好佬怕爛佬, 爛佬怕......

琴日第一日復工,
重拾番一個遺忘多年o既感覺,
就係「放完暑假番學」......

同新人尾原(之前譯錯做「小原」)傾,
佢話琴晚夜晚十二點左右,
有個癲女人走黎隊酒,
捉住細老闆, 同埋另外幾條友,
飲到兩點幾先走。
(正常關門時間為兩點......)

正當同情尾原o既不幸,
今晚嗰個女人又走左黎,
終於一睹佢o既風采=.=



當時小弟同尾原洗緊野, 背住門口。
突然聽到大大聲拍玻璃窗o既聲,
嚇左一跳。

只見一個三十幾歲o既女人,
塊面貼住趟門o既玻璃窗係度拍門。
驚嚇程度比起希治閣o既劇可謂有過之而無不及.....
(無論係氣氛、外觀、定係聲效......)
如果有其他客係度都唔知點算......

走入黎, 一黎就勁大聲問細老闆係邊。
話佢知細老闆唔係度,
佢就話「本小姐俾面佢先黎,
黎牚佢場支持佢, 佢竟然唔係度?
打電話叫佢黎!!!」

大佬, 已經係夜晚01:15,
你唔係真係要人飛車黎呀馬......

尾原打電話俾細老闆,
細老闆叫尾原乍帝話冇人聽電話。
尾原咪同個女人講冇人接電話囉。
個女人又係度嘈, 話打到有人聽為止......

結果尾原打俾細老闆,
俾個電話個女人講。
最後唔知點樣講掂數啦,
細老闆唔洗出現。
但個女人照樣同另外三個人隊酒,
仲扮好人咁斟埋俾我同尾原飲=.=

小弟每次都係係佢面前飲兩啖,
然後轉個身倒左去XD

個女人又唔係飲醉o既,
但佢o既言行,
小弟只可以用發癲黎形容,
拍枱拍凳咁,
又講埋晒啲鹹濕話題,
仲撩埋小弟講......

好采小弟有絕招:
「我唔係好識日文」
於是應酬o既工作就交晒俾尾原喇。
尾原, 我們永遠懷念你!!!

結果個班友坐到差唔多三點先走......
我都還好, 最多睇少兩集動畫瞓,
但尾原淨係踩單車番屋企都要45分鐘......

臨走個女人仲話,
如果細老闆唔出現, 以後都唔黎咁話。
小弟心裏回答「求之不得」。