九州第四日 宮崎 (鵜戸神宮 + 鬼之洗濯板 + 青島神社 + 高千穗神社夜神樂 + 高千穗峽真名の滝)

今日比之前瞓晏左一個鐘咁大把啦。
0700起身, 梳洗完執行里check out。
先到宮崎駅o既locker鎖起個背包,
然後到駅前o既巴士站等巴士。

今日o既行程係宮崎o既沿岸,
睇鵜戸神宮、鬼之洗濯板、同埋青島神社。

琴晚上網check,
話宮崎呢兩日都落雨,
真係十萬shit。
聽日o既高千穗唔洗玩啦T_T
晨早流流已天陰陰,
真係保你大唔好落雨啦唔該......

第一站先到最遠o既鵜戸神宮,
因為班次疏, 同埋鬼之洗濯板必要時可以skip,
所以去左最遠o既景點,
回程時睇情況再調整。

不過係去鵜戸神宮o既途中,
已經見到鬼之洗濯板。

咩係鬼之洗濯板?
其實係宮崎市至日南市沿岸一帶o既地形。
陣間再講。

搭車途中,
不但冇落雨,
仲越黎越好天,
果然係出左名日照時間多o既一個縣。
SO GOOD!!!

搭左一個半小時o既巴士,
終於到目的地鵜戸神宮喇...
車錢差唔多成1800yen,
作為普通o既香港人,
一般都好難想像點解搭巴士可以咁貴......
不過因為小弟今日用o既,
係上上星期已經買定o既宮崎交通一日乘車券,
1800yen任搭。
而家一程已經差唔多1800yen, 勁so。

鵜戸神宮,
建於日南市北部海岸o既懸崖石洞中,
供奉鸕鷀草葺不合尊,
(你個名唔好再難啲)
順帶加埋佢呀媽豊玉姬。

係鵜戸神宮參道前落車,
望出去毎VIEW已經好正。
行十分鐘左右就到鵜戸神宮門口。

神犬石,
話後面舊石睇落似守護住鵜戸神宮本殿o既狗喎,
咁都好拜o既......

藍天碧海襯紅色o既建築,
真係幾靚。

注連繩,
作用同之前二見浦夫婦岩一樣啦,
呢度唔多講喇。

呢個鏡頭完全係各旅遊雜誌必影o既角度。

望出去都幾開揚。

啲人圍埋係度掟野,
將一啲係神社買o既石仔,
掟去右下角嗰舊石上凹左入去嗰個位。
因為琴日落雨, 所以有氹水係度。
當然, 又係掟中左願望會實現呢啲呃貨幣o既野啦。

正式入去正殿。
起係洞穴入面o既寺廟,
真係第一次見......
唔係喎, 之前係鎌倉都有類似o既。
不過一來嗰個唔係係岸上,
二來好似得半邊係個洞入面。

乳岩......唔係cancer......
因為有啲水滴出黎,
話係豊玉姬o既奶水=.=

おちちあめ,
即係奶水糖,
話係用乳岩o既水做o既糖,
食左會多啲奶水。
小弟都好有興趣想知係咩味,
不過見到個功效......

呢啲護身附,
係神社將掟中頭先講嗰舊石o既石仔執番上黎放入面,
話會好靈咁話。
是為300yen

好喇,
係咁講石仔石仔,
究竟係點架呢。

本身小弟都好想玩一架喇,
就算唔許願,
當玩遊戲都好丫。
之後再睇價錢,
100yen五粒!!!
平到咁爛, 想唔玩都唔得啦。

男性用左手掟,
女性用右手掟。
用左手掟的確有啲難度......
小弟都掟中個圈入面架喇,
不過人地講明係要掟中個凹位。

玩完, 走人。

巴士班次係好疏,
要成粒鐘先一班,
不過來回鵜戸神宮都已經冇左廿分鐘左右,
再影下相、掟下石仔,
其實都差唔多。

等巴士時影o既相。

第二站係鬼之洗濯板。
頭先講過, 成個沿岸都係,
不過多數人睇, 亦都係俾較好睇,
主要係係堀切峠。

小弟計過數,
可以係phenix道之駅落車,
一邊觀賞一邊行過去堀切峠,
時間應該差唔多。

係phenix道之駅落車,
個view都已經好正。
洗濯板, 即係洗衫板,
鬼之洗濯板呢個名又起得幾好喎。
因為石頭種類、角度、加上海水沖蝕,
(以小弟有限地理知識, 應該係頁岩嗰類sedimentary rock掛)
形成好似洗衫板咁一層疊一層o既形態,
真係好特別~

如果有時間,
閣下仲可以行落去踏下場。
你仲會見到有人釣魚添。

因為怕係下面沿住行會冇路上番公路搭車,
所以都係先上番phenix道之駅,
然後沿馬路旁o既行人路邊睇邊行。
唔覺唔覺已經去到堀切峠。

果然時間又係差唔多,
上巴士再去一下站青島。
青島其實係一個地方名, 唔係島名。
(雖然真係有個島)
行去到岸邊,
一邊係海攤,
而另一邊...仍然係洗衫板。

向海中心o既島行,
就會到達青島神社。
青島神社祭祀o既,
係頭先講嗰個乜鬼鸕鷀乜乜乜o既老豆同老母,
彥火火出見命同豊玉姬。
出名在拜桃花、結良緣咁啦。

第一次見啲咁有趣o既祈福黨(上圖)。
放低100yen, 拎張人仔紙,
填低個地址、名、同埋願望,
於拎去隔黎個水缸度溶左去(下圖),
搞掂, 咁就冇左100yen。
不過又真係有人試架喎......

呢間神社都幾多符賣。
而且有好多種動物揀=.=
例如青蛙(上圖),
同埋河童(下圖)(日本傳統水怪),
再唔係有鯛魚(下下圖)。

望住正殿右手邊有條小路,
通去「元宮」。
話呢個元宮係係正呢個島o既正中央喎......
so?

呢個area又有好多搞作啦。

例如拎一條顏色紙繩(上圖),
綁係條神繩上(下圖),
唔同顏色有唔同效果啦。
不過就小弟所見,
最多o既始終都係粉紅色。
唔洗講大家都應該估到,
粉紅色係代表邊一樣願望架啦。

另外又可以買個貝殼或者陶碟(上圖),
飛去兩棵樹中間嗰個槽(下圖),
又係中左o既話願望達成啦。

再唔係, 自己執個貝殼,
放上上圖o既石上,
唔跌落黎的話, 又得左。

咁多野搞, 個神社好似歡樂天地咁......



頭先堀切峠o既洗衫板,
勝在可以高角度睇,
而青島洗衫板,
則勝在範圍夠大夠壯觀!!!

海參

小弟走到最出嗰個燈塔道,
影左上圖以茲證明XD

曬到hihi
其實一直都有風吹住,
但實在太好天喇。
不過小弟情願佢好天好過落雨。

係青島,
你可以見到上圖o既面包車,
俾幾個錢就會接載啲懶人由馬路邊直到神社。

好, 海岸之旅已經完結,
番番宮崎駅食完便當,
拎行里搭JR到延岡。

其實宮崎&延岡都算係城市,
不過啲JR班次,
都係一個鐘先得一班,
會唔會疏得有啲過份呢。

個半鐘JR到延岡,
然後再搭個半鐘巴士(又係成1800yen)去下一個目的地,
都係宮崎,不過係內陸o既高千穗。

其實宮崎縣出左名,
有好多同日本傳統神話故事有關o既景點。
同其他地方o既神社唔同, 唔係話純粹拜下個神。
頭先啲神宮神社、洗衫板呀咁,
其實全部都有故事係後面。
咁啱今年係日本嗰本神話歷史書《古事記》編纂1300周年,
所以今年地方政府更加落足力hard sell。

番番黎,
高千穂都有唔少同故事有關o既景點,
而且風景優美,
雖然隔涉左少少,
但就算唔熟日本神話故事,
當做大自然竟點都唔錯。
如果聽埋故仔, 會更加有趣。

搭巴士o既途中都有落下雨咁。
不過小弟落車時, 雨已經停左。

高千穗仲有一個出名o既觀光點,
就係高千穗神社。
每年秋冬,
都會「每晚」係戶外演出夜神樂(類似神功戲啦)
就算唔係秋冬,其餘o既日子,
都會係神社夜神樂館內上演夜神樂o既其中四幕。
每晚2000開開始, 一個鐘左右o既劇目,
都只不過係500yen。

因為班次問題,
小弟啱啱好2000去到,
館內已經高朋滿座。

神樂, 唔好諗住會好好睇,
只係有人帶住個面具係度打尿震咁,
如果唔係神社有派紙仔介紹劇目,
都真係完全唔知佢做緊咩。
ANYWAY, 睇左劇目都唔知佢做到邊......

劇目係講有關天照大御神潛左水o既故事。
(聽日再詳細啲講)

前面都好認真,
不過到最後嗰幕, 有啲出乎意料。
初初仲以為成個夜神樂都係好嚴肅o既事情。
點知到最後嗰幕,
除左有啲諧趣o既情節外,
兩位演員仲走落台同人影相、
天神下凡, 與民同樂XD

睇完夜神樂已經係2100,
不過小弟今日o既行程仲未完。
高千穗出名o既大自然景點高千穗峽,
當中o既真名の滝(「滝」即「瀑布」),
每年夏天呢個時期就會light up。

於是小弟係呢個本身都好偏僻o既小鎮,
腳踩住路燈都冇盞o既馬路向瀑布進發。
當然, 小弟一早預左會夜行,
所以帶埋電筒黎,
不過都好肴底。
話晒荒山野嶺,
唔知會有咩珍禽異獸出現。
見到啲九隻腳變八隻腳o既複合生物都還好,
遇到北極熊都真係唔知點算......

不過最後, 係值得o既!!!

小弟諗都真係冇乜邊個地方,
會夜嗎嗎搵盞燈射住個瀑布......