打算用呢三日假期,
第一日去伊勢,
第二、三日去熊野。
但因為移動o既時間+金錢唔符合成本效益,
於是最終改為只係去伊勢算數。
講起伊勢,
大家一定諗起伊勢神宮, 同埋伊勢海老(即係龍蝦)。
伊勢神宮咁出名, 主要有兩個原因。
第一個原因:
伊勢神宮o既內宮係供奉天照大御神,
而外宮則供奉豊受大御神。
呢度要講少少日本神話傳說喇。
傳說天地初開,
最高高在上o既係造化三神,
然後係別天津神,
然後到神世七代o既十二柱神。
呢堆都係出產世間萬物o既神,
而神世七代o既十二柱神最後出現o既
就係「伊邪那岐」同「伊邪那岐」。
呢兩個神製造左日本國土,
同埋日本o既一眾天神。
其中一個就係天照大御神。
天照大御神可以話係日本眾神中比較中心o既一個,
除左佢比較早「出世」之外,
仲因為佢係太陽人格化o既神。
不過基於古書用o既字眼同故事o既描寫,
主流上大家都都默認, 認為天照大御神係女性o既神,
但事實從來冇正式提及過佢係男定係女。
而以前o既日本人相信日本天皇係天照大御神o既後代,
所以天照大御神一直係日本皇室同人民特別厚待o既天神。
因此, 伊勢神宮一直受到日本人重視。
(唔好意思, 有太多唔關事o既資料)
順帶一提,
外宮借奉o既豊受大御神,
係負責天照大御神o既膳食o既神。
伊勢神宮出名o既第二個原因:
因為日本以前有首歌,
歌詞係話一生人總要去一次伊勢神宮,
於是令到本身名氣不俗o既伊勢神宮,
更加聲名遠播。
另外,
「伊勢神宮」其實只係通稱,
真正o既名字, 只係「神宮」二字,
可見伊勢神宮位居日本全國神宮之首。
(不過為免混淆, 而家先通稱為「伊勢神宮」)
既然講到咁誇張,
咁小弟都要拜會一下喇。
不過由大阪到伊勢唔係講玩,
由上本町駅搭近鐵到伊勢市,
足足要成兩個幾鐘。
(因為余家貧, 耕植不足搭特急......)
六點幾起身, 計埋轉車,
要九點半先到達伊勢市駅,
坐到屎忽都痛......
由車站向西南行五分鐘,
好快就到伊勢神宮外宮,
即係供奉豊受大御神嗰個,
主要係保祐衣食住等產業,
不過唔關小弟事,
拉麵店搞成點都唔關小弟事。
嗯......點講呢~
可能因為期望太大,
預期會好特別, 又或者係好壯觀咁,
所以黎到, 覺得實際上只係平平無奇咁。
外宮佔地面積唔算大,
亦都冇咩特別o既景點呀、展望台呀咁。
由鳥居入去,
沿路行百零二百米左右, 就到正宮。
下圖係正宮o既外圍圍牆。
正宮入面唔可以影相,
不過可以由外面影入去=.=
上圖係正宮o既入口,
而下圖就係由入口影入去。
其實除左上圖大家見到啲人係度拜o既地方之外,
入面仲有兩重, 只要閣下添香油的話(當然有最低消費),
神官就會帶你入去拜。
當然啦, 由外面影唔到咁入。
咁啱臨走o既時候有一行人,
浩浩蕩蕩咁行入黎。
身邊啲人突然個個拎晒手機出黎影相,
小弟都覺得有啲唔妥架喇, 睇清楚啲,
著西裝行頭嗰個(下圖白色衫神官隔離嗰個),
好似係電視間唔中會見到。
下圖係伊勢神宮o既附屬神社,
下兩圖分別係「風宮」同「土宮」。
伊勢神宮外宮係得上面咁多相。
下一站就係伊勢神宮內宮。
話就話內、外宮,
其實唔係一個係外面包住入面嗰個,
而係一個比較近市中心(外宮),
另一個比較隔涉(內宮)。
講緊o既隔涉,
唔係話行幾分鐘,
而係要行多3.8公里......
除非閣下有好多時間,
如果唔係, 可以搭51號、55號, 或者係CAN巴士,
十五分鐘左右就到達內宮。
要進入內宮,
先要行過呢一條橫跨五十鈴川o既宇治橋。
宇治橋長101.8公里, 建造年份.......2009年!?!?
又話神宮好有歷史o既?
呢度又要做少少介紹喇。
伊勢神宮內、外宮,
皆有一個好特別習俗,
就係每20年遷宮一次。
簡單黎講,
就係每20年, 神宮o既所有野都會由頭造一set,
上至鳥居、宇治橋, 下至日常神官用o既用品,
連神宮建築本身, 亦會係神宮境內再起一座新。
而宇治橋會係神宮遷宮前四年由頭起過。
因為下一次遷宮係出年2013年,
所以而家小弟行o既宇治橋係係2009年建成, 只有三年歷史。
其實條橋要由頭起過都不無道理。
伊勢神宮每年都有700-800萬人參拜,
20年就有1.4億-1.6億人行過呢條橋,
(日本人口約1.3億人......)
據說15cm厚o既橋面木板, 20年間會有6cm o既磨蝕,
唔起過新o既, 就真係 uji bridge falling down......
伊勢神宮都唔例外,
不過除左係門口洗之外,
遊人亦會再係五十鈴川再洗一洗,
連呢位番鬼老先生亦入鄉隨俗。
啲樹碌碌都咁高,
好有霸氣。
同外宮一樣,
內宮o既正宮都唔可以影相,
而且路牌寫明,
只可以係石階下面影,
所以上、下圖係最後可以影到相o既地方。
內宮o既正宮同外宮o既正宮一樣,
入面都仲有兩重,
如果閣下要入去的話,
又係, 唔該交低買路錢。
上圖就係明年遷宮, 正宮o既位置,
正正就係而家o既正宮o既隔離。
宮唔係話遷就遷,
其實早係8年前開始,
砍木呀、落樁呀、上樑呀等等,
樣樣都會祭一輪拜一輪。
62呢個數好似唔係好大,
但乘以20, 就可以得知
神宮已經有近1300年o既歷史。
下圖為放供奉用o既糎o既倉庫,
因為神糧唔可以同地面有接觸,
所以有懸空o既設計。
上圖係神宮休息室入面其中一牌展版,
入面有提及點解要遷宮,
小弟用有限o既日文能力, 節錄在此:
「......世界上有很多建築物, 例如巴特隆神殿等,
以石頭興建以追求恆久, 但在日本這潮濕炎熱氣侯的國土,
要建造永恆的建築可謂困難之至。......
......為何是以二十年為周期重建, 眾說紛紜。
二十年, 是木造神社建築可以維持的時間,
亦是建築技術、神器製造等技師,
可以將手藝傳授下一代, 令其得以流傳的時限。
亦有一說法, 認為是因為穀物可存放在穀倉的最長時間約是二十年。......
......神宮的建築樣式「唯一神明造」,
是來自「彌生時代」(日本人開始有耕種的時代, 類似中國o既神農氏) 的穀倉樣式......
......雖然後來有像是奈良的寺院等, 高度發展的建築技術,
但神宮堅持維持這種耐久性低的建築樣式,
可以說, 是日本人古時以耕種稻米為生的一種証明。
換句話說, 神宮是日本開國的象徵,
並担當著將此事實流傳後世的重要責任。......」
頭先話正宮唔影得相,
所以為有影低展品o既相,
下圖就係興建中o既正宮內部。
講真, 如果唔係善信的話,
黎到神宮,
其實冇乜野好睇。
但的確, 神宮有一種莊嚴o既氣氛。
小弟去過東京o既明治神宮、
名古屋o既熱田神宮,
同埋今次o既伊勢神宮。
明治神宮, 夠大夠霸氣。
熱田神宮, 因為小弟當時係跟團去,
所以來如風, 去亦怱怱,
不過感覺上好似好細咁。
今次o既伊勢神宮,
雖說20年重建一次,
但從建築o既樣式散發出一種古樸o既氣息,
(唔係吹水, 係真的。小弟自問都睇過唔少寺廟,
邊啲建築模式較新、邊啲有歷史, 唔多唔少都感覺到)
再加上神宮被高高o既樹林包圍,
有一種興世隔絕o既閑靜感覺。
好喇, 自我陶醉完之後,
出番內宮出面就係手信街。
不得不提下圖o既赤福(AKA-FUKU)。
赤福係一種伊勢o既出名甜點,
係用紅豆蓉包住糯米糕。
大家可能會話: 又係紅豆同糯米.......
無錯, 小弟都係咁諗,
如果唔係琴晚大老闆娘同小弟講一定要試,
小弟可能都係不屑一顧就揚長而去。
上圖就係一set三個o既赤福, 是為280yen。
(一盆有三個, 單位為「一盆」、「二盆」~)
先到下圖o既食券賣場,
同靚女姐姐講你要買幾多盆,
然後靚女姐姐會問你要幾多杯茶。
茶水無限量供應,
但當然, 各位唔好話買一盆, 而後成村人姨媽姑姐都黎飲茶咁失禮啦。
之後閣下可以隨便坐低,
靚女姐姐會將預備好o既赤福送到閣下手上。
熟識小弟o既人, 都知小弟最憎食一啲咬落口溶溶爛爛成口粉o既野。
例如係蕃薯呀、芋頭呀、粉葛呀、紅豆蓉呀咁。
無錯, 尤其是嗰啲甜到嘔o既紅豆蓉!!!!!
所以小弟都係抱住一試, 食過就算o既心情,
姑且食佢一舊, 唔好食就吐低走人。
五分鐘之後......小弟仆到咁走,
走去問小賣部, 赤福o既賞味期限(有效日期)去到幾時,
以便寄番香港俾爸爸媽媽姨媽姑姐堂表兄弟姊妹校長老師良朋好友。
好可惜, 小賣部嬸嬸告知小弟,
the day after tomorrow......(<---當然嬸嬸係同我講日文)
無錯, 好好食, 唔係一般o既好食, 而係非常好食。
連憎食紅豆蓉o既小弟都咁講, 就實冇錯。
小弟第一次食到所謂o既豆香!!!!!
而且第一次明白何謂甜而不膩!!!!!!
更加, 係小弟食過o既日本甜點中最好食o既!!!!!!!!!!!!
可惜寄唔到番香港......
大家有機會一定要試下伊勢o既赤福!!!!!!
盒裝一盒8個700yen,
一盒12個1000yen。
滿腦都係赤福,
都唔記得左添,
伊勢出名伊勢海老(即係龍蝦啦)
所以有好多龍蝦餅呀等等出售,
不過小弟食完赤福之後,
乜都冇興趣lu......
係呢間舖買左兩個豆腐冬甩食,
不過唔好食o既,
冇豆腐味, 而且凍冰冰。
燒蠔兩隻380yen,
龍蝦為1980yen。
係話模妨當年江戶時代, 個個湧黎伊勢參拜時市集o既盛世。
其中一間烏冬店,
售伊勢鳥冬, 可謂門庭若市,
排隊排到出店外。
加大為550yen。
另外仲有加蛋呀、加天婦羅呀咁。
俾左錢之後,
店員會交低一個木牌,
搵個位坐低,
無幾耐店員就會捧住烏冬嗌number。
(當然係用日文啦)
伊勢烏冬同一般日本烏冬唔同,
湯低唔係普通o既淡味湯底,
而係較味濃o既鼓油。
另外, 伊勢茶都係伊勢特產,
入口甘香, 生津止喝。
唔係做樣o既復古銀行,
而係真係打開門做生意o既銀行。
連銀行都應番條街o既design。
香港旅發局, 睇下人地咩叫旅遊業,
然後睇下自己, 連彌敦道啲地圖溶溶爛爛都冇人換,
仲學人話促進旅遊業。
行完外宮內宮加手信街,
都只不過係點幾鐘。
等巴士到下一個景點,
但要等大半個鐘......
然後, 突然間,
落狗屎......
仲要行雷閃電......
奇蹟地,
到左差唔多巴士到o既時間,
雨就停左。LUCKY~
搭CAN巴士到下一個景點。
伊勢安土桃山文化村,
小弟曾經考慮過黎唔黎好,
不過而家時間尚早,
就順道去埋啦。
於是,
小弟日本旅行史上最大o既騙案就發生左。
入場費為2500yen, 貴到hihi,
仲要入面差唔多全部設施都另外收費,
唔想逐個俾, 可以用3900yen買套票......
小弟計過數, 想去o既設施加埋都冇三個,
唔會超過1400yen,
所以只係俾2500yen入場,
入場再另外俾仲化算。
睇入場券同小冊子好似正正常常咁。
唔知咩係安土文化o既可以睇番小弟16/4 o既BLOG,
http://japsleevefish.blogspot.hk/2012/04/blog-post_16.html
唔知咩係桃山文化o既可以睇番小弟12/2 o既BLOG
http://japsleevefish.blogspot.hk/2012/02/blog-post_12.html
事實上係一個鬼影都冇隻o既主題公園!!!!!!!
(唔好意思, 上圖有兩隻......)
基本上啲設施都係俾啲小朋友玩,
但全部另外收費 (你話係機動遊戲都話丫, 可惜唔係......),
而且啲遊戲可能連小朋友都唔會想玩。
除左一啲爛鬼疑似展品,
同一啲就跌落地o既發霉展板之外,
冇乜有意義o既野......
唯一令小弟有少少期待o既,
係下圖o既安土城1比1復原模型。
不過入內要再俾低500yen。
城內, 頭四層係展覽館,
講述織田信長生平重要o既戰爭,有
桶狭間の戦、稲葉山城の戦い、本能寺の変等。
作為遊客, 啲資料可謂啱啱好,
但作成為日本人的話, 可謂膚淺之極。
成個主題公園(?)唯一可取之處,
就係上到城上o既景觀。
小弟黎到日本旅行,
第一次被欺騙:
俾香港o既旅遊書欺騙、
俾日本o既旅遊書欺騙、
俾公園個名欺騙......
呢個公園, 連小朋友黎到都未必會玩得高興。
3000yen, 可以燒一隻半伊勢海老,
3000yen, 可以拆15隻燒蠔,
3000yen, 可以買15包170g 薯片,
3000yen, 可以食5碗拉麵,
3000yen, 可以品嘗36個赤福,
3000yen, 可以由大阪去到名古屋,
3000yen, 可以睇四本輕小說,
3000yen, 可以幫襯三次燒肉放題,
3000yen, 可以係神宮求到三個護身符,
3000yen, 可以做好多野......但一定唔係黎呢個「伊勢安土桃山文化村」!!!!!!!!!!
大家
千祈千祈千祈唔好黎,
黎到都唔好入去!!!!!!
仲要因為巴士太疏,
要去下一個景點,
要等一個鐘車.......
還番啲金錢俾我,
還番啲時間俾我,
還番啲期待俾我,
還番啲Noradrenaline(腎上線素)同Cortisol(皮質醇)俾我!!!!!!
等左一個鐘車,
到下一個景點, 二見浦。
目的係去睇二見興玉神社o既夫婦岩。
俾200yen車錢去睇石頭!?!?
係,
都好過俾3000yen.......噢,
唔再講呢個話題。
落左巴士,
由東面進入,
會先經過龍宮社。
同中國一樣啦,
起得係海邊,
又同龍有關o既,
仲可以求啲乜丫~都係得嗰樣架啫。
再向西行,
經過條紅色橋,
就開始見到下圖o既夫婦岩。
好似話神社係供奉猿田彦大神,
而青蛙係神o既使者,
但小弟查過wiki, 好似唔多關事......
乜都可以神一番,
連下面舊石,
都因為個樣稍為有啲似大青蛙伏係小青蛙上面,
而特登整個牌介紹......
左邊大嗰舊係夫,
右邊細嗰舊係婦,
其他細o既係二奶 (<--唔好當真)
如果係夏至,
太陽會由兩舊石中間升起......
其實睇你點就個相機架啫......
當然,
下圖o既係日落。
因為神社o既吉祥物係青蛙,
所以連市內o既工地圍欄都造成青蛙公仔。
香港除左雪糕筒同埋修路工程路牌嗰個道歉男人樣之外仲有啲乜。
(仲要個樣一啲誠意都冇, 試下搵黃玉郎畫都好丫)
走人。
到二見浦JR駅,
外面睇就好靚,
但入面好頹,
仲要連入閘機都冇!?
冇錯, 搵極搵唔到售票處同入閘機,
行行就就上左月台@_@
實在唔知點好,
問人, 原來係上左火車,
車長行過o既時候同佢買......
原來呢啲就係真正o既細站,
仲要一個鐘得一班車......
(一年後回顧: 一日得六班車o既站都有=.=, 一小時一班算俾面)
搭到去伊勢市駅,
本身諗住唔再買野,
因為洗多左3000.......講左唔再提呢件事......
但實在忍唔住,
係車站o既手信店買赤福。
本來打算買兩盒8個,
點知得番一盒(真係咁好賣?),
於是只好買一盒8個加一盒12個。
再次搖三個鐘車番宿舍.......
真係好辛苦=.=
本身今晚食左兩個飯盒,
都幾飽下,
但食左一舊赤福之後,
忍唔住又食多左舊,
然後再食多一舊......
真係好好食!!!
去埋後日一轉京都,
可能今個月唔會再出遠門,
因為今日實在洗大左。
一來車費比較貴,
二來買左手信俾人,
三來無啦啦唔見左30......講好左唔再提家嘛
沒有留言:
張貼留言