富士山登山 第二天

係咁惡劣o既環境下,
又點可能瞓得好。
瞓下醒下咁, 好快就到左凌晨0330。
唔係自己醒,
而係被周圍o既人o既執野o既聲嘈。

一來為慳水,
二來小弟又唔係特別介意,
所以冇刷牙, 直接出去小屋前面o既平台等日出。
亦因為咁, 所以霸到個頭位。

琴日剛到埗就大霧連連,
起初都擔心會唔會睇唔到日出,
但出到平台, 只見萬里無雲!

都冇乜好介紹喇,
大家睇相啦。

富士山登山 第一天

等到頸都長,
可以話係今次日本Working holiday o既重頭戲,
富士山登山o既日子終於黎喇!!!

六月中就已經報左名,
俾左3萬yen鬆啲,
參加左三日兩夜o既富士山登山&鉢巡り。
(鉢巡り即係圍住火山口行一圈)

點解唔自己去?
之前問過其他住係日本o既fd,
不過佢地都夾唔到時間,
而一個人上山又危險,
所以咪報團囉。

六點起身梳洗,
做最好準確,
然後就搭車去新大阪駅o既集合地點喇。
搵集合地點時有少少阻滯,
不過仍早左到達。

係新大阪駅外面o既旅遊巴士場,
點左名之後就上車。
上車前見到下圖o既巴士,
諗起《咲-saki- 阿知賀編episode of side A》,
(怜、病んでさえじゃなければ......)
於是影低左, 並唔係小弟坐o既巴士XP

回程

今日回程, 由大田市番大阪,
早上六點幾身搭0712 o既JR出發,
途中轉N次車, 最長嗰野,
要連續屈係車箱5個小時=.=

仲要臨番到關西時,
因為大阪駅同新大阪駅之間好似話有交通意外,
所以班次延誤, 結果比預定遲左成兩粒鐘先番到大阪.....



然後又要準備聽日o既旅行......
(聽日開始一連三日先係戲玉!!!)

聽日開始一連兩、三日未必上到網,
up-date唔到, 請各位見諒。



之前買o既青春18用盡了~
五個印仔都係唔同o既車站名

下面嗰行: 右-熊本駅; 中-鹿兒島中央駅; 左-宮崎駅
上面嗰行: 右-大阪; 左-米子

石見銀山 (勝源寺 + 井戸神社 + 羅漢寺 + 山吹城跡 + 龍源寺間步 + 佐毘売山神社)

今朝0830起身,
執好野先到樓下食早餐,
因為今次住呢間酒店有免費早餐。
(其實咪又係包埋係住宿度=.=)

食個夠, 再撻佢幾個麵包,
0930出發, 由出雲市駅搭到去大田市駅。

島根 (松江城 + 出雲大社)

補番張地圖先。
上圖就係小弟呢三日行程o既地點喇。
右手邊圓圈就係小弟住開o既大阪,
右手邊第一粒星就係琴日o既鳥取砂丘。
中間兩粒星就係小弟今日去o既松江&出雲。

係JR松江駅搭巴士,
十五分鐘左右就到松江城附近。

上圖o既銅像, 就係最後一代城主 松平直政 o既銅像。
銅像o既姿態取自「大阪夏の陣」,
當時為德川家康勢力出戰, 只不過係14歲。

鳥取砂丘

繼續係旅行o既日子,
今次係去鳥取、島根一帶。
香港人未必對呢兩個縣太熟識,
因為呢兩個縣景點比較少又唔大路,
加上交通唔太方便,
正常人遊日本, 一般都未必會考慮呢兩個地方。

早上起身,
因為搞錯左時間o既關係,
結果miss左0715嗰班車,
下一班要0847=.=
都話左交通好唔方便架啦......

搭六個幾鐘車,
終於到達鳥取駅,
時間已經係1509(<--冇打錯時間)
好在而家係夏天,
個太陽唔到七點都唔落山,
加上小弟今日個景點冇時間限制,
所以冇問題。

大阪天神祭

琴晚1900係別府坐巴士,
0800先番到黎大阪,
仲要轉地鐵,
番到房都差唔多成九點。
即刻沖涼然後洗衫。

順帶一提,
出發前管理員同小弟講,
22/7會有新同房黎入住,
今日初次見面, 係台灣人。

乾衣o既同時煮野食,
順便燒幾集動畫。
去左六日九州,
啲o既時間都唔夠,
莫講話睇動畫,
積左成廿幾集未睇......

去九州o既行程咁緊密,
一來係想用最短o既去最多o既地方,
二來係因為今日, 25/7,
係日本三大祭之一, 天神祭o既日子。
其實天神祭由由24/7開始,
不過一來對啲前奏興趣不大,
二來九州個trip,
要去埋別府的話,
點都Plan唔到24號番到黎。
三來重點係今晚。



講番正題。
之前同一幢舍宿o既台灣人邀請小弟一齊去睇。
好耐冇試過集體行動,
間中同其他人交流下一齊玩都唔錯丫,
於是應承左。

不過由九州啱啱番黎實在太攰,
所以分批出發。
小弟跟同一幢宿o既香港女仔MHT小姐一齊去。

好似話五點幾係南森町地鐵站集合,
因為早左到遲,
於是打算行去天滿宮睇下啦。
順帶一提, 天神祭主要由天滿宮負責。

呢啲大時大節,
就算唔睇地圖, 只要跟住啲人行,
就自自然然會去到有野睇o既地方。

去到天滿宮o既門口,
好多人塞晒係度。
完來係啲神輿o既行列未出發晒,
仲出發緊。



其實天神祭o既重頭戲, 即係今日,
係下午神輿由天滿宮出發,
然後係陸上巡遊,
然後再放上船,
係河上面再巡遊+放煙花。

因為太多人o既關係,
都唔係好睇到做緊乜,
只可以舉高個相機盡可能相到就影。

小弟都唔知做緊啲乜,
所以解說唔到喇,
大家睇到o既相亦都係小弟睇到o既野。

九州最後一日 別府 (地獄溫泉)

其實今日o既行程得一個,
就係地獄溫泉。
係JR駅o既旅遊中心睇資料,
要睇晒八個地獄, 車費要880yen,
但一個別府1日pass要900yen。
小弟最後買左。

傻的嗎? 非也,
因為1日pass仲附帶其他優惠券,
其中包括地獄溫泉入場套票。
每個地獄550yen,
套票包晒八個地獄2000yen,
但用1日pass o既優惠券的話,
只雖1800yen。
即係補番巴士條數, 仲賺左180yen。

最緊要係
落巴士唔洗搵散紙!!!!
show下pass就落巴士
Yo~ check it out~

九州第五日 高千穗 (高千穗峽 + 荒立神社 + 天岩戸神社 + 天安河原)

七點半起身,

因為住嗰間旅館比較近巴士站,
老定得濟, 結果miss左班巴士。
又係個幾兩個鐘先得一班o既巴士。

本身打算第一站先去天岩戸神社同天安河原,
結果而家要改變計劃,
先到高千穗峽遊覽。
冇錯, 就係琴晚影瀑布嗰度,
不過琴晚黑漆漆除左條瀑布之外乜都睇唔到。

又再行一次嗰條又斜又九曲十三彎o既路。

九州第四日 宮崎 (鵜戸神宮 + 鬼之洗濯板 + 青島神社 + 高千穗神社夜神樂 + 高千穗峽真名の滝)

今日比之前瞓晏左一個鐘咁大把啦。
0700起身, 梳洗完執行里check out。
先到宮崎駅o既locker鎖起個背包,
然後到駅前o既巴士站等巴士。

今日o既行程係宮崎o既沿岸,
睇鵜戸神宮、鬼之洗濯板、同埋青島神社。

琴晚上網check,
話宮崎呢兩日都落雨,
真係十萬shit。
聽日o既高千穗唔洗玩啦T_T
晨早流流已天陰陰,
真係保你大唔好落雨啦唔該......

第一站先到最遠o既鵜戸神宮,
因為班次疏, 同埋鬼之洗濯板必要時可以skip,
所以去左最遠o既景點,
回程時睇情況再調整。

不過係去鵜戸神宮o既途中,
已經見到鬼之洗濯板。

咩係鬼之洗濯板?
其實係宮崎市至日南市沿岸一帶o既地形。
陣間再講。

九州第三日 鹿兒島 (櫻島 + 月讀神社 + 黑神鳥居 + 湯之平展望所)

相片已補



琴晚係網吧訂嗰個plan係六個小時,
2343check in, 0230瞓,
0530就要起身預備check out。
點知個職員而家先黎洗廁所=.=

於是先check out先,
然後到JR鹿兒島中央駅前o既廁所刷牙洗面=.=
時間都只不過係0600......

頂佢個肺落雨........
唔係話好大,
但耽住落......

唔理啦, 照計劃到碼頭坐船到櫻島。
櫻島係鹿兒島縣o既一個火山島,
上面住左五千人。
基本上成個島就係一個火山,
而呢個火山仲係活架添......

計過數, 買一個叫 CUTE o既pass有so,
1000yen一日內任搭鹿兒島市營交通。
(路面電車、櫻島輪船、市營巴士、櫻島觀光巴士、鹿兒島觀光巴士等)
而輪船碼頭就係其中一個銷售點。
琴晚因為到達鹿兒島時已經好夜,
JR嗰邊啲旅客中心已經收晒皮,
加上見櫻島輪船廿四小時都有航班,
售票處冇理由唔開掛。
於是打算今日一早去買啦。

點知佢就係唔開, 吹咩=.=
0730~1900營業......
為左慳錢,
唯有等到0730先買票上船,
結果打亂晒今日o既行程。

一上船就已經見到櫻島。
(其實係岸邊都見到=.=)
雖然雨叫做停左,
不過仲係好多雲T_T

九州第二日 熊本 (草千里/阿蘇火山博物館 + 阿蘇火山)

琴日編野花左好長時間寫,
瞓得覺黎已經成點鐘=.=

check天氣報告,
仍然係話今日會落雨的......
噢...我o既阿蘇呀T_T
(再一次強調, 唔係蘇施黃!)

早上六點鐘爬起身,
半個鐘梳洗好check out埋就出發去阿蘇。
先將背包放係JR熊本駅o既locker。
成日都諗, 香港係咁話自己係旅遊天堂,
但就連鐵路站一個locker都冇......
locker真係好幫得手架! 背包客o既恩物

正如琴日所講,
因為天雨關係,
由肥後大津駅開始, 列車行駛唔到,
於是要係肥後大津駅落車,
轉搭JR安排o既接駁巴士去阿蘇駅。

天氣一直都唔多穩定,
成個天都係雲,
仲間唔中落毛毛雨添,
再望上群山之中,
啲山頂都係俾厚厚o既雲遮住......

我o既阿蘇T_T



落左接駁巴士,
去到阿蘇駅登山巴士站,
更加得到一個令人咀喪O既事實:

因為天雨關係,
部份路面被沖毁,
加上遊客少,
一日只有四班車來回!!!!!!
(本身都有十零班架......)

不過因為預左時間搭早車,
所以比起改左時間表o既第一班巴士仲要早到,
算係不幸中o既大幸。
可惜因為回程班次時間所限,
要比原先o既計劃提早完結阿蘇旅程,
如果唔係搭唔到車去下一站「鹿兒島」!



之前一直都陰天落雨,
不過係等頭班登山巴士嗰個零鐘,
竟然出太陽!!!

出太陽小弟係歡迎,
不過可唔可以留番小弟上左山先出太陽呢?
(下圖見到o既山已經係阿蘇山一帶)

九州第一日 熊本 (熊本城)

琴晚結果加埋都唔知瞓唔瞓到有5個鐘@_@
(前因情參閱琴日o既BLOG
http://japsleevefish.blogspot.hk/2012/07/blog-post_18.html)

1000到達熊本JR駅。

向九州出發

琴日真係晒到hihi。
(其實呢幾日都係......)
由祇園祭番黎,
第一時間沖涼然後洗衫,
因為黎緊七日小弟會落九州,
唔洗衫的話趕唔切。

然後由琴晚到而家(17:33),
都係hea住咁執行里啦,
都執得七七八八。

但又要執房啦,
因為之後都冇乜時間再慢慢執,
唔執定先真係唔掂。

再hea多陣,
2000, 小弟就會出門口,
去搭夜行巴士到熊本!

_______________________________________________



後記:

1900最後執行里,
然後出common食飯hea埋剩低o既少少時間去。
2000就出發喇。

小弟嗰架夜行巴士2200先開出, 2140 集合,
不過因為怕唔熟路搵唔到集合地點,
所以2110已經到達=.=

京都祇園祭

祇園祭,
同大阪天神祭,
以及東京山王祭,
並稱日本三大祭。

869年, 京都一帶發生瘟疫。
當然, 係以前,
有咩天災人禍都入牛鬼蛇神數架啦。
當時o既瘟疫,
被認為係「牛頭天王」(又名素戔嗚尊)作祟而起,
(日本o既神有好多都係有幾個名, 又或者同一讀音唔同寫法)
為左平息神o既怒氣,
於是祇園社(八坂神社o既前身)係附近一帶舉行祭典,
製造66支鉾(即「矛」), 用黎封印瘟疫。

後來斷斷續續, 又多番變更,
(呢兩句真係無敵!)
就變成今日o既祇園祭喇。
(好一個總結!)

山鉾o既巡遊, 0900係烏丸一帶出發,
於 河原町 同 京都市役所 轉彎,
然後收檔。
見下圖:

收費觀賞席係巡遊o既最尾段。
當然, 既然有得免費睇的話,
小弟唔會特別花錢去坐觀賞席啦。
於是小弟去左上圖右下角o既河原町觀看。

點解揀係轉角位睇而唔係直路睇?
因為小弟買日本o既旅遊書, 當中介紹,
話啲山鉾轉彎o既時候比較有睇頭咁話。



小弟0830左右就到達河原町駅,
但已經係人頭湧湧......

上賀茂神社+下鴨神社+ 祇園祭

今日係小弟逗留係京都o既第二日啦。

HKY小姐因為要番學,
所以八點就出左門口。
小弟則瞓到十點幾先起身。

十一點半出門口,
向HKY小姐o既大學進發,
同佢共進午餐。

不過俾HKY小姐點左一鑊甘o既。
HKY小姐俾小弟o既短訊, 明明係:
202號巴士, 祗園轉207
不過上左車發覺唔對路,
再三發短訊問HKY小姐,
原來唔係207, 係201......

小弟冇怪佢,
但好想知點解1可以變成7???
點睇個電話鍵盤,
都唔覺得係一個正常o既打錯字方式=.=

宇治川鵜飼

今日九點幾起左身,
執好三日兩夜o既行里之後,
就出發去京都。

1130到達京都七条,
多人到喊T_T
因為呢個係京都祗園祭,
而呢幾日更加係最重頭嗰幾日。
不過今日都仲未有太特別o既野睇,
所以今日o既目標唔係祗園, 而係宇治。

一直有跟開小弟個BLOG o既,
都會記得小弟之前去過宇治,
( http://japsleevefish.blogspot.hk/2012/02/blog-post_12.html )
今次再去做乜?
今日o既標題已經話左俾大家知啦。

不過去睇鵜飼之餘,
順道買少少野咁啫。

三點去到宇治。
久違了五個月o既宇治。
因為之前已經去過平等院同宇治上神社,
所以買完野都冇乜好做,
唯有影下幾張日本風情畫=.=

最後一日......得閒

過埋今日,
聽日開始就周圍去喇!!!

八月o既行程亦都已經firm左八成,
yes。

錢用得比預期多 t_t

還有,
幾排九洲落雨落到hihi
日本o既天文台更加用「前所未遇過」黎形容。
已經死左26人, 6人失蹤......

可唔可以係我去之前停雨=.=

執房

開始係時候執房喇,
因為後日開始就會不停咁去旅行,
就算係番番房, 逗留時間都唔會超過半日。
所以而家唔執,
就真係冇時間執......

還記得初初搬入黎o既時候,
間房係咁的......

但而家間房變成咁的......

雜談

雜談一: 新娘結婚了, 新郎不是我

之前係BLOG度見到WWH先生o既留言,
問小弟幾時番香港,
回左佢留言, 但一直未有下文,
於是直接打電話問。

以為係WWH先生結婚想請小弟飲。
原來唔係,
不過雖不中亦不遠矣。
係CWC小姐結婚, 想請小弟去。

不過時間係十月尾=.=

真係想應邀去的......
不過又實在真係唔想提早完結
呢個一生一次o既日本之旅,
點算好>.<

另外, TWT小姐都好似係年底結婚......

黎喇黎喇,
啲小學、中學(女)同學o既結婚高峰期開始黎喇......



雜談二: 車票

雜談

雜談一: 科學家

一般人都會覺得科學家好認真,
成日困自己係實驗室, 埋頭苦幹。

「搞笑」同「音樂」好似同「科學家」風馬牛不相及。
但其實科學家都有搞gag o既時候。

事源琴日同LY先生MSN,
佢SEND左條LINK俾小弟。
係一個外國女博士生(?)將Lady Gaga o既一首歌改歌詞,
仲要載歌載舞=.=

內容係講話諗住一心做研究,
拎好好o既data然後筆業,
點知撞著個bad project.....

點解有啲身同感受!?

順帶一提,
佢所有服飾都係實驗室用品......
真係幾有創意......

大獲

初初本來計劃,
而家呢度住到3/8,
然後去靜岡個friend度住幾日,
9/8去東京。

點知今日得知,
個friend有啲事要番屋企幾日
(日本人一般出黎做野都會搬出黎自己住)
咁啱搭正左我去佢度嗰幾日。

佢本來都話,
趕少少的話,
可以中間番番靜岡一兩日,
不過見佢咁趕頭趕命,
反而小弟唔係咁好意思。

後來夾掂左,
小弟2/8去佢度, 佢5/8先番屋企。
不過而家個問題係,
5~9/8點算=.=

基於某啲原因,
小弟要9/8先去東京, 冇得遲冇得早=.=
(心水清o既人可能已經做到10~12/8發生咩事)

點算......

平淡又一天

今日仍然係屈係房,
睇下書、上下網咁。

晚上打算整個偽福建炒飯食,
(冇冬菇、火鴨粒、芥蘭,
 唯有用蝦、魷魚、洋葱頂當)
點知蠔油落重手左,
鹹到 ><
檢舉這篇POST

平淡的一天

今日仍然係冇野做,
留係房hea下、PLAN下行程、
同埋上吓高登咁。

晚上整帶子魷魚蝦仁炒西芹,
不過個汁唔小心落得多左水,
有啲稀=.=

大家會問點解小弟好似日日都屈係房咁。

一來真係要PLAN行程啦,
二來, 而家唔唞的話就冇機會唞......
由十五號開始,
地獄式o既連續旅行就會開始=.=

七夕OSAKA天の川伝説 + 大阪天滿宮

七夕, 對華人圈子黎講唔係默生(<--唔記得正字點寫=.=)
中國舊曆七月初七o既節日。
相傳天上o既牛郎織女,
一年只有呢一日先可以靠鵲橋相會......

古時, 中國將七月七日叫做乞巧節,
因為織女負責織野嘛,
所以古時女性乞巧,
就即係希望可以擁有靈巧o既雙手織野。
一來七月七日, double seven,
而「乞」同「七」又音近,
所以後來變左七巧節等好多唔同o既稱呼。

過到黎日本, 唔知點解七巧節變左做
將願望寫上紙條然後綁上竹樹上許願o既節日......
日本人真係好鐘意許願=.=

日本明治維新之後,
將所有節日格硬轉晒做新曆,
所以本身係舊曆o既節日,
變左係新曆七月七日舉行,
不過有啲地方, 例如仙台o既七夕,
會係八月七日舉行。

不過轉左係西曆七月七日,
有一個問題, 就係唔知點解新曆七月七日好多時都會落雨,
變左好多戶外o既祭典都搞唔成=.=
呢個時候日本人就會話,
個天都為牛郎織女而哭......



直到琴晚, 都仲係落雨落到HIHI......
上天氣予告, 都係話黎緊一個星期都會係落雨......
好啦, 本身今日打自去京都o既,
都只好cancel啦。

點知今日中午起身,

出太陽.......

^$#@*(#^)(*&^%$*&(

再上天氣予報睇,
黎緊一星期, 多雲、或者係晴天......

香港個天氣予告已經唔準架啦,
睇黎日本o既都不遑多讓......

難得好天, 加上屈左係房都有一個星期,
係時候出動喇。

京都o既活動因為俾天氣報告fake左去唔成,
但大阪都仲有function家嘛。

於是就去左天滿橋,
睇一個叫「OSAKA天の川伝説」o既function。

OSAKA即係大阪啦,
而日本人稱銀河為「天の川」,
直譯就係天上o既河流。

個function,
其實係係條河度撒一啲藍色o既LED燈球,
搞到條河有好多藍色光點咁啦。
就咁聽落好似冇乜野咁,
所以小弟當初都冇乜特別興趣,
但反正得閒, 咪去下啦。

個function1900開始,
小弟1830去到,
個天都未黑齊。

都巿閒情 之 豉椒炒硯

唔知由幾時開始,
呢度由旅遊台轉左做生活台=.=

其實小弟都想出下街,
不過係咁落雨......
已經連續成個星期,
睇下星期o既天氣予報,
都係落雨落雨同落雨=.=

本身打算聽日去京都,
都因為落雨而唔想去......

今日開始PLAN第二個遊行,
目的地係鳥取縣同島根縣。
香港o既朋友對呢兩個縣唔認識係正常,
因為係鄉下地方, 加上景點不太集中,
不過有小弟好想睇o既野。
到時去得成, 番黎寫報告俾大家睇。

於是, 日日困係房,
除左PLAN行程之外,
唯一o既娛樂就係煮野食。

今日o既午飯係意粉 同埋 西蘭花炒蝦
點整?都係唔講喇,
咪又係將所有野,
適量地酌略炒埋一齊......

食完午餐, 然後又要諗晚餐食咩好。

其實呢幾日行超市見到有硯賣,
就心思思想整豉椒炒硯。
琴晚問左屋企人點整,
今日就急不及待買料煮黎食喇!

不過正如琴日o既BLOG講過,
啲中華料理材料比較貴=.=

李錦記蠔油  389yen
鷹粟粉          118yen
辣椒乾          115yen
豆豉              98yen
糖                  148yen
青椒              38yen
洋葱              68yen
硯                  298yen

於是淨係一個餸都已經1272yen  =.=
係香港大排檔食都係六十幾到七十幾蚊啫.......

不過就係想整黎食XD



先用滾水煮到啲硯八成熟, 撈起備用。
用油、蒜頭、洋葱、青椒、辣椒開鑊,
然後推個汁(蠔油、榶、鷹粟粉、水),
兜兩兜之後加埋啲硯炒。
搞掂

初初都擔心咁貴買啲料番黎,
煮得唔好食會浪費晒......
點知意外地同大排檔o既出品近似!!!!!
只係鑊氣差左少少。

果然有蠔油, 即刻唔同晒!!!

同埋花多少少錢買辣椒係值得的!!!

清碟!!!
食多幾碗飯都仲得!!!

好滿足o既一晚

都巿閒情 之 蝦仁炒飯

因為係拉麵店做左半年,
日日都拎住個鑊炒野,
搞到而家煮野食,
都淨係識炒=.=
不過炒過o既野食又真係香口啲o既。

遺憾係宿舍個爐火唔夠猛, 鑊氣唔係好夠。
加上冇中式鑊, 唯有用個深少少o既煎PAN頂當......

今日o既午飯係蝦仁炒飯,
材料有:

蝦仁 --- 適量
白飯 --- 適量
洋葱 --- 適量
甘筍 --- 適量
蛋     --- 適量

配料有:

油     --- 適量
鹽     --- 適量
味精 --- 適量
椒鹽 --- 適量
醬油 --- 適量

煮法:

將所有野酌略咁炒埋一齊,
因為時間關係, 已經完成左=.=
仲有碟炒雜菜添......

退休生活(ANYWAY, 點解PLAN旅行行程可以咁痛苦......)

今日本來想早啲起身的(0900)
不過一來琴晚夜瞓(其實係瞓唔著)
二來慣左十點幾十一點先起身,
結果今日又係瞓到十一點=.=

起身PLAN左一陣九洲旅行行程之後
(冇錯, 仲PLAN緊......)
點零鐘左右整午餐

終於PLAN掂喇T_T

呢三日係度不斷咁PLAN九洲個trip。
其實都唔係「不斷」o既=.=
不過每日都花四五個鐘左右......

但係冇諗過要花咁多時間......

上次去東京,
但為只係係東京市內,
加上東京交通方便、景點集中,
所以好快就PLAN好。

但今次講緊係成個九洲,
省過省講緊係兩個鐘以上,
仲要車又少、景點又疏,
真係好難PLAN......

繼續PLAN旅行

正如果日講過,
而家PLAN緊18/7去九洲旅行。

真係PLAN到頭都爆。
初初諗住買嗰PASS四日任搭巴士。

但經過呢兩日係咁PLAN係咁PLAN之後,
結果都係放棄利用巴士移動。
一來計番條數, 就算買PASS都貴過搭鐵路
二來巴士啲時間比鐵路更大限制
三來又要搵上車落車o既地點
四來啲長途巴士又要預約

結果都係搭番JR......

今日總算PLAN到一條算係咁o既路線,
不過好遺憾, 礙於順唔順路o既問題,
焗住去唔到大分縣o既別府地獄溫泉T_T

半年大事回顧

話晒都黎左日本七個月左右,
而且打工o既事已告一段落,
就容許小弟係呢度回顧番打工o既日子啦。

諗番起一開始12月o既時候,
搵左成個月都搵唔到工,
嗰種焦慮同徬徨, 真係...........

........已經唔記得晒=.=



27/12第一日番工。
知道有工做嗰下係好開心,
不過唔知頭唔知路,
連番幾多日, 一日番幾多個鐘都唔知就開工,
只可以話當時o既自己太笨柒。
不過冇計, 嗰時實在太需要工作,
冇得再話講三講四。