雜談

雜談1: 31號

以前從來都冇咁留意過邊個月大邊個月小,
但呢份工實在係太過令人討厭同埋時間長,
令小弟不得不數住日子過。
一個月30日都還好。
但一到左31號,
感覺總係好似番多左日蝕左俾佢咁,
齊頭十進制咪幾好,
搞乜鬼好似凹章咁要整多一日啫!?

報名上山

呢排「高野山」篇野分開咁多次寫,
一來因為工時長, 私人時間少啦,
二來因為呢兩日中午都有野做,
就係去附近o既旅行社喇。

去得旅行社就梗係報名參加旅行團啦,
唔通去睇戲咩。

報o既團係富士山登山。

打工仔心聲

係YAHOO見到有篇叫「誰不想準時放工」o既文章,

講o既野完全係打工仔o既心聲!!!

(除左好似BOBBY嗰啲咁o既工作狂之外)

Work is a never ending process. You can never finish all the work.

Life does not mean coming to office,

going home and sleep.

There is more to a life.

You need time to socialize, exercise and relax.

Don't make your life meaningless.

A person who sits in the office until late is not a hardworking person.

He is a fool who does not know how to manage work within the stipulated time.

Beside he is a loser who does not have personal or social life.

You did not study and struggle in life just to be a machine.

嗯~

全天下o既打工仔, 加油~

高野山

今日旅行o既目的地係和歌山縣o既高野山。
先講下高野山係邊先啦。
上圖o既中文字, 正常人都睇得明掛。

伊勢就係五月頭小弟去o既地方, 供參考。
京都係邊? 連地名都顯示唔到咁細,
就係大阪右上方嗰個圈。
而今次o既高野山就係係大阪南面,
和歌山縣o既北部。

本身都唔係話太大動力想去高野山,
因為從來冇聽過呢個地方名。
(對唔住, 小弟比較膚淺,
 冇聽過就覺得唔出名)

不過一來大老闆娘極力推薦啦,
二來小弟見到有一日免費任搭PASS,
計過條數去得過,
於是用2850yen買左呢個一日任搭PASS。

呢個PASS包大阪全線地鐵+南海鐵路由大阪難波至高野山,
途中任出入閘, 再包高野山內南海巴士任搭。
淨係由小弟附近地鐵站搭去高野山,
單程都已經1500yen, 計落有SO。

晨早0600爬起身,
先搭地鐵到難波,
轉南海鐵路直搭到去極樂橋。
唔洗出閘, 直接轉搭纜車上高野山。
只要你係極樂橋落車之後唔搞哩搞撈,
就唔洗擔心纜車班次問題,
因為係一條龍服務。
黎得極樂橋, 唔上高野山都冇乜好搞架喇.......

鑊鑊新奇鑊鑊甘 之 直踩12小時

首先更正,
原來係小弟同尾原誤會左,
唔係星期六晚收三點,
而係下午收三點,
不過開多一個鐘o既事實係冇變。
但小弟情願下午遲收一中個鐘,
好過晚上遲收一個鐘喇~



好, 講番今日星期日,
第一次由早上1100直踩到晚上2300,
結果兩點到六點之間(平時break o既時間),
只係有兩個人入黎......

所以話呢,
開黎盞浪費水電=.=

不過小弟都好驚佩自己o既耐性,
今日連踩12個鐘,
但一啲都冇煩躁不安,
一來唔係忙啦,
二來正如之前所講,
小弟而家o既抗「悶」能力都幾高。

好!!!仲有五個星期就脫苦海喇!!!

鑊鑊新奇鑊鑊甘

參考:
小弟而家o既上班時間:

星期二至六---1130~1400, 1800~0200
星期日        ---1130~1400, 1800~2300
星期一休息



好, 入正題;

事源今晚 尾原 收到大老闆o既短訊

「聽日開始星期日開11:00-23:00,
    下星期開始星期六收03:00」

簡單啲講,
星期六遲多個鐘收工&
星期日直踩12個鐘......



食屎!!!



ANYWAY, 阿Q啲諗,
小弟當還番五月頭無啦啦放多左嗰兩日假俾佢,
反正小弟做埋下個月就走人,
辛苦都係辛苦多四日,
到時話知佢開足廿四個鐘。

不過可憐o既尾原,
只係番左工一個月,
睇黎冇多一頭半年佢都未必會轉工,
有排佢捱......

青春18切符

青春18切符(「切符」即「飛」、「票」),
係日本JR鐵路發行o既車票,
一套五張共11500yen  o既車票。

車票o既特色,
係每張可以全日任搭JR鐵路o既普通、快速列車, 不限距離。
當然仲有啲細節o既, 不過無傷大雅,
呢度唔詳細講。
可以五個人同一日用五張(一人一張)又得,
一個人分五日用又得, 而且無需連續五日,
可以話係閒人長距離旅行o既恩物。

發行分春、夏兩季,
(以前好似冬天都有)
一般都係三月頭左右公報晒春、夏兩季o既發售日期。
但今年唔知點解只係公報左春季,
夏季o既票到而家仍然遲遲未公報。

上網睇啲分析,
好似話為左對應入閘機電腦化,
亦有可能因為會同「赤券」合併,
所以技術上或細節上會有所調整,
以致遲遲未能公報。

ANYWAY,
佢一日唔公報,
小弟一日都PLAN唔到七月中打後o既行程T_T

化境

之前成日都話渡日如年呀,
時間好漫長呀咁。
但而家小弟已經步入左化境。

一來, 識得冇野搵野做,
二來, 識得拖長啲野做,
三來, 思考迴路改變左。

具體唔識唔講,
大概就係唔好以秒、分鐘 或 時 為單位,
而係睇過左幾多日。
於是回頭睇番,
發覺一日冇乜點做過野又完左......

打呢份工令小弟修得一種技能:
就係長時間冇野做都唔再覺得悶。



相反,
新人 尾原, 日日嗌悶,
又餐餐都話食拉麵食到驚。
大佬, 你番左一個月都唔夠咋喎,
你師兄小弟我食左五個月拉麵都係咁啦。

冇野好寫

實在係冇咩特別事情發生,
想寫都寫唔出啲咩......

派傳單

因為大老闆印左成萬張A4彩色傳單張,
上星期都只不過係派左二千張,
所以應該仲有排派......

大老闆同大老闆娘,
而家都係晚上十一點左右到舖頭,
舖頭由佢地接管,
然後我同尾原就出去派傳單。

放假

醒番o既時候,
咦? 下午兩點半!?
邊個迷姦左小弟!?!?!?



起身刷牙洗面,
然後計劃一下今日o既行程。
今日要交電話費,
同埋出天王寺o既旅行社搜集資料。

反正今日得閒,
小弟就做左一個好無聊o既決定:
踩單車去天王寺。

日環蝕

其實個日環蝕係發生係「聽日」21/5 o既早上,
不過以小弟o既生理行為黎計,
都係寫埋係今日啦。
何況以格林威治時間黎計,
今次日環蝕的確發生係20/5。
(日本+9, 香港+8)

炸雞塊的第一天

唔清楚背景o既,
請瀏覽琴日o既blog。

今日星期六,
但生意都係一般,
縱使出埋免費炸雞塊o既呢一招,
人客都只係輕微上升。

不過都仲未可以咁快定案,
話晒都只不過係第一日。

但就係因為唔知會有幾多人客黎,
成日擔心食材會唔會唔夠, 洗唔洗準備,
全日唯持住警戒狀態,
肉體上唔係話好攰,
但精神上比較疲勞=.=

要真正摸清客流量,
唔過番一個兩個星期都唔會知......



真係好唔想係呢間死人野打工,
不過仲有六個星期,
捱埋佢啦。



遠在紐西蘭o既PTP先生,
收到你o既名信片喇。
大家都係身在異國打份死人工,
鬼叫你窮呀頂硬上啦。

禍不單行

今日真係.......

需知道晚上嗰八個鐘真係悶到嘔的,
所以一般都係坐係廚房o既啤酒箱吞Pop,
亦因為坐左低, 由店外面望入黎係見唔到小弟我地。
(如果唔係點睇書呀、閤眼瞓丫)

點知十一點左右,
大老闆無啦啦殺到黎。
我都算醒架喇, 雖然用手機睇緊片,
但一聽到汽車o既閂門聲即刻撲出去相迎,
不過尾原就仲未知咩事。

陪飲

今日午市, 隔離拉麵店個老闆(大前)走左過黎食野,
例牌都實會飲番幾杯架喇,
而 大前 亦都會問我地飲唔飲。

一來小弟唔係特別鐘意飲酒啦,
二來仲要番一日工,
飲大左仲得了o既。
於是話自己唔飲得, 推左。

新人 尾原, 成日都話想飲啤酒,
今次終於如願以嘗,
即刻 lur飯應飲番幾杯。
點知 大前 打蛇隨棍上,
叫 尾原放左午市同佢地去飲。
又因為 大前 好清楚小弟間店開幾點,
所以就叫 尾原 同佢地飲直至六點,
即係晚上開店o既時間=.=

可憐o既尾原就俾人捉左去飲酒,
又啤酒、又燒酒,
六點鐘開舖開始就已經死左一半......



所以話呢,
最緊要係識保護自己,
有咩事要即刻嗌唔好,
仲要大聲叫救命~

又一單

the Hong Kong University of Suicide and Tragedy

第一天使用

(前情請參閱琴日o既日記)
琴晚做好萬全o既準備,
放左幾集動畫入microSD card度,
等今晚番工悶o既時候可以睇。

結果係成功的!!!
雖然畫質係差少少架喇,
但起碼睇到字幕同聽到佢講乜。

現代o既科技真係偉大!!!

有左microSD card,
以後就唔怕番工悶到嘔嚕。

宝具

哈哈哈, 終於到手喇。

一個月前SK小姐由大阪番香港,
當時小弟托佢手係香港買野,
趁今日放假, 約佢出黎食飯之餘交收貨物。

講緊o既係microSD card。

估唔到小弟都會有要用microSD card o既呢一日......

有左佢, 小弟就唔怕番工晚上嗰八個小時o既折磨喇!!!
哇哈哈哈哈。

冇親節

獨在異鄉為異客,
每逢佳節......
其實又冇乜話思親,
因為本身都唔記得左今日係佳節。

今日星期日, 本來拉麵店星期五晚上,
至到星期日上午都係比較旺的,
但今日全日都咁淡。
正當同尾原討論點解咁得閒,
睇下個日曆先知今日原來係母親節。

不過而家科技發達,
唔同以前留個學好似生離死別咁,
打個電話、發個電郵就聯絡到。

ANYWAY,
母親節快樂。

唔好再黎喇唔該

琴晚, 嗰個女人又再出現......
詳情參考前幾日BLOG:
http://japsleevefish.blogspot.hk/2012/05/blog-post_10.html



好似話嗰個女人都係係附近開居酒屋,
所以收左, 次次都係點零鐘先黎......

今次仲好笑,
細老闆十點左右黎左,
不過唔係睇住間舖,
而係俾個女人叫出黎飲酒......
後來大老闆都話俾個面浦一浦頭。

由十點鐘左右,
佢地已經係附近隊酒。
十二點左右, 好似又移動到另一間舖飲。
一點鐘黎到小弟晚拉麵店飲。
不過好在今次有大老闆係度,
兩點左右就暗示個女人去第二度飲,
小弟先得以準時收工......

好明顯, 掃場飲酒帶頭o既又係嗰個女人......
細老闆都買佢怕, 好明顯係唔多情願的......

小弟? 話知佢啦,
佢地係度傾呀、隊酒o既時候,
扮晒唔識日文咁,
(事實上佢地醉醉地+講得都幾快,
 都只係聽得明五成......)
背住佢地係度執野洗碗,
敬酒o既時候就蹲低扮搵野。
一於好少理。



睇黎小弟呢世都唔會適合做鴨=.=
陳X聰先生嗰種, 一次有幾個億o既例外, 可以諗諗
不過世界上有幾多個陳振X先生咁o既機會丫。



講番個女人,
琴晚細老闆唔係度,
個女人冇黎,
不過個女人好似同另外幾個人係隔離舖,
又係飲到兩點幾先走......
日日咁飲, 因住hepatitis + scrosis

卸

睇黎尾原應該真係係小弟走之後,
繼承小弟o既工作,
(小弟預期做到六月底)
因為日頭, 大老闆叫我俾尾原切葱。

於是今晚開始,
著少著少將自己o既工作卸俾尾原做。
首先係教佢切葱同埋炸中華叉燒。

小弟一向都唔慣點人做野,
但人性本懶惰,
有人可以分擔工作,
就會自自然然偷懶交俾人做。

睇下幾時可以將全部食材等o既準備交晒俾尾原做,
小弟可以撓埋雙手乜都唔做先XP

好佬怕爛佬, 爛佬怕......

琴日第一日復工,
重拾番一個遺忘多年o既感覺,
就係「放完暑假番學」......

同新人尾原(之前譯錯做「小原」)傾,
佢話琴晚夜晚十二點左右,
有個癲女人走黎隊酒,
捉住細老闆, 同埋另外幾條友,
飲到兩點幾先走。
(正常關門時間為兩點......)

正當同情尾原o既不幸,
今晚嗰個女人又走左黎,
終於一睹佢o既風采=.=

京都食餐飯

今日, 又係係房度無所事事。
因為三重縣一役,
實在係用得太多錢.......
就其是無啦啦唔見左3.......唔講~唔講~

晚飯有約,
同係京都學日文o既HKY小姐&日文老師食。
之前HKY小姐介紹左京都一間1000yen任食燒肉俾小弟,
不過一直都冇機會去,
今次機會終於黎喇!!!

但心入面有個疑問,
因為日文老師係唔太食肉的。
不過概然搞手HKY小姐約o既時候冇話有問題,
咁小弟都唔出聲。

約左1900係河原町阪急駅等。
因為班次問題,
小弟1845就已經到達,
不過HKY小姐話要遲15分鐘。
而原因係: 講電話&MSN......

集合左之後,
日文老師聽到HKY小姐話去食燒肉放題之後,
即刻眼都突左......
日文老師果然係事前唔知今日食咩......

結果求其搵左間意大利菜食。

剪髮

放假第二日,
係宿舍hea。

但有一件事一定要做,
就係剪頭髮。

上一次剪頭髮係黎日本之前,
即係11月尾,
到而家已經有五個月冇剪頭髮,
可以想象到有幾長=.=

三重縣 (伊勢神宮+伊勢安土桃山文化村+二見浦夫婦岩)

之前死plan爛plan,
打算用呢三日假期,
第一日去伊勢,
第二、三日去熊野。
但因為移動o既時間+金錢唔符合成本效益,
於是最終改為只係去伊勢算數。

講起伊勢,
大家一定諗起伊勢神宮, 同埋伊勢海老(即係龍蝦)。
伊勢神宮咁出名, 主要有兩個原因。

第一個原因:
伊勢神宮o既內宮係供奉天照大御神,
而外宮則供奉豊受大御神。

呢度要講少少日本神話傳說喇。
傳說天地初開,
最高高在上o既係造化三神,
然後係別天津神,
然後到神世七代o既十二柱神。
呢堆都係出產世間萬物o既神,
而神世七代o既十二柱神最後出現o既
就係「伊邪那岐」同「伊邪那岐」。

呢兩個神製造左日本國土,
同埋日本o既一眾天神。
其中一個就係天照大御神。
天照大御神可以話係日本眾神中比較中心o既一個,
除左佢比較早「出世」之外,
仲因為佢係太陽人格化o既神。
不過基於古書用o既字眼同故事o既描寫,
主流上大家都都默認, 認為天照大御神係女性o既神,
但事實從來冇正式提及過佢係男定係女。

而以前o既日本人相信日本天皇係天照大御神o既後代,
所以天照大御神一直係日本皇室同人民特別厚待o既天神。
因此, 伊勢神宮一直受到日本人重視。
(唔好意思, 有太多唔關事o既資料)

順帶一提,
外宮借奉o既豊受大御神,
係負責天照大御神o既膳食o既神。



伊勢神宮出名o既第二個原因:
因為日本以前有首歌,
歌詞係話一生人總要去一次伊勢神宮,
於是令到本身名氣不俗o既伊勢神宮,
更加聲名遠播。



另外,
「伊勢神宮」其實只係通稱,
真正o既名字, 只係「神宮」二字,
可見伊勢神宮位居日本全國神宮之首。
(不過為免混淆, 而家先通稱為「伊勢神宮」)

既然講到咁誇張,
咁小弟都要拜會一下喇。

不過由大阪到伊勢唔係講玩,
由上本町駅搭近鐵到伊勢市,
足足要成兩個幾鐘。
(因為余家貧, 耕植不足搭特急......)
六點幾起身, 計埋轉車,
要九點半先到達伊勢市駅,
坐到屎忽都痛......

又有新人II

估唔到咁快,
由今晚開始就由得我同新人(小原)當晚上更......
我想話新人黎得嗰兩日,
咩都未識......

唯有唔係太忙, 一有機會就俾佢整拉麵俾客食啦。

因為聽日放假,
今晚收十一點。
橫掂今晚兩個老闆都唔會黎舖頭,
於人早少少閂門,
俾新人試下自己一個人洗野執野。

琴晚已經執拾過一次俾佢睇,
今次到佢自己一個執,
小弟唔幫手。

而家終於明白當日進藤撓埋雙手,
睇住自己執野o既心情,
都幾爽XD

唔係話一有機會就虐待人,
只係自己唔落手做一次係唔知知點做,
於是趁今晚早收工,
俾佢落手試下。

結果佢執左成一個半鐘=.=
雖然十點半就閂左門,
但結果仲遲過平時: 成十二點先走得......


YES, 聽日旅行

黃金週?

還記得之前題過o既日本o既黃金週嘛?
3-5/5連續三日紅日,
再加6/5係星期日,

另外,
因為30/4星期一係紅日,
所以只要請星期二、三兩日假,
就可以連放9日(五天工作週人士)。

星期二、三, 拉麵店忙到HIHI,
不過一到左星期四,
即刻水靜鵝飛,
今日全日加埋都唔夠15人=.=

10小時o既營業時間加埋唔夠15日,
你話有幾悶......

又有新人

今日晚上,
店又黎左兩個新人番工,
應該係預備接替七月走人o既小弟。

兩個都係男性,
睇樣似係同小弟差唔多or細少少。

如果係二八年華o既妙齡少女的話,
小弟會開心啲......



題外話:

連續三晚同細老闆拍檔,
真係超級地獄。
都係嗰句,
份工唔辛苦, 不過係時間長,
企係度又冇野做,
又唔做得其他野,
(當然, 唔係拍細老闆的話會盡情吞Pop啦)
一晚八個鐘係度罰企......

壞方面諗, 呢啲生活仲要過多60日
好方面諗, 呢啲生活只需過多兩個月

遲到

平時中午兩點鐘放左工,
番房用一陣電腦,
3 點到3點半左右會瞓番一陣,
然後五點半起身再番工。

今日竟然瞓過龍!!!!
一扎醒, 時間已經係18:33。
今晚仲要係伙拍嗰條麻煩細老闆......

好在嗰條友平時不定時遲到,
介乎六點九至七點三先到舖頭。

即刻彈起身,
飛單車番舖頭,
用五分鐘極速開舖......

最終趕得切係細老闆黎到之前set up 晒啲野。



今次係小弟番左咁耐工,
第一次遲到。
不過以小弟o既性格,
番左五個月工先遲一次到,
已經可以話係奇蹟......

下星期旅行

因為上星期突然間話有三日連假,
頭一熱, 就即刻plan點樣用晒嗰三日旅行,
連路線、日程都編好晒。

本身係打算咁o既

第一日由大阪去伊勢神宮,
第二日由伊勢o既二見浦搭JR到新宮,
遊覽熊野速玉大社同熊野本宮大社,
第三日遊覽熊野那智大社。

但呢一個星期,
不斷搜集資料,
check埋火車、巴士o既時間表等,
慢慢發覺唔係好化算。
因為移動所需o既時間同金錢比較多,
但睇到o既野好少。
可能講緊係花三四千yen搭幾個鐘車睇一個景點。
再加埋食、住, 可能講緊要用三、四萬yen。

比較過, 內心再掙扎左一輪之後,
決定一日來回伊勢算數,
有三日假都唔一定話要洗晒架啫。
同埋留番啲錢,
六月之後玩好似仲有效率,
無謂為左三日假格梗洗錢。



果然,
做任何事都不宜太急,
需要從長計議。

與日本人無所事事

今日係拉麵店o既補假,
本身打算係房hea下算o既,
反正因為近排比較多事情,
積埋好多動畫未睇。

不過係mixi(日本社交網)
有個人好盛意拳拳咁邀請我到佢住嗰頭,
盛情難卻, 加上識多個人都係好事,
於是今日就去左嗰個人住o既地方: 京都o既桃山。