九州最後一日 別府 (地獄溫泉)

其實今日o既行程得一個,
就係地獄溫泉。
係JR駅o既旅遊中心睇資料,
要睇晒八個地獄, 車費要880yen,
但一個別府1日pass要900yen。
小弟最後買左。

傻的嗎? 非也,
因為1日pass仲附帶其他優惠券,
其中包括地獄溫泉入場套票。
每個地獄550yen,
套票包晒八個地獄2000yen,
但用1日pass o既優惠券的話,
只雖1800yen。
即係補番巴士條數, 仲賺左180yen。

最緊要係
落巴士唔洗搵散紙!!!!
show下pass就落巴士
Yo~ check it out~

成個別府都好似上圖咁,
周圍都係煙囪同蒸汽。

坐20分鐘巴士, 好跟唔跟跟本旅遊書講係總站落,
結果行番轉頭行到「成吉思汗打仔」。
如果大家見到有個叫「海地獄」o既站好落車喇=.=

本身多數人都係海地獄嗰邊入,
沿路睇地獄溫泉就會順路,
而家冇計,
唯有先從かまど地獄開始。

先買套票。

門票上o既字係「ようこそ地獄へ。」,
即係歡迎來到地獄。

かまど, 即係古時煮飯用嗰啲土灶。
因為竃門八幡宮(「竃門」讀作「かまど」)o既祭典,
會用呢度o既蒸汽煮品神o既飯,
所以以此命名。

入面分左幾個區,
有好多唔同玩法。

上圖係其一個蒸汽o既出氣位,
介紹牌教路,
話如果用口吹煙頭啲煙灰埋去,
會突然有好多蒸汽走出黎。

其實係因為平時透明o既氣體,
遇到煙灰o既粒子之後附左上去,
成為可見o既白色氣體。

然後有下圖一連串唔同o既地獄體驗:

就咁著住襪, 坐係木凳上,
將腳踏上被蒸汽薰熱左o既石板上乾煎=.=

可以飲o既地獄水。
直接流出黎嗰啲成80度,
如果怕熱, 兩邊兩個水煲有攤凍左少少o既。
其實唔太好飲>﹏<
啲味怪怪地......

呢個就真係有溫泉水,
大家可以浸腳落去。

最後呢個, 睇唔睇到左上嗰個牌......
咽喉皮膚蒸汽浴=.=
即係企埋去俾佢噴同吸幾口咁,
但小心燙親。

上、下圖呢位橙衫呀叔係當地員工,
非常落力盡心, 係咁拎住個煙頭係咁吹係咁吹,
下圖啲煙就係佢吹出黎架喇。

現場仲有用地獄蒸汽煮o既食物。
蒸蛋小弟就唔太好喇,
於是買左個黑糖饅頭。

其實又唔係特別話好好食,
不過叫做未成早餐, 所以填下肚咁。



遊完かまど地獄之後,
行番去第一個地獄---海地獄。
其實冇話邊個係第一個要行先,
只係正常由海地獄開始遊覽的話會比較順路。

未真正見到地獄之前, 都仲有花花草草。
池塘種左啲熱帶o既蓮花。

上圖o既大鬼蓮,
話可以載重20kg,
小朋友唔超磅的話可以企上去都唔沈(下圖)。
不過該活動只有暑期中三日先有(13-15/8)。

好喇黎到海地獄喇。
其實都唔係好地獄,
反而仲幾靚添。
湛藍o既顏色,
係因為溫泉水入面有cobalt ion。

個籃咪就係要黎陸雞蛋架囉。

八個地獄入面有一半o既地獄都有售物部,
而且官方指定o既順路,
都一定要你經過售物部,
不過你可以唔買o既。
當中最受歡迎o既當然係地獄tee啦。

印有字句, 如:
「毎日も地獄です」(「每日都係地獄」, 啱晒打工一族)
「地獄に行って来ました」(「在地獄走了一趟」, 見完老闆之後著?)

當中最特喇o既可以話係下面三件......
分別係模仿高達、one piece、同EVA......
版權冇問題嗎=.=

下一站, 鬼石坊主地獄
陣間講點解。

成個地獄都係灰色o既泥漿溫泉,
唔好睇好似啲顏色暗暗地咁,
其實有成98度攝氏!

旁邊有一堆噴住蒸汽o既石,
發出隆隆巨響。
話係有隻鬼用石頭當被冚,
發出鼻鼾聲, 又俾你班日本仔諗得到......

呢個地獄叫鬼石坊主o既原因,
係因為啲泥漿湧出黎o既時候,
好似和尚個頭頂咁。
(「坊主」即「和尚」)

當然唔係下下都噴得咁圓咁靚啦。
影相係要花時間僕的。



再去下一個山地獄。

其實冇乜特別。
可能因為當局都知冇咩特別,
所以就利用呢度較高o既溫度,
養左一啲熱帶o既動物做招徠......
睇地獄定睇動物?

諗起荔園......
(弊, 暴露左自己o既年齡範圍添)



然後下一個鬼山地獄。
個名同鬼地獄相似,
模式亦都好似,
又係用溫泉水養左啲野。

不過呢個地獄都有少少特色o既,
就係蒸汽夠多, 足以推動火車行駛。

養左啲乜? 自己睇啦。

第六個地獄, 白池地獄。
因為比較多SiO2, 池底比較白,
所以叫白池地獄。

當然啦,
就咁得個白池唔夠吸引o既,
於是入面又養左好多唔同o既魚......

眼明o既看官,
知唔知下圖o既係咩魚?
(提示, 產地:阿瑪遜 [唔係網購嗰個])

頭先嗰六個地獄都比較集中,
由一邊行去另一邊都唔洗十分鐘,
但仲有兩個地獄係3km外o既地方,
要轉16 或 16A 巴士先去到。

登登登凳,
成日聽到o既血池地獄(冇拉麵)

其實就只係得上圖呢一個池,
同埋一個浴足o既地方,
that's all......
紅色o既泉水, 估都估到係因為泥土入面o既鐵質做成。

可能因為之前九州中部連場大雨,
連血池地獄都遭央。
下圖就係工人進行清理中。
真係係地獄當中工作......

血池地獄有個姐姐負責介紹。
上圖右上角嗰幾張黑白相,
係講最近一次血池地獄爆發o既災害,
同埋因為血池o既泥有殺困療傷o既功效,
所以二戰時日軍都係呢個池擔泥去治療外傷。

於是順理成章,
姐姐就sell下圖o既血池軟膏喇。
話可以治療香港腳、痲疹、
皮膚乾裂、癬、燒傷等。
(皮膚科醫生唔洗撈啦~)
不過成1300yen一盒仔啊......

係血池地獄o既售物部搵到下圖o既野,
叫まりも(MARIMO), 即綠藻球。
聽就聽得多, 但見真係第一次見。
唔好似為係普通水草碌埋一堆,
係世界上只有少數幾個湖搵到。
其中一個就係日本北海道阿寒湖。

本來想買番個的,
不過個容器係玻璃,
唔太方便攜帶, 所以放棄左。



最後一個地獄, 龍捲地獄。
其實唔係龍捲風咁o既溫泉,
不過係世上少見o既間歇溫泉噴泉。
係美國黃石、冰島、紐西蘭都有間歇泉,
但日本呢一個出名在時間間距短,
唔洗等到發霉。

有專設o既石階同埋木凳供遊人呆等。

唔知係小弟好采定係點啦,
等左十分鐘左右就有lu。

睇完,
冇錯,
係咁架咋~
仲想點呀,
噴埋你塊面到好唔好?
(105度水溫)

八個地獄溫泉,
其實唔係話個個都好睇,
如果旅遊時間唔夠,
要小弟推薦的話, 小弟會推薦:
海地獄、鬼石坊主地獄、かまど地獄、龍捲地獄。
不過以一個入場要550yen計,
四個都2200yen, 如果有時間的話,
不如買套票(2000yen)睇晒八個啦。

買套票時會附有小冊子同一張印仔紙,
係各個溫泉都有印仔吸。
平時小弟就唔會主動去儲印仔架喇,
不過人地埋俾張紙咯, 咪順手吸下囉。

睇晒八個地獄, 花o既時間俾想象中長,
因為小弟係慢慢行慢慢睇,
所以都花左成三個鐘。

時間都只不過係下午點幾鐘。
反正得閒, 又買左個1日pass任搭巴士,
於是搭巴士去明礬(地方名)睇下。

不過完來係冇野睇,
只係一條溫泉旅館街。

番番JR駅,
求鬼其搵間平野醫肚。

叫左個大分縣地道菜試下, だんご汁(右上角嗰煲野)。
其實係用魚肉、白味噌、日本酒等做湯底,
要黎煮一啲好粗o既類似河粉o既麵(?)。
不過個湯底幾好食。

時間都只不過係三點幾。
係車站吽左兩個鐘,
然後搭巴士到別府交通centre,
等夜行巴士番大阪。

小弟o既九州之行正式完結。



總結:

正確黎講小弟只係遊左南九州,
北九州啲大城市一個都冇去到。

南九州簡直係自然奇觀o既天堂,
因為地殼運動活躍,
所以有好多特別o既地貌、現象等,
例如阿蘇火山、櫻島火山、宮崎海岸、
高千穗峽, 同埋今日o既溫泉集合。
全部都令人印象難忘。
再加上有好多日本o既神話故事都係以呢一帶作為舞台,
如果了解神話故事之後再去遊覽,
會更加有樂趣。

不過一來日本地方太大,
啲景點之間o既距離好遠,
加上南、西九州o既交通唔係咁方便,
可以的話自駕遊會好好多,
如果唔係就要好似小弟咁,
一早check定晒所有班次時間,
PLAN好幾時搭邊班車, 駁邊班車。
有啲班次miss左的話,
可以要等第二日先有=.=
幸好小弟冇miss過任何會耽誤行程o既班次......

小弟今次呢六日,
可能只係遊覽左九州著名景點o既四分之一(都唔知有冇),
球磨川呀、霧島、指宿、飫肥等等都冇去到。
N年後有機會再黎的話,
睇下有冇機會自駕遊遊晒佢先。

仲有, 高千穗o既艇仔坐唔成, 失望......