放假

醒番o既時候,
咦? 下午兩點半!?
邊個迷姦左小弟!?!?!?



起身刷牙洗面,
然後計劃一下今日o既行程。
今日要交電話費,
同埋出天王寺o既旅行社搜集資料。

反正今日得閒,
小弟就做左一個好無聊o既決定:
踩單車去天王寺。



直線距離大概係六公里左右啦,
即係大約一條吐露港咁上下,
但事實上因為路面o既實際況,
應該都踩左六至七公里左右......
單程左太約30分鐘......

時間上同距離上睇落唔係好辛苦,
但小弟嗰架係折疊式單車,
齒輪比較細, 所以踩得都幾辛苦下=.=

去到天王寺, 先係去售票處買飛。
因為小弟計劃下星期一放假,
去和歌山縣o既高野山觀光,
所以去買ONE DAY PASS,
2850yen任搭, 計過條數, 最少慳番1000yen以上。

然後去旅行社搵資料,
一來因為想上富士山但又冇伴,
唯有跟團去, 所以搵登山o既團費等。
二來計劃緊七月遊一遊九州,
所以借旅行社啲資料黎plan行程。
三來, 睇下仲有冇其他團啱o既。

行完旅行社就window shopping喇,
呢樣係小弟係香港唔會做o既野,
只係今日難得踩左半個鐘單車黎=.=
唔行番咁上下好似蝕左咁......

踩番單車番宿舍,
時間已經係晚上七點左右,
寫下BLOG, 同人MSN,
好快又到左九點, 去僕半額便當o既時間。

小弟近排好少提,
但事實上放親假,
晚上都必定係去買半額便當,
因為真係好平好抵食!!!
同埋日日係拉麵店都係食拉麵,
唔食下其他野,
就真係就黎連痾都係痾拉麵......