魷日記: 小田原城 + 江ノ島

難得黎到神奈川,
又點可以唔到小田原城、江ノ島、同埋鎌倉呢!!!
鎌倉同江ノ島, 兩年前去東京時,
有日本o既fd帶路, 所以已經行過,
不過當時去到江ノ島已經係夜晚,
所以除左夜景之外乜都睇唔到。
於是今次去小田原城之外,
順便去多次江ノ島補數。

晨早八點出門口,
搭巴士轉JR,
去到小田原已經係十點左右。

出左車站向西南方望過去,

已經可以見到遠處o既小田原城。

唔洗點睇地圖,
只要向住天守方向行十至十五分鐘左右,
就見到護城河。

橫過護城河, 要經過一條紅色o既橋。
不過條橋重新上色,
所以包晒圍欄。
不過小弟建議唔好由呢條入城比較好,
陣間再講點解。

沿上圖o既橋入城範圍之就後,
就會見到下圖o既空地,
係二之丸o既遺址。

好似話二之丸,
係係三代將軍德川家光時期最為宏偉,
不過因為1703 o既關東地震所害, 以致倒塌。
即使後來o既城主再重建,
亦不複舊有輝煌。

由紅橋入城, 就只係會見到二之丸遺址,
然後就直往天守。
但其實唔由紅橋入, 再行前少少,
會有複原左o既城門「馬出門」,
由該處入, 比較多野睇之餘又唔洗兜路,
仲幾有feel。

於是小弟又出番去,
再由馬出門入城=.=

上圖應該係停放馬匹遺址。

過左上圖o既住吉橋之後,
就會見到下圖o既銅門。

叫得銅門,
因為門上欽有大量銅板,
稱得上係最堅固o既城門之一。

上圖就係(傳)銅門o既礎石。
近嗰塊重1.6頓,
遠嗰塊重1.8頓。

沿路行會見到上圖o既歷史見聞館。
入場費300yen。
但反正都會上天守,
所以買左見聞館同天守閣o既共通券, 是為600yen。
日本啲野好均真o既,
正常黎講, 共通券一定平過分開買,
所以小弟都冇特比去了解天守個入場費喇。

當然, 見聞館入見係講小田原城相關o既歷史同埋構造啦。
圍繞小田原城, 比較有名o既戰役,
應該係豊臣秀吉大軍圍城嗰次「小田原合戰」喇。

當時豊臣秀吉已經搞掂左關西、九州,
搞掂埋關東、東北就真係平定日本喇。
而當時關東o既主要勢力就係北条家。

北条家都預左豊臣秀吉會打到黎,
所以北条氏直將小田原城打造左成一個,
可以話係當時最大o既城。
講緊o既當然唔係天守,
除左天守有內、外城郭之外,
北条氏直仲起左一條長9km o既既城牆圍住城下町。
(城下町即圍住城池而建o既城鎮)

上圖就係博物館任入面一個小劇場,
模仿北条家開會對策豊臣秀吉o既請況。
而下圖燈色o既燈就係圍住城下町o既城牆。

經過上圖o既紅色橋就會到本丸同天守。
不過過橋前, 有一個介紹牌,
簡潔地講解當年小田原合戰o既情況。

上圖以鮮色為中心, 外面圍住o既, 全部都係豊臣秀吉o既軍隊。
連海軍都有, 總人數達22萬。
係以前一萬幾千人就開片o既日本戰國黎講,
應該係好寵大o既軍隊。
而中間圍住o既小田原城連城下町,
人數都只不過係6萬人。

不過攻防戰都持續左成3個月,
最後北条氏直見都係打唔過,
所以開城投降。

經過上圖o既常盤木門之後,
(「常盤」有「長青」之意)
就正式到達本丸(遺址)&天守。

不過唔知點解係本丸遺址o既一旁有一寵馬騮=.=

唔好睇馬騮喇,
睇小田原城天守啦。

有追開小弟blog o既朋友,
認唔認得出上圖石垣o既切法係邊一種。

要入天守,
先要爬一條好長o既樓梯......

同其他重建o既天守一樣,
入面都係用左黎做博資料館,
不過入面唔可以影相,
所以只可以簡單介紹下。

第一層係買飛入場o既地方。
第二層係展示築城有關o既資料、物品。
第三層主要講圍繞小田原城o既戰爭。
第四層展示左好多武器。
第四層半展示左好多日本大姓o既家紋。
而最高嗰層就係展望台。

車站方向

石垣山一夜城方向。
因為豊臣秀吉預備左好多人力物力財力打呢場仗,
所以係附近o既石垣起左個城作為作戰中心。
話時話, 豊臣秀吉真係起一夜城起上隱......

箱根方向

係天守上面望到河呀、湖呀 o既城池去唔少,
但向海藍o既, 真係第一次!!!
海風吹埋黎, 好舒服。

由小田原搭番JR去藤沢,
然後轉江ノ電去
江ノ島。
不過小弟係JR瞓過龍=.=
扎醒發覺係藤沢, 想落車o既時候,
車門已經關上......
結果花多左十五分鐘搭倒頭車。

因為兩年前已經黎過一次,
所以路牌都唔洗睇就到達江ノ電(「江ノ島電鉄」簡稱)o既藤沢車站。
唔同o既係, 上次兩個日本朋友,
係小弟到達前已經幫小弟買左580yen o既一日任搭券,
而今次小弟要自己買。

正想買番580yen一日任搭o既時候, 咪住!!!
左上角個牌好似有仲筍o既野喎。

左上角個牌寫住「鎌倉、江の島　アフタヌーンパス」(afternoon pass)。
原來過左1300, 可以用1000yen買呢個pass,
除左包一日任搭之外, 仲包埋江ノ島扶手電梯同埋瞭望塔o既費用,
以下係簡單計算:

藤沢→江ノ島單程210yen
江ノ島扶手電梯350yen
江ノ島瞭望塔500yen
(扶手電梯+瞭望塔套票750yen)

小學一年班程度, 都知道買唔買好啦!

剩低o既就係時間問題。
小弟因為頭先搭JR瞓過龍o既關係,
到達售票處o既時候已經係1300!
真係有咁啱得咁撓!!!!!

於是小弟就買左afternoon pass喇

***註***
用該PASS,
江ノ島扶手電梯 &
江ノ島瞭望塔只可以使用一次
係江ノ島第一個扶手電梯口,
將上圖o既pass交予職員打孔即可。

其實小弟真心想遊覽江ノ島,
不過咁啱近排有套動畫《TARI TARI》以江ノ島為故事舞台,
而該動畫又同江ノ島合作緊推動當地旅遊,
於是沿途有好多該動畫相關o既野,
增添小弟今次遊江ノ島o既樂趣。

首先一入江ノ電車站,
就見到《TARI TARI》o既poster......

搭左十零分鐘左右到達江ノ島駅,
同張poster比, 真係一模一樣,
除左可愛o既女主角變左呀婆之外......

本身穿過上圖o既隧道直行就可以到達江之島。
不過小弟時間多的是,
而且今日都預左係慢慢遊,
所以先到附近o既沙灘睇下。

向右轉, 先到西面o既沙灘睇下,
途中經過下圖o既建築物。

唔講仲以為係animate呀、とらのあな嗰類店舖,
其實係藤沢市観光centre !!!

頭先都講過江ノ島同《TARI TARI》呢套動畫有collaboration,
推動江ノ島o既旅遊業,
所以連觀光案內中心都有大量o既相關物物。

其實仲有《つり球》呢套動畫都係,
不過人氣同《TARI TARI》比真係......

案內中心入面放有幾本筆記本,
俾一眾呀宅留言、畫公仔。

案內中心對面有一間cafe,
唔知點解排晒長龍,
小弟冇錢, 所以影張相就算。

臨進入西面o既沙灘之前,
會見到右手邊有間水族館。
不過小弟對水族館冇乜興趣,
所以pass。

香港啲海灘o既size同外國真係冇得比......
一望無際o既長度, 幾多人黎都塞唔滿。
你試下夏天假日去黃金海岸丫嗱。

最重要o既係,
冇垃圾!!!!!!

話時話,
小弟黎左日本咁耐,
沙漠都去過,
不過沙灘真係第一次~
腳踏細沙, 鹹鹹o既海風吹埋黎,
久遺了o既感覺。

睇完西面嗰個海灘,
反正都係行多兩步,
於是睇埋東面嗰個。

咁講真,
沙灘又真係冇乜好睇o既。
(除左睇女仔之外)
於是正式穿番過頭先嗰條隧道,
向江ノ島進發。

上前往江ノ島o既橋之前,
一定會見到下圖兩條守門口o既柱。

一般黎講,
沿住長長o既橋行十分鐘左右就會到達江ノ島。
不過途中經過一處, 話可以坐船到江ノ島背面o既「稚児ヶ淵」。
見幾得意, 同埋又唔係太貴(400yen),
於是試下坐船去。

左手邊就係通向江ノ島嗰條長橋。

江ノ島o既瞭望塔

到站。
一下子skip晒江之島神社呀咁,
直接到達江ノ島背面o既稚児ヶ淵。
雖然冇咩鬼斧神工o既奇景,
但都係一個令人身心舒暢o既景色。

到達時差唔多兩點鐘, 晒到HIHI,
不過啲海風呼呼聲咁吹埋黎,
一啲都唔熱之餘仲幾涼快~
呢啲就係夏日o既海濱!!!

製作《TARI TARI》o既P.A.Works, 出左名取實景之餘仲要畫得靚。
上圖右手邊條樓梯,
就係第6話o既其中一個場景。
雖然角度唔同,
但細心啲睇,
連啲水氹o既形狀都跟足,
依稀可以對應番邊個水氹打邊個水氹。

不得不再次讚嘆
P.A.Works o既作畫,
真係靚到冇野好講。
唔怪得
P.A.Works o既作品成日俾人當作旅遊推廣。

干蒸完一大輪之後,
離開稚児ヶ淵, 縮番入島入面。
其實稚児ヶ淵o既崖壁有岩洞可供參觀, 入場費好似唔知4、5百yen左右,
不過唔知點解小弟覺得中伏o既機會較大(純粹個人意見),
所以冇入去參觀。

係時候搵地方醫肚。
都冇乜好揀架喇, 間間都差唔多,
所以就係經過o既第一間舖食。
見到下圖店舖都貼有《TARI TARI》o既POSTER嘛www

超正o既海邊view,
而且食物又唔係真係話好貴。
心曠神怡。

食完野俾錢走人。
俾完錢, 個嬸嬸問小弟要唔要POST咭,
然後望下嬸嬸所指o既POST咭。
完來幫襯該店,
就可以免費獲贈《TARI TARI》o既POST咭。

初初小弟仲以為二揀一,
於是戰戰兢兢咁話「要女仔嗰張」。
個嬸嬸反而反問小弟「夠架嗱?」。
結果送埋另外嗰張俾小弟。

後來行多幾間舖先發現,
原來店前貼有poster、
或者插有《TARI TARI》o既旗,
即係話該店同《TARI TARI》有collaboration
會有post-card送。

不過間間準則都唔同,
有啲話有幫襯就得,
有啲指明要花費滿幾多。
但因為當時已過中午,
好多店都已經派晒,
小弟亦都唔會為左POST咭而咁樣洗錢,
所以收集唔到另外兩個女主角o既POST咭......

因為小弟係由江ノ島背面着陸,
再行番上前面,
所以參觀神社o既次序調轉晒。

一黎就係江ノ島神社o既奧津宮。
祭祀o既神唔係特別出名,
小弟就唔多講喇。

奧津宮傍邊有個龍宮。
條龍又幾型。

由奧津宮到中津宮,
會經過一個木造o既展望台。
其實江ノ島上面唔知點解有好多貓,
不過呢隻白貓太可愛了,
所以影左幾張。

由呢個展望台望向江ノ島瞭望塔,
個view唔錯。

中津宮
逆光, 唔好意思。

由中津宮望向相模湾東岸。

然後最近江ノ島正面入口o既辺津宮。
入面有棵連體樹。
又係啦, 見親連理枝,
啲日本又會拜姻緣架喇=.=

有動漫題材o既地方就會有呀宅www
神社當然唔可以放過啦。

辺津宮o既本殿

辺津宮傍供奉有日本三大弁財天之一o既弁財天,
不過參拜要俾$$$。

簡單畫有江ノ島地圖o既木牌。

落埋呢條樓梯穿過瑞心門,
就到江ノ島正面o既商店街。

由商店街影番上瑞心門。

商店街當然唔少得《TARI TARI》o既商品啦。
不過因為到達時已經三點幾,
乜春都賣Q晒......

你地班港燦都真係唔好睇少日本動畫同相關產業,
事實上小弟一路行, 發覺有一半到訪都都係十幾廿歲o既年輕人,
令本身就已經係出名景點o既江ノ島, 擠得更加水洩不通。
實際買唔買野就一回事啦。
但咁o既天氣, 飲飲食食就一定唔會少,
總會對當地商店有幫助。

事實上, 日本現時o既經濟活動,
有10%左右係同動漫有關,
所以以可以話,
呀宅對日本o既經濟有舉足輕重o既影響。

其實一路上仲見到好多人拎住一本簿仔,
係唔同景點、店舖吸印仔,
初初都唔知咩事,
後來番到屋企上網check,
先知道係藤沢市観光centre, or片瀬江の島観光案内所,
有《TARI TARI》o既簿仔攞,
係江ノ島指定o既景點、店舖,
有《TARI TARI》印仔提供,
不過小弟知道得太遲。

江ノ島o既日落景色都好出名,
不過而家時間尚早,
加上又有一日任搭江ノ電o既PASS,
於是又搭下江ノ電啦。

頭先出江ノ島駅都唔覺,
欄杆上有幾隻雀仔,
幾得意。

搭十五分鐘左右就到達鎌倉駅。

其實黎到鎌倉都冇乜野想睇。
因為兩年前黎鎌倉都已經遊過晒,
所以結果只係打個白鴿轉,
就番番去江ノ島......

由江ノ島駅通向海邊o既途中,
有一間LEGO o既轉門店。
呢個年頭, 仲有幾多小朋友知道LEGO係乜?

番番到江ノ島已經係五點半左右。
其實呢個時期, 日落起碼要等到六點幾七點,
不過實在係冇野好做,
所以都係番番江ノ島慢慢hea下好過。

今次終於由江ノ島o既正面攻入去喇。

大家細的話,
其實應該已經留意到,
江ノ島係一個海中o既小山丘,
啲神社呀、瞭望塔都係係比較高地方。
所以要上去神社、瞭望搭的話,
都要爬頗長o既樓梯。

頭先中午還算頪神,
所以由稚児ヶ淵撐上頂當然冇問題。
但而家行左成日, 有啲攰。
正正係afternoon pass出動o既時候喇。

大家仲記得的話,
套票包埋江ノ島扶手電梯&瞭望塔o既費用。
而家唔用等幾時。