魷日記: 京都祇園祭

祇園祭,
同大阪天神祭,
以及東京山王祭,
並稱日本三大祭。

869年, 京都一帶發生瘟疫。
當然, 係以前,
有咩天災人禍都入牛鬼蛇神數架啦。
當時o既瘟疫,
被認為係「牛頭天王」(又名素戔嗚尊)作祟而起,
(日本o既神有好多都係有幾個名, 又或者同一讀音唔同寫法)
為左平息神o既怒氣,
於是祇園社(八坂神社o既前身)係附近一帶舉行祭典,
製造66支鉾(即「矛」), 用黎封印瘟疫。

後來斷斷續續, 又多番變更,
(呢兩句真係無敵!)
就變成今日o既祇園祭喇。
(好一個總結!)

山鉾o既巡遊, 0900係烏丸一帶出發,
於河原町同京都市役所轉彎,
然後收檔。
見下圖:

收費觀賞席係巡遊o既最尾段。
當然, 既然有得免費睇的話,
小弟唔會特別花錢去坐觀賞席啦。
於是小弟去左上圖右下角o既河原町觀看。

點解揀係轉角位睇而唔係直路睇?
因為小弟買日本o既旅遊書, 當中介紹,
話啲山鉾轉彎o既時候比較有睇頭咁話。

小弟0830左右就到達河原町駅,
但已經係人頭湧湧......

雖然半個鐘之後就有巡遊,
但路仍然未封,
車仲可以行, 人仲可以過馬路。

警察係路邊用繩圍起左觀賞區,
不過已經企滿晒人=.=
小弟因為一個人行動,
加上又唔係話肥, 勉勉強強,
叫做攝左係行人過路處傍邊o既觀賞區o既最邊邊。
見下圖右手邊人仔。

(藍色線: 封鎖線, 紅色線: 後期封鎖線)

小弟真係好好采,
因為守小弟嗰block個警察超惡,
再人有想攝埋黎,
即刻勁大聲叫啲人唔好停留,
話影響其他人過馬路,
又用手撥佢地走.......

小弟真係未見過日本警察咁惡.......
不過又難怪o既,
多一個之後又多一個,
結果只會積晒啲人係度,
其他人唔洗行,
亦都對一早黎霸位o既人唔公平啦。

不過就下圖所見,
其實都已經堆左好多人係度=.=

上圖有啲木桶,
有何用處,
稍後分曉。

雖然巡遊0900開始,
不過啲山牟要0945左右先過河原町。
換句話說, 小弟仲要等個幾鐘。

其實一直都諗,
而家就話俾人過馬路啫,
但條馬路遲早都要封架,
咁封左馬路之後,
馬路中心咪又變成觀賞區?
於是小弟就一直謀住呢個可能性!

果然,
到左九點半左右,
警察開始封路,
而一眾看官亦都對馬路中心虎視眈眈!

當警察一封完路, 話「得」o既同時,
(都虧啲人肯等到警察話得)
所有近水流臺o既觀眾即刻以極速衝出去霸頭排。
嗰刻覺得其實日本人有過半人口都可以去參加倫敦奧運短跑=.=

一到左呢啲情況,
其實唔關咩種族事,
全世界人都係咁......
只見啲呀叔呀嬸,
又推又擠又鬆肘,
同內地同胞係港鐵玩爭凳仔有得fight......

小弟因為一開始已經係斑馬線o既傍邊,
加上又企得算前,
所以向橫走動兩三米已經企到好位,
企左係前面數起第三排。
見下圖左手邊人仔。
其實小弟肯迫的話,
排頭排唔係問題,
不過又想做到咁樣衰同公公婆婆爭,
反正小弟唔係話好矮, 睇到咪算囉。

咁啱咁好彩,
原來小弟真係企中左一個好好o既位。
因為係早上, 太陽係東邊,
加上日本位處北半球,
太陽稍為偏南,
於是由一開始到正午,
陽光都俾右手邊o既大廈擋住曬唔到!!!!!!

差唔多到十點,
第一台山鉾終於出現喇。

名為「長刀鉾」。
長刀鉾係唯一一架唔洗抽籤, 年年一定第一台巡遊o既山鉾,
而且亦都係唯一一架有一個小朋友坐係上面o既山鉾。
(負責一開始剪彩)

真係好大台!!!

山鉾有大細兩種,
長刀鉾呢啲大型o既,
講緊差唔多成10~12頓重,
所以要成村人先拉得郁......

成廿幾米咁高......

轉彎有咩睇頭?
因為車軸o既缺憾(or叫傳統啦),
山鉾只可以前後移動,
於是要轉彎的話就要花好多工夫.......

首先係地上面舖大量竹條,
舖好之後, 車上嗰兩個楂扇o既就負責發司號令,
叫拉山鉾o既人將台山鉾拉到竹條上。
(見下圖)

唔只拉, 仲有人負責撓郁個碌(上圖左下角)。
台山鉾碌左上竹條之後,
工作人員會將拉扯山鉾嗰條繩,
綁住山鉾右邊個碌,
然後其他人係山鉾o既九點鐘方位撗向拉郁台山鉾。
(條繩由上圖, 向右方延展; 變成下圖, 向相片深處延展[後面排白色人)
於是架山鉾就以逆針方向轉。

見唔見上圖個碌前面有個人拎住個木桶,
個木桶係要黎灑水,
方便個碌滑行, 架山鉾易啲轉向。
下圖可以見到個地濕晒。

每次向橫拉,
都只可以轉向三十度左右,
所以以上o既程序仲要再重覆多兩次。

下圖中, 坐係山鉾上面嗰兩個人好似好輕鬆咁,
但其實真係晒到嘔=.=

長刀鉾都仲未轉完彎,
下一台已經出現了(山鉾: 郭巨山)

通常係一台大山鉾,
然後三台細山鉾咁梅花間竹。

長刀鉾都只係轉左60度左右, 仲要搞多次

山鉾: 霰天神山

細o既山鉾冇大o既咁煩,
眾人合打抬起佢, 碌離地,
然後90度轉就OK

其間,
電視台黎做訪問。

山鉾: 蟷螂山
可以見到上面有一隻大蟷螂(見下圖)

唔係個個山鉾都係轉完彎就走,
好似蟷螂山咁, 遊行o既人會列隊躹躬。

山鉾: 函谷鉾

山鉾: 油天神仙

下圖係山鉾: 綾傘鉾巡遊o既情況,
有人打住紅色o既傘,
亦都有大羅傘。

山鉾: 占出山巡遊時,
有人舞棍, 其他人負責奏樂。(上圖)

山鉾: 占出山

山鉾: 月鉾

平均一台山鉾用十分鐘左右就轉完彎,
呢架月鉾唔知出左啲咩阻滯,
搞左成廿分鐘先搞得掂......

不得不介紹呢個警察叔叔。

每當巡遊有空檔o既時候,
就會走出黎用幽默o既口吻,
提醒大家要補充水份, 以免中暑。

因為小弟嗰個位附近睇唔到山鉾仲有幾耐到達,
呢個警察叔叔又會好好人咁,
去睇吓下一架山鉾去到邊,
然後動話俾大家知, 仲有幾多米左右下一架會黎到。

一台大接住三台細,
其實都係呢個警察叔叔話俾我地知的。
導遊嗰份佢都做埋=.=