矢田寺(紫陽花) + 平城宮跡

仲諗住今日就算唔大雨都會小雨,
所以都帶備雨傘出街,
點知由出門口到番番房,
一直都冇落過雨=.=

今日o既目的地係奈良o既「紫陽花寺」--- 矢田寺。
「紫陽花寺」只係一個概稱,
指o既係出名紫陽花o既寺廟。
日本全國有四十幾間紫陽花寺,
而矢田寺只係近畿地區十間o既其中一間。

有關紫陽花,
之前「長居公園植物園」篇BLOG已經有簡單介紹,
係呢度唔再重複。
(http://japsleevefish.blogspot.hk/2012/06/blog-post_13.html)

不過講多少少,
因為紫陽花盛開o既時候,
正正係日本梅雨, 天氣多雨潮濕o既期間,
係以前醫學未發達o既時候,
呢個季節比較多人病發而死,
所以有唔少寺廟會種植紫陽花以供奉死者,
而其中紫陽花又多又靚o既寺廟,
就成為而家統稱為o既紫陽花寺。

今日小弟去o既矢田寺,
位住奈良縣大和郡山市,
寺內種有紫陽花約一萬株,
基本上一到左梅雨時期,
關西o既旅遊雜誌都會有介紹。

八點半起身,
搭地鐵到谷町九丁目,
行五分鐘到上本町轉搭近鐵, 近鐵郡山駅落車。
基本上近鐵站內都有好多廣告講矢水寺,
所以都唔洗怕唔知邊個站落車。
出左車站又有指示去邊度轉搭巴士。

搭宗良交通20號系統, 總站就係矢田寺,
而且到左開花季節仲會加密班次,
都唔洗怕去唔成。

雖然今日係星期五,
加上又係大雨過後, 天氣唔多好,
但全車滿座=.=
睇黎真係好出名。

十五分鐘就到總站,
天陰陰, 不過唔係落雨已經好好。

落左車跟住啲人行五分鐘就見到矢田寺入口。
門口兩旁都種有幾株紫陽花,
但呢個只係前奏。

入場費400yen, 但只限紫陽花花期先收費=.=
真係賺得就賺......
交低買路錢之後,
爬百零級樓梯咁啦。
沿路當然唔少得紫陽花。

然後就到上圖o既寺廟核心部份。
左手邊係個花圃仔,
種有唔同品種o既紫陽花, 並附有名稱介紹牌。
而右手面就係主角紫陽花花園。

先入去花圃,
睇下唔同品種o既紫陽花。

吊鍾形o既都係第一次見

赤紅o既紫陽花, 不過得呢一株,
而且花好少, 不過夠特別。

熱完身, 係時候走入紫陽花庭園喇。

其實真係形容唔到,
因為舖天蓋地都係紫陽花,
何其壯觀。
總之就係 紫陽花、紫陽花、同紫陽花。

呢條伴有紫陽花o既小溪,
謀殺左好多遊人唔少菲菻。

基本上已經唔可以用庭園形容,
因為高低起伏, 已經可以稱得上一條小型行山徑。

上圖冇搞錯, 唔係小弟唔記得轉直張相,
而係隻蝸牛真係向上爬。

影上面三張相o既時候,
不其然哼起一首歌:
All things bright and beautiful, all creatures great and small ♪~

上面三張相係咪有少少光猛呢,
因為唔知點解,
唔落雨不特止, 仲出太陽~~~

藍藍天空高掛我的夢♪~

由巴士站到矢田寺o既路段,
路旁有幾檔類似小販咁o既檔攤,
都係附近o既人種左啲野拎出黎擺賣,
有蔬菜水果、冬菇竹筍等。
其中有一檔賣布冧。
450yen一份, 又紅又大,
而且平時食黎食去都係蕉、橙、蘋果,
所以買左一份作為今日o既「每日一水果」,
又可以解渴。

等巴士, 旁邊停左一架的士,
原來係泥鯭的~每日300yen可以番出去車站。
不過小弟都係搭巴士走。

本身今日o既行程黎到呢度應該係尾聲。
不過一來時間尚早, 都只不過係兩點幾,
二來難得個太陽夠膽浦頭出黎見朕,
三來又順路,
於是回程o既時候, 係大和西大寺落車,
行十分鐘到平城宮跡兜個圈。

平城宮係日本奈良時代京城o既宮殿,
由舉行禮儀儀式的朝堂院同埋官員辦公o既官衙所組成,
不過明治時期被發現時, 只係得番一塊平地。
經多年o既挖掘、參考文獻, 再花上唔少時間,
而家先叫做復原左南門---朱雀門(1998),
同埋平城宮核心---太極殿(2010)。

由西面o既佐伯門入。

南面o既朱雀門。
奈良時時好多野都受中國唐朝影響,
(其實唔係淨係奈良時代=.=)
所以平城宮o既建築都係仿隋、唐o既樣式。
而南門叫朱雀門, 好明顯亦都係源於中國。
(東-青龍; 南-朱雀; 西-白虎; 北-玄武)

由朱雀門望向太極殿。

2010先復原完成, 就鮮出爐o既太極殿

入面係一個小型博物館,
展示一啲太極殿o既建築模式,
同埋復原時o既工序。

以前日奈良時代o既天皇就係坐係呢舊野入面(高御座),
睇太極殿出面o既祭禮等~
不過因為並沒有有關奈良時代o既高御座o既描述,
所以呢個只係參照現存京都高御座o既構想作。

由太極殿望出去, 遠處就係朱雀門。

遊覽完平城宮,
番番大阪已經五點幾。
反正經過天王寺,
於是去天王寺o既旅行社,
拎左啲旅行o既資料,
坐低係「毛'S BURGER」慢慢睇。

日本基本上係冇快餐店的,
因為冇一間野係「快」,
包括「勿當奴」、「毛'S BURGER」等。
係受銀處點左食物之後,
得到o既只係一杯汽水同一個數字牌,
其他食物? 十至十五分鐘後由專人送到。
冇錯, 服務係好好,
但如果係趕住去交贖金的話,
好遺憾, 人質已經被撕票=.=

順帶一提,
上圖o既炸蝦餅漢堡薯條汽水套餐+炸洋蔥圈,
盛惠970yen。