魷日記: 奥多摩御岳山

2012年8月17日星期五

奥多摩御岳山

前情提要:
小弟而家寄居係以前o既日文老師(日本人)屋企,
同老師 & 老師媽媽一齊住。

因為小弟o既到來,
老師媽媽就提議不如一齊去旅行。
其實小弟始終都係鐘意自己一個人旅行多啲,
不過一來寄人離下,
二來盛情難卻,
三來當陪老人家散步,
四來間唔中同其他人一齊去旅行都唔錯。
所以就答應左喇。

成個計畫由老師媽媽一手包辦。
其實都唔係咩大件事,
只係check下路線咁上下。

咁啱電視介紹御岳山賞花,
於是好輕易咁就決定左去御岳山喇。
御岳山係邊?
算叫做係東京都其一部份,
不過係係市郊, 比較遠,
下圖左上角「A」嗰度就係奧多摩 o既御岳山。
右邊好多線密質質o既就係東京市中心,
而右下角紅色圓圈就係而家小弟而家身處o既川崎市。

早上0600出門口(其實小弟都唔知點解要咁早出門口=.=),
搭左三個幾鐘JR,
總算到達下圖o既御岳駅。

係車站對面搭五分鐘巴士之後,
(五分鐘車程要270yen, 唔好去搶=.=)
就到達下圖o既纜車站。

雖然仲係早上九點幾左右, 仲要係閒日,
不過都有好多耆英光臨......

1090yen o既來回纜車票,
都算係貴。

纜車有兩部,
一藍一黃,
小弟去時搭著藍色嗰架,
回程時搭黃色。
其實冇得揀的,
只係咁啱搭齊兩種。

上圖就係搭完纜車出站後o既平地。
上圖左手邊o既係供休息o既涼亭, 同埋展望平台。
而右手邊就係一啲小賣店, 同埋小吊車o既閘口。

下圖就係由展望平台望出去o既風景。
講真, 自從小弟上過富士山之後,
而家就算上到其他山,
都唔覺得啲風景有幾靚......
下次可能要上朱穆朗瑪峰......

頭先講過, 有小吊車可以上山,
上、下圖就係實物。
其實應該唔係叫小吊車,
不過小弟詞彙匱乏,
實在唔知點稱呼......

設計非常簡單(簡陋?)
冇安全帶冇救生網,
只係就咁坐上去,
用右手兜住+攬住條柱就係......

高度只係向上爬左短短o既50米左右,
但費用只係100yen, 抵過頭先程巴士同埋纜車啦!

順帶一提, 上圖係日文老師o既背影,
而下圖係老師媽媽。

坐完吊車仔,
都未係山頂, 仲要行多一段路。
不過出發上山頂之前,
老師先到上圖產安社拜一拜先。

產安社旁有三棵神木,
分別負責「安產」、「姻緣」同埋「產子+夫婦和順」,
下圖就係負責「安產」o既神木。

上、下圖就係負責「姻緣」o既神木,
面向棵樹, 左邊係女杉、右邊係男杉。
男性求姻緣的話,
就一邊摸住女杉一邊圍住棵樹行,
最後由兩棵杉中間穿過,
咁就可以結良緣喎~

當然, 女o既要摸男杉啦。
但如果閣下男女通殺的話,
小弟都想睇閣圍住兩碌木轉。

下圖係負責「產子+夫婦和順」的。

然後出發上山頂,
途中經過山上o既小商店街,
見到下圖隻狗熱到趴係度,
不過一雙後腿o既角度實在厲害!!!

行左十分鐘上山o既斜路,
再爬N級石階之後 (N = natural number > 200)
終於見到山頂o既武蔵御岳神社。

下圖所見
呢間社神好似會做埋寵物o既祓い(即係「驅災+保祐」咁上下啦),
所以呢度o既御守り有狗o圖案。
的確, 係而家呢個寵物數目多過小朋友數目o既日本,
食「寵物」呢條水的確係幾可觀。

連神社前面隻狛犬都凶過人......

如果大家閱讀理解唔低分的話,
應該都隱約知道今次旅行揀呢個御岳山o既主要目的,
冇錯, 係賞花。

賞o既係一種叫レンゲショウマ (REN-GE-SHOU-MA) o既花。
本身而家應該係花期,
不過跟據神社o既巫女所講,
因為今年天氣唔同左, 所以開花遲左,
而家只係疏疏落落咁開左兩三成左右。