既地標---大陽之塔,
陣間會有CLOSE-UP。

大阪萬博記念公園,
「萬博」即係「萬國博覽」,
亦即係「世界博覽會」。
1970年, 當時日本成為第一個亞洲國家主辦世博,
場地就係而家o既大阪萬博記念公園。

入場費為250yen。

呢個詭異o既大陽之搭,
一共有四個太陽,
正面見到兩個,

背面有一個。
仲有一個太陽,
好似話係係地底=.=

ANYWAY,
賞櫻啦~

其實小弟對萬博紀念公園有乜興趣,
所以冇乜點詳細遊覽,
四點左右就閃人。

預定係沿路番番大阪城睇夜櫻,
不過因為日本而家成六點幾先天開始天黑,
咁早去都係冇乜野做,
於是係 大日 o既AEON超級城坐低,
瞓左個零鐘......
實在係太眼訓喇......

然後晚上七點,
再戰大阪城!

呢個唔係咩特別o既light-up,
只係普通一盞路燈,
但已經幾靚下。

本住要再買多一次入場卷o既決心排隊,
埋到counter, 拎日頭張飛問個工作人員:
「我上晝已經黎左一.......」
未講完, 佢已經伸晒手叫小弟直接入場......
太好了。



入到場,
哇靚到丫,
同日頭完全係兩個世界!!!

其實小弟都明白,
個道理同鐘乳石一樣,
本身平平無奇,
只係燈光作怪,
不過真係好靚。

白色o既燈打落啲櫻花度,
配以黑色o既夜幕,
真係好靚!

冇喇,
係咁多喇。

如無意外,
星期三會去京都,
不過嗰日好似會落雨 T_T