九州第一日 熊本 (熊本城)

琴晚結果加埋都唔知瞓唔瞓到有5個鐘@_@
(前因情參閱琴日o既BLOG
http://japsleevefish.blogspot.hk/2012/07/blog-post_18.html)

1000到達熊本JR駅。





剛落巴士,
車長就好好人咁主動話俾小弟知熊本駅係邊,
(其實小弟都見到, 前面就係......)
又話俾小弟知去熊本城的話要去搭電車。
(呢個小弟都一早知=.=)
於是多謝佢o既同時,
小弟就話俾車長知,
小弟要首先搵到間酒店check in先。

車長接住問小弟住邊間酒店,
可能小弟嗰間CHEAP CHEAP酒店唔係咁出名(一番館HOTEL),
所以講左佢都唔知係邊......
不過車長真係好好人,
立刻上車係司機位拎部私伙iPad出黎,
即時幫小弟上網搵!

於是小弟好順利咁就去到酒店check in。



係日本人o既問候對答中,
總會係提及天氣,
就好似香港人會問「食左飯未」一樣。

Check in o既時候,
個reception自自然然就講起「今日好熱呢」
(姐姐, 你已經坐係reception入面開行冷氣架喇喎......)
於是小弟就同佢開始左天氣o既話題,
當然會提到前幾日九州落左幾日史無前例o既大雨啦。
小弟順帶話聽日會去阿蘇, 如果落雨的話都幾麻煩。
(唔係「蘇 Far 蘇 good」嗰個=.= )

個reception即刻話俾小弟知,
JR肥後線(即係去阿蘇嗰條火車線)因為連日大雨,
所以出左問題, 去唔到阿蘇,
不過佢都唔係咁清楚詳情,
叫小弟去JR旅客中心問清楚。

聽到話未必去到阿蘇,
個心真係寒左寒。
之前PLAN行程PLAN得咁辛苦,
就係因為要就阿蘇......(唔係蘇施黃咯!)

去到JR旅客中心問,
果然, 因為山泥令路軌出左問題,
列車去唔到阿蘇, 只可以去到肥後大津,
不過有接駁巴士接載旅客由肥後大津去到阿蘇。

嘟嘟嚕嘟~嘟嚕~♪
玩家追加配備:
「肥後大津來回阿蘇巴士時間表」

一連串就好似玩RPG咁......
先係旅館o既詢問處前面引發對話, 任務出現。
然後按指示到旅客中心, item入手=.=



1030, settle down左酒店o既野之後,
就出發去熊本城。
於JR熊本駅前面搭路面電車往「建軍町」方向,
(個地方名咁鬼共產o既=.=)
於「熊本城前」落車。

向西北方向行就好快見到護城河。
然後沿護城河向西南行,
好快就會見到下圖o既銅?像。

加藤清正, 就係修築熊本城o既人。
跟隨豊臣秀吉家族, 屢立戰功,
所以獲賜肥後一國(熊本縣一帶)
成為熊本o既藩主。
並因為治國有方, 又唔會亂坐飛機遊艇貪污,
所以廣受熊本人民愛載。

熊本城南面o既長塀, 長242m,
係日本現存城郭之中最長o既護牆!

不過如果大家對銅像及長塀冇乜興趣的話,
可能早一個站落車會仲近熊本城入口。



熊本城西南面,
有一個叫「桜の馬場城彩苑」
睇個名完全唔知乜頭乜路,
加上小弟比較喜歡好野留最後,
所以決定睇完呢啲周邊先, 然後先入去熊本城。

原來呢個乜春苑只係一個手信區=.=
有十幾間手信店,
不過同日本其他區o既手信店一樣,
同一區o既手信店賣o既野都係一樣=.=

熊本o既吉祥物



係呢一個乜春苑入面,
唯一有睇頭o既係有一個熊本城o既展覽中心,
深入淺出咁介紹熊本城o既歷史。
二樓仲有個小劇場,
定時有劇目上演。
不過唔睇都冇乜損失=.=

小劇場

一樓主要係放展品,
啲展品都幾互動,
同埋幾大方, 任搞唔嬲。

下圖就係俾大家試下起城牆,
不過只係俾你放最後嗰幾舊石=.=

大家又可以試下坐以前o既轎

可以試下騎馬

仲可以試著和服, 不過只係披上去嗰種。
(男男配, 腐女子大歡喜)

上面o既甲冑唔著得,
不過後面有踏腳石,
可家以企係後面捐個頭出黎影相



睇完展品出番黎,
Oh shit! 落雨!!!!!!
其實琴晚出發前check天氣,
都話熊本呢兩三日會落大雨......

不過就而家所見,
落得唔係大,
而且好快就停左,
可謂不幸中o既大幸。



開始真正參觀熊本城喇,
不過以小弟o既習慣,
都係要先介紹一下o既。

熊本城、姬路城、名古屋城,
並稱日本三大名城,
而熊本城更加係當中o既「日本一」。

點解會係日本一?
因為熊本城o既建築用盡地利,
而護城牆因為太斜太滑o既建築又出左名叫「武者返し」
(攻城o既武者都要跌番落下面)
櫓(防衛o既城樓)o既數目眾多,
令到熊本城有「難攻不落」o既威名。
就連近代o既戰爭中
(西南戰爭, 日本最後o既內戰)
熊本城仍然發揮久攻不下o既威力。

熊本城現時o既正門,
以及比較想快啲上到天守的話,
就要到下圖o既「頬当御門」

一過售票處就已經見到天守

然後行幾條石階,
好快就上到天守前面。

你會話「又話難攻不落, 點解咁快上到黎o既」。
而家打開門做生意就話啫,
事實上行嗰條石階,
左有「宇土櫓」, 右有「数寄屋丸」,
(陣間再介紹)
未行埋頬当御門, 你已經被射到變箭豬。

係天守前面o既廣場有大石一塊。
相傳當年有個大力士, 個老豆係戰爭中俾加藤清正殺左,
為左報仇, 於是築城時混入工人當中等機會落手,
不過最後都係俾人發現左處死。
而呢舊石就係當年大力士以一己之力,
用條頸掛住搬黎o既大石=.=

天守o既基底石牆都咁高,
真係小弟睇咁多城池都未見過!!!

而且真係好斜好平滑

仲有o既係, 天守o既木o既部份同石牆之間,

有獨特o既設計, 就算你爬到上黎都冇咁易上到天守。
右手邊o既係凸出黎o既簷篷(白色部份),
要爬過佢再向上爬都幾難。
左手邊有啲向下一支支o既鐵, 叫「忍び返し」,
喻意忍者都冇得再上。
當然, 普通一般天守, 用黎射箭、落石、淋滾油o既窗口,
熊本城都唔會缺少。

上圖就係頭先提過o既宇土櫓。
淨係一個櫓都成五層=.=
已經係小型天守o既規模......

裏面展示左好多修復時o既工序、用品等

宇土櫓二樓


下圖就係数寄屋丸。

等你頭先仲話一入門口就上到天守,
你睇幾多窗口可以開槍射箭~

你諗住話圍城咩,
加藤先生一早已經考慮過,
係城中開左成120口井,
食物儲備充足的話,
被圍都唔係問題。



熊本城仲有好多特色o既建築,
下圖係「闇り御門」。
一般要進入本丸(即城主起居o既地方)都係光明正大。
不過闇り御門卻是一條地下通道。

上圖o既平台,
就係家老等大臣迎接城主、貴賓o既地方。
經木梯上就可以直接上到本丸。
不過遊人止步。

不得不提,
熊本城中有好多員工著住古時o既服飾招待遊客,
真係好有心思。

穿過「闇り御門」就到天守o既背面(上圖)。
不過小弟都係先睇「本丸」先(下圖)。

好大o既接待室@o@

最高規格o既接待室,
「金碧輝煌」呢個詞語就係呢個時候用。
(下, 數圖)

係日本o既房間壁畫等,
唔難搵到中國故事為題材o既作品,
大家又估唔估到上圖係黎自邊一個中國o既歷史故事?
題示: 女o既彈住琵琶, 後面有漢朝o既士兵相送。
估中冇獎



參觀完本丸,
正式入去天守。

門口真係有官兵看守架。


熊本城o既天守,
係西南戰爭薩摩藩攻打熊本前兩日遭大火燒燬,
所以而家o既只係重建,
而天守入面則成為博物館。

望番落宇土櫓

平櫓

不開門
中國古代術數中, 東北為不吉o既方位,
但呢個方位打通又唔得, 唔通又唔得,
於是起左呢個門, 但平時唔開黎用,
所以叫不開門。

牆又斜, 櫓又多,
而且啲路九曲十三彎, 點攻?

遠處o既係飯田丸五階櫓,
城牆上再有城牆, 然後再有櫓,
夠霸氣!

由竹之丸影番上天守

上圖係熊本城其中一個景點,
叫「二様の石垣」。
展示出建熊本城o既同時,
築城牆o既技巧亦同時在進步。

較近鏡頭o既係早期起o既,
一來冇咁斜, 二來石頭冇乜打磨過, 排列比較凌亂。
而遠啲o既係後期少少起o既,
比較斜之餘, 石打亦被打磨得較方正,
排例比較整齊。

想講,
熊本城真係好大好大,
未試過睇一個城池要用四個鐘......
冇錯, 小弟由十一點左右睇到成三點......
仲要睇到後來有啲地方已經開始係走馬看花......
不過真不愧為日本一,
真係小弟睇過咁多o既城池當中最具規模,
最緊要係真係實用, 難攻不落



寫左好多喇,
食埋野番酒店已經差唔多五點。
沖涼休息。

酒店個view。