出發

結束一個星期o既頹廢生活,
再次出發去旅行。
因為張清春18仲有兩次未用,
所以今次旅行一來一回啱啱好。

今次o既旅行目的地係岐阜一帶,
下圖紅色圓圈o既就係喇。
(右邊方框係小弟而家住o既川崎,
 左邊方框係小弟之前住o既大阪)

其實點睇,
都係由大阪去近啲,
而的確之前小弟由大阪到靜岡,
以至由大阪到而家住o既川崎,
都經過過今次旅行o既車站。
可惜當時時間行程唔許可。
反正張春青18有剩兩程,
而且又得閒, 所以去下啦。

岐阜一帶有咩睇?
熟識日本歷史o既人都會知道,
由尾張(而家名古屋一帶)衝出美濃(而家岐阜一帶),
係織田信長平定混亂o既日本戰國時代, 統一日本o既第一步,
所以重要戰役o既城池都係呢度。
而決定豊臣家走向沒落, 德川家康奪得政權o既 関が原の戦い,
亦都係係岐阜o既西面進行。

咁啱小弟之前想睇但睇唔成o既犬山城,
都係路線o既附近,
所以趁今次一網打盡。

不過聽日一早0445就要上JR,
所以今晚就已經離開屋企, 到左車站附近,
係一間漫畫喫茶(即網吧嗰類啦)落腳。

聽日會去o既係有名o既岐阜城+墨俣一夜城。
不過前者係再重建o既, 而後者係「不存在o既城」,
但兩個城都係織田信長步出美濃一個重要戰役o既城
究竟係咩一回事, 聽日自有分曉。