富士山登山 第一天

等到頸都長,
可以話係今次日本Working holiday o既重頭戲,
富士山登山o既日子終於黎喇!!!

六月中就已經報左名,
俾左3萬yen鬆啲,
參加左三日兩夜o既富士山登山&鉢巡り。
(鉢巡り即係圍住火山口行一圈)

點解唔自己去?
之前問過其他住係日本o既fd,
不過佢地都夾唔到時間,
而一個人上山又危險,
所以咪報團囉。

六點起身梳洗,
做最好準確,
然後就搭車去新大阪駅o既集合地點喇。
搵集合地點時有少少阻滯,
不過仍早左到達。

係新大阪駅外面o既旅遊巴士場,
點左名之後就上車。
上車前見到下圖o既巴士,
諗起《咲-saki- 阿知賀編episode of side A》,
(怜、病んでさえじゃなければ......)
於是影低左, 並唔係小弟坐o既巴士XP

初初報名嗰時, 可能時間比較早,
只係得9個人,
點知今日全車滿座!!!(45人)

0930, 係京都駅接埋其餘o既團友之後,
就正式向住富士山出發喇。

搭足八個鐘頭車,
其間係草津、かりや、新浜松 o既parking area稍事休息。
尾二嗰站係富士山山腳o既なるさわparking area。

呢個parking area係大家今次旅程,

可以免費用水&用廁所o既最後地點,

點解? 因為上左富士山之後,
一切同水有關o既野都係得來不易,
唔好話就咁飲水, 連去廁所都要俾錢,
所以旅行社o既旅程備忘都有再三提醒大家,
要帶最少1L o既食水。

なるさわparking area有一個小o既假石山,
有水流出黎供大家飲用,
下圖就係團友排隊用空樽取水o既情況。

小弟因為已經帶左足夠o既食水,
所以唔洗排隊斟,
而利用呢個空檔,
去左なるさわ富士山博物館參觀,
免費入場費。

其實唔洗入場費的話,
大概都估到有幾多野睇架喇,
入面都只係簡單介紹左富士山o既地形、結構咁啦。
同埋有大量o既晶石,
再加上售賣晶石o既櫃位,
似乎似水晶店多過博物館。

大家享受完最後o既免費水設施之後,
巴士就正式向富士山五合目進發。
行o既係富士スバルライン,
亦即係從富士山北面o既山梨縣進入富士山(上圖)。
唔洗一個鐘左右,
1715就到富士山五合目。

所謂o既幾多合目,
即係指山高o既幾多%。
五合目即係山高o既五成, 亦即係一半高。
八合目即係上左山o既八成高,
如此類推。

上到五合目,
意外地比想像中人多,
好似平時o既旺角咁=.=
當中不乏外國人,
莫講話隨隨便便就聽到普通話。

係山腳時都已經發覺,
見唔到富士山!!!
上到黎五合目, 果然係雲霧瀰漫......
點算, 呢三日兩夜保你大呀......

富士山最高o既山峰高3776米,
(參考資料: 朱穆朗瑪峰高8848米)
而五合目呢度o既高度係2305米。
唔好問小弟點解唔係一半o既1888米=.=

收拾好行里,
將唔要o既野放係旅遊巴之後,
(即係話架旅遊巴等足我地兩日!!!)
1730首先到雲上閣食晚飯。
雲上閣同時係一間手信店+登山用品店+食肆。
上圖就係放係門口售賣o既木杖。

入面仲有頭燈、背囊防水袋、雨衣等,
大家上山時不妨逛一逛,
睇下有冇野帶漏可以買。
但當然, 價錢唔係講笑,
所以大家都係一早準備充足好啲。

食飯, 當然啦,
係山上有食物已經好好,
唔好咁奢侈追求味道~

食飯o既同時,
聽住啱啱匯合o既資深登山導遊広田(音譯)講解。
三十歲左右, 有啲風趣幽默o既男性。
其中広田提到雨具。
佢話最好大家將準備左o既雨具俾佢睇過先,
因為富士山落雨總會伴隨大風,
一般雨衣未必適用。

小弟聽到佢咁講都知死架喇,
因為小弟o既雨衣係求其100yen店買的=.=
果然啦, 俾佢一睇就話唔得喇。
不過當場有得借,
盛惠3600yen......

作為一個正常o既香港人,
當然好直接就會諗,
係咪分明呃你錢架焗你俾錢佢借架。
但一來係日本生活耐左都知道可能性不大。(日本人唔會咁略水)
其次, 觀察佢check其他人o既雨衣時,
都真係好認真咁check, 同埋睇得出有一定o既標準。

ANYWAY, 如果真係好似佢咁講有大雨,
都真係唔係講玩的。
何況小弟帶有單反相機......
都係隱陣啲好。

食完飯到雲上閣外集合,
天氣總算好番啲,
叫做見到個藍天,
但仲係好多雲。
不過話晒都係二千幾米高o既山腰上面,
所以啲雲都係腳下。

然後望上山,
總算叫做見到半個山頂。
"好似"都唔係太高啫。

好, 點齊人, 1800正式出發登山。
今日o既目標係七合目o既住宿: 鎌岩館。

上富士山主要有四大登山路,
吉田(來回16km)、富士宮(來回11km)、須走(來回15km)、御台場(來回20km),
小弟個團行o既就係最common o既吉田登山路。

時值黃昏, 望番轉頭啱啱好日落西山。

行o既速度係龜速。
因為話晒都係已經成二千幾米高o既地方,
一下子行得太快, 好易高山症。
加上成團有七成都係耆英,
所以行o既速度,
大既係平時行路o既1/4左右=.=

啲樹斜晒o既原因,

係因為冬天o既積雪造成。

之後都冇乜好講喇,
都係行、行、同不停咁行。

七點半左右正式入黑,
大家都載上頭燈。
不過一來成四十幾人都載頭燈,
二來個月亮都幾大(十二、十三掛)
所以事實上小弟唔載頭燈都睇得一清二楚。

初初行o既路係有少少沙石係面o既石路,
但行到六合目開始,
已經唔係行山, 而係真係爬山,
因為完全變成勁斜o既岩石面,
已經再唔係路,
而係搵到有地方就踏上去。
不過因為太黑,
而小弟又冇強勁o既閃光燈,
所以影得唔係好清楚,
聽日日間會再影。

睇啲風景好似幾靚,
上文o既描述又唔多,
但事實上到達七合目鎌岩館,
已經係晚上2120.....
即係行左足足三個幾鐘.....
正確黎講後面嗰兩個鐘係爬的......

望番落山下面,
只見點點潾光。

所有富士山山上o既住宿,
就算個名改得幾好聽,
都唔好俾個名呃左,
因為間間都其實只係兩至三層高o既木屋仔。
上圖係鎌岩館o既大堂,
迎賓、食飯等都係晒度。
住o既係二樓。



記得四年前同大學同學去日本旅行,
(詳見「日本 廣島四國旅行團」)
當時個導遊講起上富士山o既經歷,
話成堆人屈係間小屋度,
一人一個睡袋, 就咁就屈一晚。
當時都以為佢誇張左,
今日有幸親自體驗,
先知道唔係講笑。

一條窄長o既通道,
兩邊分左兩層,
(啲人坐住係上層, 下面o既木板入面都係瞓緊人)
一人一個睡袋, 膊頭貼膊頭咁瞓
(冇講大話, 甚至係膊頭搭膊頭=.=)

而一砌隨身物品包括背囊,
就只有掛係屋脊上o既鈎。
背囊下面就係膝頭......
(黃色o既係住宿提供要黎裝鞋o既袋)

之前都講過,
山上一切同水有關o既野都唔可能免費。
五合目, 去廁所一次要50yen,
而七合目, 去一次要200yen,
刷牙洗面要用自己帶黎o既水。
沖涼? 咪玩啦, 邊有得你沖=.=
不過小弟又唔介意唔沖涼唔刷牙o既。
加上山上乾爽涼快,
適當地利用衣服調節體溫的話,
行山過程中都唔會點出汗。

2200,
係呢個早到冇可能想像o既時間瞓覺,
(小弟平時兩三點先瞓......)
因為第二日四點起身睇日出。



順帶一題,
睇小弟寫上山上得好似好輕鬆,
但其實唔係必然的,
因為出發唔夠一個鐘,
第一個犠牲者就出現左。

啋, 唔係死左,
而係係旅遊巴士中坐小弟隔離o既西澤(音譯)先生(78),
行左冇耐就係咁嘔,
第一次見識到高山症。
小弟興幸自己仲鮮磞活跳。