剪髮

放假第二日,
係宿舍hea。

但有一件事一定要做,
就係剪頭髮。

上一次剪頭髮係黎日本之前,
即係11月尾,
到而家已經有五個月冇剪頭髮,
可以想象到有幾長=.=



點解平時放假唔剪?
因為日本o既髮型屋,
一般都係星期一休息,
同小弟o既拉麵店一樣......
仲要如果星期一放假,
補係星期二休息o既制度同小弟打工o既拉麵店一樣,
你話小弟要幾時剪......

而平時番工中午o既小休,
巴不得立刻番房休息,
所以真係搵唔到機會剪頭髮。

今日, 機會終於黎喇。

當然, 日本有嗰啲十分鐘剪好o既極速平價剪頭髮,
不過一場黎到日本,
都想試下正正式式剪個髮,
何況小弟所知o既十分鐘剪髮舖,
小弟住嗰區搵唔剽。

出左宿舍轉個街口就有一間好似平平地o既「床屋」。
把關o既有一個負責幫手o既中年男人,
同埋兩個負責剪髮o既兩個呀伯。

係度講多少少,
日本o既剪髮舖分「床屋」(TOKOYA) 同「美容室」(BIYOUSHITSU),
床屋做男客人生意,
主要提供剪髮、剃鬚等簡單服務,
而美容室主要做女客生意,
除左剪髮之外, 仲提供染髮呀、電曲髮、修甲等服務。
當然亦都有為男客服務o既美容室,
但女士就唔好入床屋喇。
點分床屋同美容室?
唔洗小弟講, 我諗大家見到, 比較過自然就會知。

一來小弟唔需要咩染髮呀電髮呀咁,
二來床屋一般都比美容室便宜,
所以小弟去床屋算, 何況又近呢。



講真, 學左咁耐日文,
都唔知剪頭髮o既術語,
咩「剪碎」呀、「偷薄」呀、「剷青」呀,
我諗你問一個大學畢業生相對應o既英文,
正常o既都唔會搭得出=.=
何況小弟只係學左五年日文。
小弟俾盡只係知「劉海」、「的水」o既日文......

最簡單,
就係俾張相個師父睇,
叫佢將小弟個頭還原......

於是睇落比較年輕o既呀伯就開始用噴壼噴濕小弟個頭。

神奇地,
佢地成個過程冇用過電剷,
一直都只係用剪刀一開一合, 一開一合咁剪。

好小心咁剪, 剪左成45分鐘左右。

以為佢只係幫年剪頭髮?
你就錯喇。
床屋多數提供一條龍服務,
除左剪頭髮之外,
仲會幫你剃鬚、剃面毛,
務求將你衣領以上o既地方,
除左頭髮、眼眉、睫毛之外全部剃個乾乾淨淨。
上至印堂下至頸項, 耳珠、耳殼,
總之見到有毛o既都會同你剃走佢......

可以睇得出,
對日本人黎講,
剪頭髮唔係單單只係將頭髮由長變短,
而係真真正正o既一種個人護理。

講番小弟個髮型。
復原度極高。
起碼小弟唔覺得有唔妥先。