鳥取砂丘

繼續係旅行o既日子,
今次係去鳥取、島根一帶。
香港人未必對呢兩個縣太熟識,
因為呢兩個縣景點比較少又唔大路,
加上交通唔太方便,
正常人遊日本, 一般都未必會考慮呢兩個地方。

早上起身,
因為搞錯左時間o既關係,
結果miss左0715嗰班車,
下一班要0847=.=
都話左交通好唔方便架啦......

搭六個幾鐘車,
終於到達鳥取駅,
時間已經係1509(<--冇打錯時間)
好在而家係夏天,
個太陽唔到七點都唔落山,
加上小弟今日個景點冇時間限制,
所以冇問題。

放低行里係locker之後
初初打算坐普通路線巴士算,
不過見咁啱有麒麟獅子觀光巴士開出(1520),
即刻上車先啦。

雖然有少少兜路(因為係觀光巴士),
但比普通路線巴士平60yen,
同埋主要係, 下一班線路巴士要1555先開出......



講左咁耐, 小弟今日去睇咩?
去睇泥沙!

同十個日本人講起鳥取,
十一個都會聯想起沙漠。
全日本獨一無二,
而要係亞洲睇沙漠,
都應該係呢個比較方便。

係「鳥取砂丘」落車,
會見到有好多賣手信o既店舖,
同埋有一個鳥取沙丘centre。

鳥取沙丘centre
主要介紹下沙丘o既形成,
同埋係咁依講下啲生態咁啦。
不過最重要o既係,
鳥取沙丘centre有涼鞋借出,
同埋有地方俾大家行完沙丘之後洗腳!

事不宜遲,
即刻進入沙漠地帶。
只要登上一條短短o既木梯之後,
就會見到廣闊o既沙之世界。

其實叫沙漠唔係咁正確,
因為事實上呢度o既面積唔係話太大。
加上鳥取沙丘o既形成,
係由附近o既河流將細沙帶黎呢一帶,
然後再經海浪&西北風將沙沖上岸/吹番轉頭,
所以可能叫大沙灘正確啲。
日本人叫佢做砂丘都幾到題。

雖然係咁,
呢個廣闊而壯觀o既景色
已叫身為城市人o既小弟一見難忘。

係沙丘入口處,
唔難見到有得騎駱駝同埋坐馬車。
不過因為時間已經係下午四點,
馬車已經收左工,
而駱駝亦都係走埋呢一水就收檔。
ANYWAY, 小弟打從一開始就冇諗過要騎駱駝,
因為都頗為傷荷包。

就連同駱駝合照都要錢,
坐住影500yen,
企係隔離影100yen

黎到鳥取沙丘,
一定要一登臨海最高o既沙丘「馬の背」

雖然由入口到馬の背路程不足400米,
但係沙上面行真係有啲難度。
平地都仲話可以,
上沙丘時, 行一步滑番落半步=.=
《風雪中的北平》咩......

不過爬左上去之後,
又一個心曠神怡o既景色。
加埋陣陣海風,
即刻覺得搭六個鐘車都物有所值。

其實拍攝靚o既鳥取沙丘,
最好係襯早上未有人踩亂啲沙之前,
拍攝海風吹動啲沙而形成o既風紋。
可惜小弟o既青春18只容許長時間大量轉車,
冇可能一早黎到。

行多幾步之後,
都算搵到一小片未被蹂躪o既土地(下圖)。

睇上圖個小朋友好似玩得好開心,
但睇埋下圖就會發覺佢進退兩難.......

行到身水身汗,
走番去巴士站嗰邊o既手信店,
一邊扮睇手信,
一邊涼冷氣。

沙丘蒸蛋100yen隻

地區限定EVA杯!?
網購都買唔到咁話。
鳥取係明日香。

鳥取特產梨~
所以好多手信、食物都同梨有關。
梨雪糕、梨蛋糕、梨飲品、梨大福等等.......

其實仲有一個睇沙丘o既方法,
就係搭巴士時, 係砂丘展望centre落車,
嗰度有個展望臺連吊車,
不過吊車來回要1000yen......



鳥取沙丘仲出名日落。
小弟見反正都五點左右,
咪等多陣囉。

其間, 影左張白痴相

斜陽裏~氣魄更壯~

斜陽落下~心中不必驚慌~



不過礙於要搭1800 o既巴士,
所以等唔到真正o既日落。

去到JR駅,
搭去松江,
點知上錯車......
(今日做咩事)
方向同目的地都啱o既,
不過上左架普通車......

越搭越唔係路,
點解好似進度咁慢咁o既......

於是頂唔順走去問車長,
佢建議小弟搭快速,
咁啱下一架快速就到,
而又咁啱停呢個站(倉吉)。

真係好彩,
如果唔係都唔知去唔去到松江......
唔係講笑架,
呢啲山卡啦地方,
miss左一班車就除時要等到第二日=.=



今晚o既落腳點係島根縣o既松江