中國舊曆七月初七o既節日。
相傳天上o既牛郎織女,
一年只有呢一日先可以靠鵲橋相會......
古時, 中國將七月七日叫做乞巧節,
因為織女負責織野嘛,
所以古時女性乞巧,
就即係希望可以擁有靈巧o既雙手織野。
一來七月七日, double seven,
而「乞」同「七」又音近,
所以後來變左七巧節等好多唔同o既稱呼。
過到黎日本, 唔知點解七巧節變左做
將願望寫上紙條然後綁上竹樹上許願o既節日......
日本人真係好鐘意許願=.=
日本明治維新之後,
將所有節日格硬轉晒做新曆,
所以本身係舊曆o既節日,
變左係新曆七月七日舉行,
不過有啲地方, 例如仙台o既七夕,
會係八月七日舉行。
不過轉左係西曆七月七日,
有一個問題, 就係唔知點解新曆七月七日好多時都會落雨,
變左好多戶外o既祭典都搞唔成=.=
呢個時候日本人就會話,
個天都為牛郎織女而哭......
直到琴晚, 都仲係落雨落到HIHI......
上天氣予告, 都係話黎緊一個星期都會係落雨......
好啦, 本身今日打自去京都o既,
都只好cancel啦。
點知今日中午起身,
出太陽.......
^$#@*(#^)(*&^%$*&(
再上天氣予報睇,
黎緊一星期, 多雲、或者係晴天......
香港個天氣予告已經唔準架啦,
睇黎日本o既都不遑多讓......
難得好天, 加上屈左係房都有一個星期,
係時候出動喇。
京都o既活動因為俾天氣報告fake左去唔成,
但大阪都仲有function家嘛。
於是就去左天滿橋,
睇一個叫「OSAKA天の川伝説」o既function。
OSAKA即係大阪啦,
而日本人稱銀河為「天の川」,
直譯就係天上o既河流。
個function,
其實係係條河度撒一啲藍色o既LED燈球,
搞到條河有好多藍色光點咁啦。
就咁聽落好似冇乜野咁,
所以小弟當初都冇乜特別興趣,
但反正得閒, 咪去下啦。
個function1900開始,
小弟1830去到,
個天都未黑齊。
但已經可以見到河堤都擠滿人。
小弟係係天滿橋上影相的。
不過事實上天滿橋上面有工作人員,
不斷叫人唔好停留, 要keep住行。
雖然冇法律約束力,
但面就人地俾o既,
快快趣按下快門就繼續行。
話就話1900開始function,
但1930左右先開始放LED燈。
其實, 又真係幾靚......
虧啲日本仔諗得出。
行到對岸o既公園,
都係好多人,
不過始終都係係橋上睇靚啲。
藍色LED波波,
唔知點解令小弟諗起海龜蛋=.=
想係橋影相,
但又唔可以停留,
可以點?
行多幾次囉.......
結果小弟係同一條橋,
來回行左成五六次=.=
呢堆竹就係一開始講,
日本人將啲願望寫上紙條度(短冊)
然後綁上去嗰堆竹。
睇海龜蛋睇到夠,
知道附近大阪天滿宮都有function,
反正行過去都係一個車站o既距離,
所以順便行過去睇下。
日本o既七夕,
因為受牛郎織女o既故事影響,
所以都有祈求情侶恩愛o既成份。
一睇下圖「恋愛成就」就明晒啦=.=
幾乎天滿宮入面所有人都係手拖手一對對的......
係天滿宮正殿前面,
有一個大草圈,
擺得係正殿前面就唔會咁小家淨係恋愛成就o既,
「諸願成就」
不過穿過o既人,
始終都係以情侶、夫婦為主......
點解要特別介紹正殿呢個草圈?
當然唔係淨係因為諸願成就啦。
細心啲睇下上圖,
除左有七彩o既射燈射住個草圈之外,
兩邊各有一壇火,
又有煙霧製造機, 又有肥皂泡。
再睇埋下圖,
配合啲煙霧, 仲有激光射出黎,
做成銀河o既效果......
啲effect可以比得上CCTVB o既萬千猩猩賀台慶。
好難想像一間神社會搞啲咁o既野......
不過亦不得不佩服日本仔啲創意=.=
睇啲情侶睇到眼怨.....
閃人。
願天下有情人終成扣肉!!!
爆発しろ！！！！！
題外話, 諗番起以前讀過o既「古詩十九首」其中一首:
條條牽牛星, 搞搞河漢女......
唔好意思, 記錯左XD
迢迢牽牛星, 皎皎河漢女 先啱
沒有留言:
張貼留言