寄居

小弟而家寄居係前日文老師屋企,
川崎市o既川崎区,
今日紹下而家住緊o既日式宅邸。

之前寄居過或者探訪過o既,
都係一條老自己住o既房,
日本人叫One-Room。

One-Room大抵上間間都差唔多,
一入房係一條兩三米長左右o既走廊,
一邊係煮食用o既,
而另一邊係廁所+沖涼。
過左條兩三米長o既走廊之後,
係一間四畳半或以上o既房,
起居飲食都係度搞掂晒
(畳, 即係和式房間舖地下嗰啲長方形竹蓆板,
闊、長 為91cm×182cm)

但今次住o既,
名副其實係一間日式「一戶建」,
即係類似多啦B夢住嗰種。

一入屋當然係玄關,
即係日本人除鞋o既地方。
不過上圖係由屋入面影番出玄關。

正常o既一戶建,
地下嗰層一般都係廁所、客廳、廚房、沖涼房、飯廳,
而一樓係睡房、雜物房。
但小弟而家寄居緊嗰間屋,
因為地下係舖頭,
(前而由日文老師o既父母經營, 而家已租俾其他商戶)
所以地下嗰層只有沖涼房(下圖)。

主人家養左隻狗,
睇個勢似係唐狗。

雄性, 叫「龍」(音譯), 10歲。
超聽話, 唔會咬唔會吠。
仲要醒到好似真係識聽人講野咁,
叫佢坐呀、反肚呀、伸手呀等等o既指令不在話下
叫佢坐開啲, 佢又真係會坐開啲,
叫佢唔好煩, 佢又真係會自己屈埋一邊......

走上樓梯, 一樓就係起居飲食o既地方。
當然, 上圖係由一樓影番落去。

前面係睇電視o既地方,
後面係廚房連飯枱。

傳說中o既「三線」,
(唔知咩係三線o既睇番琴日嗰篇blog)
長期放係房中央, 任彈唔嬲
後面部電腦無謂深究......

而上圖就係小弟瞓o既睡房,
都幾寬闊, 不過冇枱冇櫃,
所以行里散落一地。

係咁, 介紹完。