七點半起身,
因為住嗰間旅館比較近巴士站,老定得濟, 結果miss左班巴士。
又係個幾兩個鐘先得一班o既巴士。
本身打算第一站先去天岩戸神社同天安河原,
結果而家要改變計劃,
先到高千穗峽遊覽。
冇錯, 就係琴晚影瀑布嗰度,
不過琴晚黑漆漆除左條瀑布之外乜都睇唔到。
又再行一次嗰條又斜又九曲十三彎o既路。
高千穗峽,
其實係由阿蘇流出黎o既溶岩,
經歷幾百萬年水流o既沖蝕而形成o既V型峽谷。
之前篇BLOG冇題到,
小弟探訪o既阿蘇火山,
只係較新形成o既火山口,
事實上整個阿蘇,
都係由最早嗰次大爆發做成o既火山臼。
所以溶岩流到黎高千穗,
一啲都唔奇。
其餘都冇乜好介紹喇,
睇相啦。
被稱為三代同堂o既橋:
最低嗰條大正出生o既石橋,
中間昭和出生o既鐵橋,
同埋最遠嗰條平成出生o既鋼橋。
(大正、昭和、平成, 為日本年號
看官有興趣可以自已GOOGLE一下)
可以清楚見到啲火成岩o既紋里(上圖),
雖然唔係少見o既六角柱狀,
但都算係比較特別o既柱狀岩石(下圖)。
琴晚影嗰條真名の滝
其實黎高千穗峽,
仲有一個好好o既活動,
就係泛舟河上,
近距離低角度觀賞呢個峽谷+瀑布。
可惜因為琴日落大雨, 水位上升,
今日停止租船 T_T
都幾失望吓,
不過都一早估到七成......
一來之前幾日係咁落雨,
二來頭先直影相都見唔到有人撐艇仔。
阿Q啲諗, 當慳番2000yen啦......
本來預左時間撐艇仔,
距離下一班車仲有成粒鐘,
於是決定去一個後補景點,
荒立神社。
傳說中猿田彦命同天鈿女命結婚時,
臨時用呢度o既樹木搭建居室,
因以為名。
因為猿田彦命同天鈿女命背後有唔少事蹟,
所以祭祀呢兩個神o既神社,
雖然細細間, 但包o既野有以下:
交通安全、五穀豐登、生意興隆、去厄運、
夫妻和順、安產、長壽、技藝進步等.......
而其實琴晚夜神樂最後有一男一女o既神嗰一幕,
就係講緊呢兩個神。
當時起屋啲木唔知係咪係度採架呢。
事實上除非你真係想求上述o既野,
如果唔係, 荒木神社其實冇乜野好睇。
時間差唔多,
係時候搭巴士去天岩戸神社。
呢度又要講故仔喇。
如果有睇過之前小弟o既BLOG,
應該都對天照大神、月讀大神有啲印象,
而仲有一個都係同時出世o既, 叫スサノオ。
有好多個漢字寫法,
其中最多人認得o既應該係「須佐之男」, 或者係「須佐能乎」。
不過須佐之男唔好好做事之餘仲大鬧天界,
激到天照大神扎扎跳, 最後天照大神嬲到搵窿,
困左自己係一個山洞入面唔出黎。
仲用舊石封住洞口。
主太陽o既天照大神呢埋左,
實在不得之了, 世間災禍連連。
眾神最後搵到天照大神o既位置,
但又諗唔到方法整佢出黎。
最後, 天鈿女命係洞外面跳舞,
一眾神仙, 睇得高興, 玩得盡興。
天照大神聽到出面嘈亂巴閉,
於是探頭出黎睇吓,
結果就俾埋伏係洞口o既手力雄尊挾佢出黎,
順手封印埋個山洞,
於是天下回復太平, 可喜可賀。
而琴晚o既夜神樂講o既就係呢段故事。
聽完故事,
見到下圖o既雕塑,
大家應該估到講緊o既係邊一幕啦。
天岩戸神社就係主要供奉天照大神,
不過小弟真正想睇o既,
係傳說中天照大神呢埋o既嗰個窿。
係天岩戸神社o既後門出,
就即刻會見到去「天安河原」o既路牌。
沿路o既風景,
同高千穗峽有得fight。
而下圖就係傳說中o既山洞喇~
其實如果唔係了解過個神話故事,
又或者對日本神話故事冇興趣的話,
呢個景點o既及引力大減。
雖然如此,
但沿路風景優美,
黎一黎都唔錯。
就算唔睇旅遊書都估到,
將啲石頭疊起,
疊得越高, 願望越有機會成真。
所以大家行入去攞景影相o既時候小心啲行,
唔好破壞人地o既願望。
沿路出番去,
風景宜人。
襯巴士仲未黎,
係天岩戸神社出面o既食肆,
食左個ちゃんぼん,
同埋高千穗名物? おにコロッケ。
ちゃんぼん係北九州o既食物,
類似拉麵, 但會有炒過o既雜菜做配料。
ちゃんぼん唔錯, 但個 おにコロッケ 唔係話特別好食。
個おにコロッケ, 其實只係炸飯團入面包住啲鹹牛肉,
味道唔係話太夾。
如果有人要去高千穗旅遊, 買宮崎交通1日pass要小心。
原來行走高千穗裏面o既路線,
雖然係宮交o既巴士,
但實際上係高千穗町託宮交辦o既路線,
所以當做係私營路線,
宮交1日pass唔用得。
小弟中伏了......
三點左右離開高千穗,
向九州旅程最後一站---別府進發。
最初plan行程時, 因為路線、時間、金錢問題,
打算唔去別府就番大阪的。
不過點都想睇一睇地獄溫泉,
又唔知以後仲有冇機會黎九州,
所以情願花多2000yen住一晚,
睇埋地獄溫泉先走。
即係格仔房啦。
唔好睇好似好細格,
173cm o既小弟, 坐直都唔頂到頭,
而且其實外面有好大個common room,
有電視、漫畫、大澡室等。
小弟反而鐘意呢一種模式o既住宿。
加上最緊要平!
沒有留言:
張貼留言