魷日記: 宇治川鵜飼

今日九點幾起左身,
執好三日兩夜o既行里之後,
就出發去京都。

1130到達京都七条,
多人到喊T_T
因為呢個係京都祗園祭,
而呢幾日更加係最重頭嗰幾日。
不過今日都仲未有太特別o既野睇,
所以今日o既目標唔係祗園, 而係宇治。

一直有跟開小弟個BLOG o既,
都會記得小弟之前去過宇治,
( http://japsleevefish.blogspot.hk/2012/02/blog-post_12.html )
今次再去做乜?
今日o既標題已經話左俾大家知啦。

不過去睇鵜飼之餘,
順道買少少野咁啫。

三點去到宇治。
久違了五個月o既宇治。
因為之前已經去過平等院同宇治上神社,
所以買完野都冇乜好做,
唯有影下幾張日本風情畫=.=

最初好似話今日會落雨或陰天,
不過一如既往地......唔準,
今日晒到HIHI。
咁講真, 好過落雨o既。

呢位呀伯間住水釣魚, 真型!

上圖就係小弟陣間會睇o既鵜飼o既資料,
成人1800yen, 不過買飛同上船唔係呢邊。

過左橋去到中之島公,
再向上遊行就會見到養住鵜o既小屋。

鵜, 會將捉到o既魚暫時存放係喉嚨,
(不過同鶶鵝唔同啦)
古代中國、日本人就睇中左呢點,
養鵜黎捉魚, 陣間再詳細講。

上圖就係售票&上落船o既地方。
六點開始售票, 六點半開始上船,
先到先得。

又一次迎來宇治o既黃昏。

有細船同大船。
一開始先填滿細船,
最多載客33名。
小弟排得算前,
不過都要上第二首細船。
不過後面仲有成村人等緊上船=.=

差唔多七點, Let's go!!!

啱啱開始出發,
仲未咁快有野睇,
就係船伕做介紹o既時間。

而家全日本只有13個地方做鵜飼o既表演。
當然, 叫就叫「鵜飼」, 但唔會就咁養住佢算數啦,
而係真係會示範點用鵜黎捉魚。

其中京都宇治o既鵜飼比較出名。
一來係因為比較就腳啦。
二來係因為全日本為數不多o既女鵜飼師,
宇治就佔左兩個!!!

船伕話全日本近期落大雨,
應該差唔多全部地方都停航緊,
不過京都因為早停雨,
所以前幾日先開番擋(真好采......)
睇下圖就會見到,
岸邊o既石灘有兩節色,
淺色o既就係之前水漲後淹過o既地方......
差唔多上到橋架喇喎=.=

唔知幾時有一隻唔係鳻o既大雀走左黎撐場=.=

而兩位女鵜飼師同埋大師父亦都準備。

用鵜o既捉魚方法,
就係將未食飽o既鵜,
用繩綁住佢頸o既底部,
令到鵜捉到魚, 都唔可以吞落肚,
只可以留係喉嚨,
然後鵜飼師就會拉佢番上水,
用手唧番鵜喉嚨o既魚出黎。
下圖就係女鵜飼師綁繩時候o既倩影。

一切準備就綷, 鵜飼SHOW正式開始。

鵜企住o既竹筐,
其實收蔵住其餘o既鵜,
每個竹筐分開兩半,
半邊放一隻。
呢隻拎黎做介紹,
所以先放出黎俾大家睇,
不過隻鵜已經急不及待飛撲落水

用鵜捉魚, 正式開始。
下圖你會見到有啲繩插落水入面,
其實係被綁住o既鵜潛左落水捉魚。

然後女鵜飼師如果察覺有鵜已經捉到魚,
就會拉佢上水, 用手唧番條魚出黎。

下圖係另一位女鵜飼師。
佢會用硬物敲隻船黎嚇啲魚,
啲魚一驚, 就會搵地方聚埋一齊,
而多數就係聚係船頭個火把下面,
於是鵜就可以更有效率咁捉魚。

可能因為個個人都係注意住捉魚嗰個女鵜飼師,
呢個敲船o既女鵜師好快就住意到小弟影緊佢,
所以特登坐定定望鏡頭......
真係識攝鏡=.=
本身佢仲對小弟伸脷,
不過縮得太快影唔到 OTZ

下兩張圖影緊o既係女鵜飼師用手唧啲魚出黎。
不過天又黑, 女鵜飼師又黑, 隻鵜又黑,
其實唔係好見到佢做咩。
下面第二張相蒙蒙地,
但嗰條白色o既野就係魚。
(冇計啦, ISO已經推到4000架喇......)