富士山登山 第二天

係咁惡劣o既環境下,
又點可能瞓得好。
瞓下醒下咁, 好快就到左凌晨0330。
唔係自己醒,
而係被周圍o既人o既執野o既聲嘈。

一來為慳水,
二來小弟又唔係特別介意,
所以冇刷牙, 直接出去小屋前面o既平台等日出。
亦因為咁, 所以霸到個頭位。

琴日剛到埗就大霧連連,
起初都擔心會唔會睇唔到日出,
但出到平台, 只見萬里無雲!

都冇乜好介紹喇,
大家睇相啦。

小弟用差劣o既手法,
用ppt接合起黎o既日出之前o既view。

金星與木星

巒巒群山

茫茫雲海

晨光第一線

係大家睇日出睇得七七八八o既時候,
鎌岩屋o既職員走左出黎,
同小弟個團講, 話係度做左咁耐野,
第一次見到咁靚o既日出,
連佢都想向住太陽吶喊咁話!

睇黎小弟真係好采!

時間只係0500, 已經要食早餐。
小弟平時唔食早餐,
但而家唔食的話,
下一餐要到十二點左右先有得食......



食完飯0530就要出發,
今日o既行程比琴日o既還要辛苦,
因為今日要由七合目上到山頂,
然後圍住火山口行一圈,
再茖番八合目。
琴日淨係由五合目上到七合目都用左成三個鐘,
可想而知....

食完早飯出發,
個天已經光晒。

去一次廁所要200yen,
小弟冇講大話架。
不過採取o既係開放式o既管理,
大家自動自覺入錢。

琴晚天黑影得唔清楚,
啲路真係唔係路架。
加上耆英居多,
進道超慢。

上面張相係咪好似睇左好多次呢。
其實小弟都唔想,
不過每爬高一啲,
個風景又再壯觀一啲,
情不自禁咁又拍低左,
所以大家細心比較下的話,
影o既範圍大概係一樣,
但角度越黎越高。

完全已經唔係行山, 而係攀山......

睇下右手邊個小妹妹爬得幾辛苦。

爬左差唔多1小時45分左右,
終於到達......唔係山頂,
而係八合目o既小屋: 太子館。
呢個係今晚住宿o既地方,
所以大家先放低行里係度,
淨係帶必要o既野,
繼續向山頂進發。

休息o既地方同琴晚一樣都係咁迫......
下圖黑色嗰啲就係睡袋,
粉藍色o既係枕頭。
集中營......

呢條大斜坡, 可以話直達地獄。

富士山天拜宮,
每年只係七月中至八月中營運一個月,
所以團友門都排住隊買天拜宮o既護身符。

上圖係「本八合目」,
即係以數字黎講真正o既八合目。

鳥居o既木o既裂縫攝住好多錢幣,
當然以1yen取多, 但大面額o既都唔少,
小弟真係諗, 唔夠錢洗的話可以黎走一轉。

行左四個幾鐘,
終於望到終點喇 T_T
上圖插住日本國旗o既地方就係山頂。

不過要先通過下圖o既鳥居。

然後,
終於到達山頂喇!!!!!!!
爬左四個幾鐘終於到喇!!!!!!!!
不過唔係個個都咁好彩。
首先係八合目o既時候,
琴日一早出現高山症o既西澤先生放棄左,
留係太子館休息。
然後到九合目o既時候,
團內唯一一個小朋友(十零歲左右啦)出現高山症,
佢媽媽陪佢留係九合目休息。



ANYWAY,
小弟成功登山喇!!!!!



從三千幾米高o既山頂望番落去,
真係大地在我腳下。
不得不大喊一句:
「見ろ!!人がゴミのようだ!!」

山頂o既神社

過左神社,
道路兩旁有好多食肆+手信o既小店。

時間係中午十二點幾
小弟個團係其中一間店落腳食午飯。
食o既係今朝派發o既餅乾+膠袋密封o既紅豆飯。
店入面有side order,
不過價錢唔係講玩。

拉麵一碗900yen,
咖哩飯一碟1200yen=.=
順帶一提,
山頂o既廁所係300yen.....

怱怱食過午飯之後,
1230正式開始圍住火山口遊覽一周。
不過唔係強制性參加,
而係大家就住自己o既體力,
決定參加與否。
一場黎到, 小弟當死人都跟住行啦,
人一世物一世!!!



好, 出發。

上圖遠處o既山峰係富士山最高o既地方,
亦都係氣象站o既所在。

 好似係天空中行走o既感覺。

差錯腳就會碌落山, 真係唔係講玩。

萬里無雲, 可以望到成個靜岡縣&對出o既駿河灣。

富士山火山口

都係覺得阿蘇山個火山口,
有火山湖同有蒸氣噴出黎比較有生氣啲。

接近180度o既山頂view, 真係不得了,
右手邊個灣就係靜岡對出o既駿河灣,
而越過左邊佔畫面3/4嗰個山, 後面就係神奈川。
仲可以見到江ノ島,
陣間會有close up。

富士山頂奧宮

同時神社o既左手邊係富士山山頂郵局,
不過呢個郵局只係七月中到八月下旬運作,
(唔係日日都收信去派發)
不過大家有機會係運作期間到來的話,
不妨係呢度寄張名信片俾朋友。

啲雲係山腳炒上黎, 現場睇好壯觀。

通向氣象觀測站o既路,
勁斜, 加上完全係沙石路,
感覺就好似之前去鳥取砂丘咁,
行一步, 線番落半步......
再加上碎石多, 好易拗柴。

富士山上、同時係全日本最高o既地點,
標高3776米!!!!!!

呢個都應該可以話係全日本最高o既小石堆。

從觀測站望番落去斜路

山頂上o既殘雪。
雖然已經係夏天,
但啲雪都未溶得晒,
不過滴緊水(下圖)。

又係用石仔堆成o既小山,
有追開小弟日記, 又或者熟識日本人信仰o既,
都估到係咩啦下話。

好天到連相模灣都見得到(神奈川對出海灣),
細心啲睇, 連江ノ島都可以見到。
相片正中央, 海灣中零零舍舍有一點深色野,
就係江ノ島。(大佬, 差唔多成百公里外, 算係咁啦)

講多少少,
下圖左邊o既弧線就係靜岡對出o既駿河灣,
而右邊o既就係神奈川對出o既相模灣。
比較番左下角o既scale,
當日係山頂基本上可以望到百幾公里外o既地方!!!

連登山導遊広田先生都話,
佢登左三百幾次山頂,
咁好o既天氣同景色, 三隻手指數得晒咁話!!!

小弟真係超lucky!!!

圍住火山口得一圈都花左成兩個小時。
1500開始落山,
行兩個幾鐘落番八合目o既太子館,
1730食晚餐, 然後係太子館內自由活動。
館內細到喊, 可以有咩自由活動=.=

小弟睇左陣新買o既《僕は友達が少ない 8》之後,
七點左右就瞓喇。