魷日記: 島根 (松江城 + 出雲大社)

補番張地圖先。
上圖就係小弟呢三日行程o既地點喇。
右手邊圓圈就係小弟住開o既大阪,
右手邊第一粒星就係琴日o既鳥取砂丘。
中間兩粒星就係小弟今日去o既松江&出雲。

係JR松江駅搭巴士,
十五分鐘左右就到松江城附近。

上圖o既銅像, 就係最後一代城主松平直政 o既銅像。
銅像o既姿態取自「大阪夏の陣」,
當時為德川家康勢力出戰, 只不過係14歲。

沿住護城河向北行就會搵到下圖o既入口。

由於明治維新o既廢城令(陣間再講)
雖然因眾人力說, 天守得以保存,
但其餘o既城門、櫓等已被拆去。
下圖就係三ノ門o既遺跡。
地上啲石就係木柱o既地臺。

先去觀光案內所,
一來拎張地圖睇,
二來放低個成頓重o既背囊(免費)。

太鼓櫓,
作為守城o既第一陣線,
內置太鼓以作傳訊。

同姬路城、熊本城o既規模完全冇得比,
行幾步路上到天守。

上天守, 入場券600yen,
好啦, 好順理成章咁走埋去自動售票機買啦。
入左錢, 禁左掣, 就係等張飛出黎嗰0.2秒,
小弟望到左手邊地下個細牌仔, 用中、英文寫住:
外國遊客到售票處買入場券有優惠......

%$^)#@)&*

你唔好將個牌埋係泥土入面!?

錢, 唔俾都俾左, 冇辦法。

點解睇松江城?
因為松江城係十二天守之一(陣間再講)
而且有幾個建築特色。

上圖屋簷前o既圖案,
因為似張開翼o既鳥(似咩?)
所以松江城又叫千鳥城。

松江城o既石垣,
用上左一種叫「牛蒡積み」o既方法。
簡單黎講,
就係將面積細o既表向外,
面積大o既面向內,
然後再攝細石加固。
睇落去好似好亂咁,
但早期o既砌法黎講算係幾堅固。

入口處o既門係鐵門,
都係比較少見。

當然, 而家放係外面日曬雨淋o既,
都係仿製o既代替品,
而城入面面就展示左好多原來o既實物。
上圖o既「鯱」, 一般係裝飾係屋頂o既兩端,
但以木雕(外面貼銅片) o既黎講,
松江城呢一對係現存全日本最大。

仲有好多原來o既木材。

成個松江城內部都展示左好多第一手史料(primary sources),
其中包括下圖o既廢城令。

明治維新, 幕府倒台後,
日本正式走進文明現代化。
於是頒佈廢城令,
城池由陸軍所管轄,
而未被管轄o既要一律拆去。

不過就算係由陸軍管轄,
亦不代表受到保護,
只係用作軍事訓練、基地或其他用途,
所以有好多時會拆去不必要o既部份(如姬路城),
甚至成個城被拆去(如若松城)。
所以得到成個城池連附屬建築得以保留o既少之又少(如彥根城)。

即使係廢城令之下仍得以保留,
但仍然包歷天災、祝融、以及二戰美軍空襲o既洗禮,
結果而家仍然屹立不倒o既天守, 就只有十二個:
弘前城、松本城、丸岡城、犬山城、
彥根城、姬路城、松江城、備中松山城、
丸亀城、松山城、高知城、宇和島城。
(紅色係小弟已經去過o既)

所以唔好見旅行團話睇乜乜城,
就以為一定有好野睇。

不過, 好似熊本城咁, 復原左都仲係咁好睇,
不愧為日本三大城之首!

松江城o既鬼瓦係冇角的。

呢啲咁o既木造結構, 只有真正o既現存天守先有。

由天守閣望向北面可以見到宍道湖。

睇完天守,
向松江城公園o既北面行,
會見到小弟最鐘意睇o既稲荷神社,
不過呢個稻荷神社o既鳥居少得可憐......

但從入面, 連樣都溶到睇唔到o既狐狸石像,
可以睇到個神社都有番咁上下歷史(上圖)。

日本人唔知點解一見到有連理枝樹就會拜得一餐。

由北面出左松江城公園,
向東面沿運河行,
會見到古色古香o既街道。

有興趣o既仲可以坐船觀光添。
不過就小弟所見,
好似冇乜野值得坐船睇,
反而近江八幡o既船可能仲坐得過。

小泉八雲紀念館(上圖)。
小泉八雲, 係一個外國人,
原名Patrick Lafcadio Hearn (1850-1904)
但後來取得日本國籍,
仲成為一個日本小說家@﹏@

不過小弟同佢唔係好熟。

行行下見到有個神秘o既物體棟左係度......

武家屋敷, 即係武士住o既地方。
因為松江城被群山圍住,
唔適合用火槍鐵炮,
所以歷代城主刻意營造龐大o既城下町
(即圍住城池o既城市)
並讓大量武士居住其中。
上圖就係拎黎做demo o既武士住宅。

今次知道外國人有優惠,
用半價(150yen)入場。
不過事實上冇乜野好睇,
資料及解說比較少。

有米o既人仲可以坐人力車遊城。
(上圖橋上)

松江城睇完,
係時候向出雲大社出發。

先步行到松江しんじ溫泉駅搭一畑電鐵。
(「しんじ」即「宍道」)

宍道湖

係川跡轉車, 再搭幾個站就到出雲大社前駅。
出左車站o既右邊就係出雲大社。
離遠已經可以見到勢溜鳥居(下圖)。

其實出雲大社前有四個鳥居,
但如果係出雲大社前駅落車的話,
已經錯過左第一道鳥居,
除非出左車站, 反大社方向行7分鐘。

參道兩旁唔難搵到一啲石像,
每個石像都有意思。
上圖o既男人同白兔, 陣間會再講。

出雲大社出名之外,
ぜんざい同蕎麦麵都好出名。

有傳ぜんざい(ZEN-ZAI) 來自出雲神在祭o既神在餅,
因為「神在」(JIN-ZAI) 發音似ZEN-ZAI。

時間係下午一點左右,
去祭出雲大社之前先祭五臟廟。
食左個出雲名物: 割り子蕎麦

其實......除左麵質有咬頭之外(貴野嘛.....)
其餘都唔係真係話太特別。

好喇, 去出雲大社喇。
下圖就係勢溜鳥居,
因為個個黎到停一停先躹個躬,
所以有咁o既命名。

沿路行就會見到第三個鳥居(上、下圖)。

又係一個男人同一隻白兔,
究竟講乜, 係時候聽故仔喇。

話說天地初開, 呀唔係, 都開左一段時間。
地上有八十個兄弟神, 其中排行最細嗰個叫「大穴牟遅」(咩名黎架=.=)。
一眾人去「因幡」呢個地方, 向「八上姬」求婚。
不過大穴牟遅成日俾其他人(兄弟神)蝦,
所以行最尾, 負責拎晒咁多人o既行里。

途中遇到一隻白兔, 隻白兔又自己抵死o既,
因為講大話呃人而受到報應, 皮毛被剥光, 血淋淋。

白兔向八十神求救啦。
但係啲神又整鬼佢, 叫佢用海水沖身,
吹完風之後係山入面瞓。
結果死多幾錢重。

後來白兔向大穴牟遅求救。
大穴牟遅好人, 教佢用清水洗身之後,
用ガマ(一草藥)墊住地下瞓。

最後白兔好番。
於是白兔斷言,
話八上姬唔會同其他人結婚,
只會同大穴牟遅結婚。
而最後大穴牟遅都真係同八上姬結得成婚。

呢個就係「因幡の素兎」o既故事。

而大穴牟遅後來經過好多事之後,
成為左出雲開國o既神「大国主神」。
而出雲大社就係祭祀大国主神。
因為大囯主神之後同好多女神結婚,
成為「縁結び」o既象徵。
所以出雲大社又出名求姻緣。

故事~完~

拍手啦