預備迎來富士山第二個日出。
不過唔同o既係,
今次睇完日出就即刻要落山,
所以大家要執好晒行里出屋仔出面o既平台。
今日比琴日多雲得多,
不過琴日迎來一個咁萬里無雲o既日出,
已經此生無悔。
轉下口味都唔錯丫。
因為仲有十零分鐘先日出,
所以大家一邊出發一邊等日出。
終於, 雲端上透出一點光。
大家都呆了......
常言道上山容易落山難,
上山o既路雖然好似好崎嶇咁(唔係好似, 係真係),
而下山o既路只係大斜路一條,
但卻意外地難行。
因為全部都係沙石地,
而路o既斜率最少都有20度左右,
基本上冇人落山o既時候冇線底過......
加上一口氣由八合目落到五合目,
真係腳到軟, 令小弟諗番起係張家界o既慘痛經歷。
其間唔少耆英要向登山導遊借膝蓋輔助帶。
有馬可以騎落山,
不過要成萬幾yen,
仲貴過搭的士!!!!!
而且騎馬落山速度較快,
一下子落到去的話,
大好美景都浪費晒,
所以團中冇人騎馬。
又開始大霧起黎喇。
連續行左三個幾鐘,
終於落到五合目喇。
回顧番之前登山嗰兩日,
好似發左場夢咁。
不過係一場好好o既夢!
仲有一件好好采o既事,
富士山啲員工話,
天氣報告話今日開始富士山會落雨......
小弟真係好好采, 係最好天嗰兩日上山,
係落雨之前走。
有啲怕呢一生o既好運就咁用晒......
其實五合目都可以騎馬上山到一定o既高度,
不過當然, 價值不菲。
自遊活動左大半個鐘,
九點半集合,
同広田道別之後,
一行人坐旅遊巴正式離開富士山,
向山腳o既溫泉旅館進發。
己經連續兩日兩夜冇沖涼刷牙,
加上大家從相片中應該見到,
一路都好大沙塵,
大到唔係講玩,
小弟咖啡色o既鞋, 完完全全變左锈紅色(山上塵土o既顏色)
領隊問大家沖涼先定食野先。
大家都不約而同, 一致裁定要沖涼先。
山梨縣o既地道菜,
唔記得叫咩名喇。
不過同小弟係九州食o既団子しる差唔多。
正如小弟之前講過啦,
日本野, 全部都係紅味曾或白味曾做湯底,
只係配料唔同, 就成為唔同o既地道菜。
兩小時o既沖涼+午餐,
正式完結富士山o既行程歸家了......
途中經過靜岡o既parking area,
個個parking area都差唔多,
本身應該冇野好影o既,
不過小弟係見到下圖o既告示牌,
忍駿不禁, 唔影低唔得XD
「放狗場」叫「Dog Run」, 譯做「養狗場」都算喇,
「Drivers Spot」呢啲日式英文譯做「司機的部位」......
擺明就咁將個詞語掟入翻譯機click個掣就了事啦。
跟團上富士山,成功到山頂o既人每人有一張證明書同一個守護鈴。
領隊話我地呢團人十分合作,
又互相幫助, 令佢好感動,
再加上少有o既好天氣,
實在係好難得。
45人, 加上係山上匯合o既2人,
一共47人登山,
只有西澤先生, 同小朋友&佢媽媽上唔到山頂,
成團有44人成功登山。
領隊話一般平均只有八成人登山成功,
所以小弟嗰團實在係好厲害咁話。
回程巴士中嗰幾個小時,
領隊預備左一隻DVD俾大家睇黎解悶。
內容講一個銀座第一o既陪飲小姐,
(銀座第一的話基本上即係全日本第一)
不過佢雙耳係失聰的@﹏@
DVD就係講佢讀書時o既經歷,
同屋企人o既磨擦等,
幾經波折終於出人投地。
睇到全車人都哭成淚人 T_T
男o既女o既, 大人細路個個斯斯嗦嗦流晒馬尿......
做咩行程臨尾搞啲咁o既野......
因為交通暢順,
0730, 早左成粒鐘就番到大阪。
實在好唔捨得。
隨左唔捨得富士山o既美景之外,
更加唔捨得一眾團友。
一來因為小弟係成團唯一一個外國人,
二來每次點名小弟個名都係頭幾個出現(第四個),
三來團中少有80後世代,
四來小弟為靚影相, 一眾耆英慢慢行o既時候,
小弟成日跑來跑去取景,
所以小弟都幾受注目。
於是好多時其他團友都會走埋黎搭訕。
不過唔只淨係對小弟,
一團人都好融洽,
所以大家都好唔捨得大家~
不過天下無不散之筵席啦。
總結:
講黎都可能有啲廢,
不過富士山真係值得一上。
香港最高o既大帽山都只係得957米,
人生有幾可可以登山差唔多成4000米o既山峰!?
又有幾可可以係雲端上漫步!?
望向山下, 已經唔係俯瞰, 而係鳥瞰!!!
天氣好的話, 一望無際,
大地在我腳下, 覺得大自然偉大無比o既同時,
又會發覺人類係幾咁渺小。
呢一次o既旅程,
一定呢一世都唔會忘記!!!
建議:
唔知有幾多人會係登山之前睇小弟呢編野,
不過小弟姑且略盡綿力,
以過來人o既身份講下登山要注意o既野啦。
1) 唔好諗住一個人上山!!! 真係好危險的
2) 如果要上山頂的話, 兩日一夜會幾辛苦下,
最好第一日黃昏左右上到七合目或八合目, 瞓一個晚上,
然後係小屋睇日出, 又或者爬上山頂睇日出。
第二日係山頂慢慢遊覽慢慢落番七至五合目,
休息一晚再走人會舒適好多。
當然兩日一夜唔係唔得o既,
例如第一日上到八、九合目, 住一晚, 睇日出,
第二人睇完山頂之後, 一口氣落山走人。
3) 山上唔會有地方俾大家充電,
所以出發之前電話充好電, 其他不必要o既電子儀器唔洗帶。
4) 山上食野好貴, 可以的話帶多少少乾糧,
當然, 你要帶杯麵的話,
要自己諗下邊度有熱水=.=
5) 上山真係不宜太急,
因為高山症, 有時都真係可以唔係好關體質事,
健健康康都可能會有高山症。
6) 由於山上崱所都要俾錢,
所以如果閣下有腎虧的話,
要帶備大量100yen硬幣。
五合目為一次50-100yen,
七、八合目為200yen,
山頂為300yen。
7) 有心臟及氣管毛病,
或有其他不利劇烈運動o既病or條件的話,
真係唔好搵命搏,
因為係山上出事的話,
死都要死番落五合目先有得救,
(由五合目到山頂都行成四至六個鐘)
等救護車黎到五合目又要三個小時左右,
運到去醫院又要三個小時左右,
到時應該唔係運去醫院,
而係直接送去殮房!
8) 相機的話, 唔係小弟串咀,
不過如果打算用DC仔影日出的話,
都係算罷啦, 逆光逆到爆廠, 唔會影到的。
DC仔頂多都只係要黎影下風影、行山情況咁。
不過帶單反, 又要考慮重量,
一般單反都成KG重......
同埋山上沙塵大, 鏡頭、body好易入沙......
愛惜自己相機o既朋友,
請做好對策。
9) 上山時盲中中都冇問題,
因為反正向上行就一定會到山頂,
但落山時去到分叉路, 一定要睇清楚路牌,
如例如小弟落山時行行下分左兩條路,
一條係落番山梨縣嗰邊, 行錯左另一條路就會去左靜岡縣=.=
就算冇分叉路, 最好沿途都keep住check路牌,
因為可能已經不知不覺經過左分叉路口都唔知.......
差之毫厘, 謬之千里啊!!!
裝備方面:
1) 帽: 小弟初初都諗平時曬開, 打算唔帶,
臨埋門都係帶埋去。好采有帶去!!!
幾千米高o既山, 啲雲全部都係腳下, 太陽曬到你出煙。
最好可以遮埋後頸...呀~唔係最好, 而係一定要,
如果唔係你好快會脫皮=.=
2) 大陽眼鏡: 呢個optional啦,
不過帶左好啲
3) 口罩: 正如之前相片中所示,
勁大沙塵, 真係好大!!! 唔帶唔得!!!
小弟當時無口罩, 所以用毛巾圍住個鼻。
不過啲鼻涕呻出黎都係啡紅色的
(山上塵土o既顏色 + 鼻血)
4) 衣服:
4a) 上衣: 山上乾爽涼快,
就小弟登山時(七月尾八月頭)黎講,
日間, 五合目約20-25度, 上到山項約10-15度
(視乎日照、風力等有所差異)
不過如果keep住行的話唔會覺得凍,
所以日間上、落山時, 一件短袖加一件長袖已經好夠。
一般人都係入面一件長袖行山彈性快乾貼身衣, 外面一件短袖T。
而小弟上山嗰時係一件短袖T, 外加一件長袖風褸, 都冇問題。
不過夜晚至凌晨會好凍, 大概會跌到5度,
所以要有所準備!!!
仲有, 一定要有長袖, 唔係因為氣溫,
而係又係因為太陽, 唔著長袖係會曬傷的。
4b) 褲: 唔好諗住著短褲,
亦都唔好著牛仔褲、扯褲、西褲。
最理想係行山嗰啲快乾、有彈性o既貼身褲,
又或者係運動長褲。
褲管最好可以冚晒鞋o既口,
因為一路都係沙石路, 沙石入左鞋會好麻煩。
如果係貼身褲的話,
最好配有圍住小腿, 扣到落鞋踭o既淨褲管, 防止鞋入沙
(唔知正式名稱叫咩, 去到行山用品店自然會知)
4c) 襪: 唔會有人著絲襪掛?
普通襪都可以, 如果怕凍, 又或者雙腳幼嫩的話,
可以著類似波襪o既中厚襪
4d) 鞋: CONVERSE, 你就想喇, 真係死得人。
鞋底o既紋一定要有番咁上下深,
一來山路多沙石, 防止失足, 二來山路對鞋底磨蝕好嚴重,
小弟o既「添把靚」行山鞋,
上完山落番黎, 鞋底紋淺左一半以上=.=
鞋管最好過腳眼, 如果唔係好易入沙 & 拗柴
鞋最好唔好咁舊, 因為山路真係好惡劣 & 步數好多,
團中有兩三個團友行行成個鞋底甩左, 唔講得笑。
總括黎講, 都係買番對正正式式o既行山鞋啦
4e) 手襪: 一來要黎保暖, 二來上山爬石時防止割傷。(前者重要啲)
不過為方便活動, 最好係唔包母指、食指、中指呢三隻指頭o既手襪。
5) 雨具: 唔係遮, 遮係冇用的, 要雨衣。
雨衣要係分上下身兩part, 唔係一件過嗰啲。
唔可以好似係小弟咁係100yen店買,
因為山上風好大, 平價雨衣會好似紙片咁被撕破。
背背包o既, 要加埋背囊冚
背囊入面o既野要另外再搵膠袋入住,
更換o既衣物濕左的話, 就真係係咁先。
認真: 雨具唔可以搏佢唔落雨唔帶,
而係千祈千祈千祈一定要帶!!!
6) 燈光: 最好係頭燈, 因為爬山雖要free雙手出黎。
另加一支手電筒做後備就fit晒。(帶定電池呢啲唔洗講啦)
7) 手杖: 就小弟觀察, 如果身體健康,
冇關節、肌肉o既問題的話, 唔帶好過帶。
因為上山o既路崎嶇到要半行帶爬咁上,
手杖反而有礙爬石。
真正比較有用o既只係落山嗰時,
性價比唔係太高, 小弟唔建議帶。
(呢度o既「價」係指付出o既代價, 如少左隻手用、阻礙爬石、又要拎佢上山等)
真係行行下想要的話, 山上沿落有得買木杖。
ANYWAY, (7) o既建議乃個人立場, 請閣下自己衡量。
8) 水: 真係好尷尬o既一樣野, 完全係一個dilemma。條件有以下
---冇水人係會死的(廢話)
---多飲水有助減低患高山症風險
---帶得多會好重, 增加體力消耗 & 流汗 = 流失水份 & 增加患高山症風險
---山上買水比較貴
---帶得多飲得多去廁所去得多 = 要俾錢
---如果忍唔到污糟, 仲要預備埋刷牙洗面用o既水
係咪勁矛盾呢。
小弟個團o既指引,
三日雨夜, 帶約1L o既水(兩支500ml),
唔夠先係山上買。
不過都係嗰句啦,
飲得多去廁所去得多 = 要俾錢
雖然小弟帶左1.5L水上山,
但基本上小弟由上山開始,
每日只係飲少於500ml水, 去一次廁所。
當然體質個個唔同, 量力而為。
9) 毛巾: 抹汗、墊枕頭、擋太陽、掩鼻防沙,
十分有用, 一定要帶一條兩條
10) 紙巾, 基本上山上廁所都有,
去大的話無需擔心。
帶最低限度o既就OK
11) 唔會有得沖涼, 所以唔洗帶沖涼液上山
要刷牙o既帶牙膏牙刷洗面巾
(記得帶埋刷牙洗面用嗰份水)
12) 更換o既衣物, 唔洗提啦下話。
13) 睡袋: 可以唔帶, 因為山上o既小屋都有。
唔好諗住自己瞓山邊, 一來冇乜安全o既平地俾你瞓,
二來可能會凍死, 又或者俾大雨淋死。
都係俾少少錢住小屋啦。
最好預約定, 因為都真係有好多人上富士山,
臨時租住, 唔知有冇位。
14) 自備膠袋裝垃圾, 自行帶走。
15) 電話地圖, 唔洗講都識做啦。
16) 關節、肌肉附助體育用品,
例如膝蓋附助帶。
上山都還好, 落山時真係會對雙腳造成好大負擔,
所以如果自問關節、肌肉唔係咁聽駛的話,
請自己做足準備。
17) 罐裝氧氣。
帶左安心啲o既,
但除非真係好唔掂, 如果唔係唔好用。
因為上到高山, 身體努力地適應高山稀薄o既空氣,
但你又用罐裝氧氣同佢reset過, 前功盡廢。
就算用都唔好行緊o既時候用,
而係坐低唞番一陣, 先吸一兩口。
基本上係咁上下,
諗到再加上去,
又或者歡迎大家發問。
希望幫到大家。
沒有留言:
張貼留言