日本人眼中的香港(人)

黎左日本都半年有多,
同過好多日本人傾偈,
包括同事、拉麵店o既客、
附近o既店o既人等等。

剔除一啲太過有見識,
又或者係太過冇見識o既兩頭極端意見
普遍黎講, 日本人眼中o既香港(人)如下:



1) 曾經俾英國統治過, 係一九唔知幾多年歸還番中國
2) 中國o既一個城市, 同中國其他城市冇唔同
3) 好多單車
4) 除左英文比較好之外, 其餘o既野同其他中國人一樣



對於日本人黎講,
佢地完全想象唔到係同一個國家入面,
香港有自己o既政府,
有自己o既入境管理、法律、教育制度。
所以除左知你識講幾句英文之外,
佢地覺得你同其他中國人一樣:
冇公德、污糟、冇人權、唔知外面世界、(<--你地啲日本仔咪又係)
好多版權問題、冇新聞自由等等。

而佢地叫你、或者係介紹你,
都只會話你係中國人, 而唔會特別講係香港人。

當然, 香港係中國o既一部份, 呢個係不爭o既事實,
而香港人都係中華民族之一,
但去到某啲情況, 例如講起中日關係、人o既教養等o既時候,
又的確好想佢地識得分開中國人同香港人......
但講極啲日本仔都係唔明, 亦都唔會想去明。




***一年後補記***

原先呢個blog係寫係yahoo
不過yahoo blog係30/12/2013執笠
所以呢度補番少少野
係yahoo blog o既一個留言
小弟覺得有價值係度作補充

留言者mansan at 03/02/2013 02:37 pm comment

既然 香港係中國o既一部份, 呢個係不爭o既事實,咁点解講起中日關係又唔希望同中國有关系呢？有福享時就系中國人，有難時就要同中國人有區別？


魷魚 at 03/03/2013 01:25 am reply

小弟唔知點樣用文字黎完全表達諗緊o既野, 但盡量。首先講中日關係o既情況: 以整體黎計, 日本人一定係中國人抱有敵意, 反之, 中國人亦然, 最基本o既原因係因為收到o既資訊層面問題, 只要你睇下中國國內同日本o既新聞報導就會知點解, 兩國o既報導字裏行間都以對方為威脅做前題, 於是人民好自然對對方懷有敵意。但香港, 基於新聞自由, 加上社會文化o既國際性, 所以觀點上「比較」中肯 (小弟比較過三地o既新聞)。於是去到一啲中日關係o既問題o既時候, 都會希望日本人知道自己係「比較」中立o既香港人, 而得到對方唔好一開始就起晒槓, 可以心平氣和慢慢講。呢度括住「比較」, 係因為始終香港人都係中國人, 作為當事人, 冇絕對o既客觀, 主觀上都覺得---例如釣魚台爭議---係日本o既不是。如果透過上文了解到小弟o既思路的話, 就不存在「有福享時就系中國人，有難時就要同中國人有區別」呢個問題。雖然而家的確有好多香港人係咁諗, 但小弟問心嗰句, 都覺得自己係中國人, 如果大吉利是講句中日打仗, 小弟都係會企中國嗰邊。多咀講多少少, 就係因為覺得自己係中國人, 所以先更加以中國o既醜聞而恥: 六四、大頭BB、地溝油、劉曉波、貪污、等等, 老套講句「愛之深恨之切」, 就係因為係中國人, 先更加睇唔過眼呢啲弊端。你試下問個荷蘭人對中國o既弊端有咩意見? 佢睬你都傻。但轉個頭黎諗, 中國o既同胞都要思考一下, 點解會有咁多香港人唔想認係中國人。係因為香港人自大?無事生非?