雜談

AKB48:

今晚生意同平時一樣(咁靜),
可以做o既野得嗰幾樣:
食材準備、睇書、睇電視、睇手機短片

咁啱望向電視,
有個藝員神神秘秘咁係度介紹啲唔知咩。
原來今晚有個特備節目,
就係呃AKB48話「中繼」(錄影播放),
但實際上係「生放送」(現場直播)。



為左呃到足,
連報紙上o既電視節目表都同平時一樣,
目節同以往時段一樣, 隻字不提AKB48,
只係係「AKB48偽中繼」前個零兩個鐘先賣廣告。


只係為左呃一班女仔講心事/真話,
不惜做到呢個地步,
可以體會到AKB48係日本o既影響力,
同埋可見AKB48真係已經成為左日本o既國民偶像......

附帶一提,
AKB48實在太多人, 啲名又難記,
小弟到而家都只係認得兩三個=.=



狗公:

本來都唔想咁講,
但實在諗唔到其他用詞......
小弟詞彙匱乏, 對唔住。

講緊o既係拉麵店兩個後輩 尾原(20歲) 同 浜地(21歲)。

平時冇客就係度睇漫畫,
(小弟唔介意)
有客入黎都慢三拍先死死氣講歡迎光臨,
(小弟唔係好睇得過眼, 不過都算)
但只要有後生少少o既女生係店前閃過,
就會即刻掉低手上o既漫畫、唉瘋,
極速衝出店外, 隔半條街大聲嗌拉客......

明知普通學生唔會有錢食/ 亦都唔會有興趣食拉麵,
但照樣對住啲女學生拉客.......

又或者係對面便利店有新o既女生番工,
就成日過去買野,
又叫小弟快啲過去睇。
唔睬佢地又好似唔係咁合群咁。
死死氣過去望兩眼,
咪只不過又係眼耳口鼻齊全o既健全人士一個......

都唔想咁話佢地,
但小弟腦海實在好直接浮現嗰兩隻字......



唔洗做:

因為小弟仲有三個星期唔夠就離職,
所以係時候慢慢將啲工作交俾 尾原 同 浜地。
尾原已經炒飯炒得幾熟手,
浜地整拉麵都已經唔係問題,
食材o既準備亦都開始分俾佢地兩個做,
而今日, 小弟連開店o既準備同收工執拾都交俾佢地,
換句話說, 小弟冇野做......